Rəhman və Rəhim olan Allahın adı ilə

«24. (İsrail oğulları) dedilər: “Ey Musa, nə qədər ki, onlar oradadırlar, biz oraya girməyəcəyik. Sən və Rəbbin gedib onlarla vuruşun. Biz isə burada oturacağıq”.» Onlar toplum olaraq döyüş­mək­dən imtina etdilər. Bu acınacaqlı və sarsıdıcı bir hadisə idi. Tariq ibn Şihab deyir ki, Bədr döyüşü günü Miqdad  Peyğəmbərə  dedi: "Ey Allahın rəsulu! Biz sənə, İsrail oğullarının Musaya dediyi kimi «Sən və Rəbbin gedib onlarla vuruşun. Biz isə burada oturacağıq”.» – demirik. Biz deyirik ki, sən və Rəbbin onlarla vuruşun, biz də sizinlə bərabər vuruşacağıq".

Rəvayət digər yollarla da nəql olunmuşdur. Tariq ibn Şihab deyir ki, Abdullah ibn Məsud  belə deyirdi: "Mən Miqdadın  qəhrəmanlığının şahidi olmuşam. Mənim üçün onun dostu olmaq, onun mislində dünya nemə­tin­dən daha sevimlidir. Bir gün o müşriklərə qarşı dua edə-edə Peyğəmbərin  yanına gəldi və dedi: "Ey Allahın rəsulu! Biz sənə, İsrail oğullarının Musaya dediyi kimi «Sən və Rəbbin gedib onlarla vuruşun. Biz isə burada oturacağıq”.» – demərik. Biz sənin sağında, solunda, önündə və arxanda döyüşəcəyik. Bu sözlərdən sonra Peyğəmbərin  üzünün sevincini, fərəhini gördüm"."³¹¹

Ənəs  deyir ki, Peyğəmbər  Bədr döyüşünə gedərkən müsəl­man­larla məşvərət etdi. Ömər  döyüşə hazır olduqlarını bildirdi. Sonra Peyğəmbər  məşvərət üçün ikinci dəfə müraciət etdi. Ənsarlardan bir nəfər dedi: "Ey Ənsarlar! Allahın elçisi  sizi nəzərdə tutur". Onlar dedilər: "Elə isə biz İsrail oğullarının Musaya dediyi kimi deyən deyilik. «Sən və Rəbbin gedib onlarla vuruşun. Biz isə burada oturacağıq”.» Səni haqq ilə göndərənə and olsun! Əgər sən bizi Birkul Ğimada³¹² aparsan yenə də sənin ardınca gedəcəyik"³¹³.

İSRAIL OĞULLARININ SƏHRADA AZMASI