Rəhman və Rəhim olan Allahın adı ilə

155. Musa Bizim təyin etdiyimiz vaxt üçün öz tayfasından yetmiş (mötəbər) adam seçmişdi. Onları sarsıntı yaxa­la­yanda dedi: “Ey Rəbbim! Əgər istəsəy­din, bundan qabaq onları da, məni də məhv edərdin. Aramızdakı səfehlərin törətdiyi günahlar üzündən bizi məhv­mi edəcəksən? Bu Sənin sınağından başqa bir şey deyildir. Sən onunla (bu sınaqla) istədiyini zəlalətə düçar edər, istədiyini doğra yola salarsan. Sən bi­zim hamimizsən (ixtiyar sahi­bimiz­sən). Bizi bağışla və rəhm et. Axı sən ba­ğışlayanların ən yaxşısısan!

156. Bizə bu dünyada da, axirətdə də yaxşılıq yaz. Biz Sənə tərəf (hüzuruna) döndük!” (Allah) buyurdu: “İstədiyimi əzabıma düçar edərəm. Mərhəmətim hər şeyi ehtiva etmişdir. Onu Allah­dan qorxub pis əməllərdən çəkinən­lə­rə, zəkat verənlərə, ayələrimizə iman gə­tirənlərə yazacağam!

157. O kəslər ki, əllərindəki Tövratda və İncildə yazılmış gördükləri rəsula-ümmi (heç kəsin yanında oxuyub elm öyrənməmiş və ya məkkəli) peyğəm­bə­rə tabe olurlar. (O Peyğəmbər) onlara yaxşı işlər görməyi buyurar, pis işləri qadağan edər, təmiz (pak) nemətləri halal, murdar (napak) şeyləri haram edər, onların ağır yükünü yüngül­ləş­di­rər və üstlərindəki buxovları açar. Ona (o Peyğəmbərə) iman gətirən, yar­dım göstərən və onunla (Quranın) ar­dın­ca gedənlər məhz onlar nicat tapan­lardır!” (əl-Əraf: 155-157).

İbn Abbas  və Suddi deyirlər ki, bu yetmiş nəfər İsrail oğullarının alimləri idilər. Musa , Harun , Yuşa , Nadab və Əbihu birlikdə idilər. Onlar Musa ilə gedib buzova ibadət edən İsrail oğullarına görə üzrxahlıq etmək istəyirdilər. Onlara ətirlənmək, təmizlənmək və qüsl almaq (çimmək) əmr olunmuşdu. Onlar gəlib dağa yaxınlaşdılar. Dağın başını buludlar örtmüşdü. Orada nurdan dirək də görünürdü. Musa dağa qalxdı. İsrail oğulları deyirlər ki, onlar Allahın kəlamını eşitdilər. Bəzi təfsirçilər onların bu sözünü təsdiqləyiblər. Onlar Uca Allahın bu ayəsini «Halbuki onların içərisində elələri vardır ki, Allahın kəlamını dinləyib anladıqdan sonra, onu bilə-bilə təhrif edirlər.» (əl-Bəqərə: 75) – birbaşa Allahdan eşitmək mənasına yozurlar. Amma Uca Allahın «6. Əgər müşriklərdən biri səndən aman istəsə, ona aman ver ki, Allah kəlamını dinləsin.» – ayəsinə əsasən demək olar ki, buradan belə məna çıxmır. Allah kəlamını dinləmək, yəni təbliğ edənin oxuduğu Allah kəlamını dinləmək mənasındadır. İsrail oğulları da həmçinin Musadan eşidiblər. Həmçinin yetmiş nəfərin Allahı gördüyünü də iddia edirlər. Bu da onların növbəti səhvidir. Çünki onlar Allahı görmək tələbini irəli sürəndə onları ildırım vurmuşdu. Uca Allah buyurur: «55. (Və yadınıza salın ki) siz: “Ey Musa, Allahı aşkar surətdə görməyincə, heç vaxt sənə inanmayacağıq”,- dediyiniz zaman gözünüz görə-görə sizi ildırım vurmuşdu. 56. Bəlkə, şükür edəsiniz deyə, biz sizi ölümünüzdən sonra yenidən diriltdik.» (əl-Bəqərə: 55-56). Burada isə belə buyurur: «Ey Rəbbim! Əgər istəsəydin, bundan qabaq onları da, məni də məhv edərdin...» (əl-Əraf: 155).