LUT PEYĞƏMBƏRİN ƏSİL-NƏSLİ
Lut Haranın, Haran isə Tarihin (yəni Azərin) oğlu idi. Lut peyğəmbər İbrahim əl-Xəlilin qardaşı oğlu idi. Belə ki, İbrahim, Haran və Nahur qardaş idilər.
LUTUN PEYĞƏMBƏR GÖNDƏRİLDİYİ TAYFA
Lut əmisi İbrahimin məsləhəti və icazəsi ilə onun yaşadığı yerdən köçmüş və Ğur-Zəğər torpaqlarının Sədum şəhərində məskunlaşmışdı. Bu şəhər mərkəz hesab olunurdu. Şəhərin böyük torpaq əraziləri və kəndləri var idi. Əhalisi isə hədsiz günahkar, küfr edən, rəzil əxlaq və pis keçmiş sahibi idi. Onlar quldurluq edir, öz aralarında pis işlərlə məşğul olur, bir-birlərini etdikləri pis işlərdən çəkindirmirdilər. Onlar çox pis iş sahibləri idilər. Onlar əvvəllər heç kəsin bilmədiyi bir murdar işin: Allahın əməlisaleh bəndələri üçün yaratdığı qadınlardan üz çevirib, kişilərin kişilərlə evlənməsinin (homoseksualizmin) – "ixtiraçıları" idilər.
Lut peyğəmbər onları heç bir şəriki olmayan Allaha ibadət etməyə dəvət edir, gördükləri haram və murdar işlərdən əl çəkməyə çağırırdı. Amma onlar öz azğınlıqlarını davam etdirir, günah və küfrdən əl çəkmirdilər. Bunun cəzası olaraq Uca Allah onlardan heç kəsin görmədiyi və güman etmədiyi bir intiqam aldı. Bu hər kəs üçün çəkiləcək bir məsəl və ibrətamiz dərs oldu.
Dostları ilə paylaş: |
