Rəhman və Rəhim olan Allahın adı ilə

«Beləliklə, Yusufu yer üzündə yerləşdirdik» Yusufa yaxşı baxmaq və diqqət göstərmək üçün Əzizi və onun arvadını əvvəlcədən necə müəyyən etmişdiksə, onu Misir torpaqlarında da elə yerləşdirdik. «ona yuxuları yozmağı öyrətdik.» Ona yuxuları başa düşmək və bunun əsasında onları yozmağı öyrətdik. «Allah Öz işini qələbə ilə başa çatdırandır.» O bir şeyi etmək istədikdə onun üçün əvvəlcədən səbəblər və heç kəsin bilmədiyi tədbirlər görür. Buna görə Uca Allah buyurur: «Lakin insanların çoxu bunu bilmir.»

«22. Yusuf kamillik çağına çatdıqda Biz ona mühakimə yürütmək bacarığı və elm verdik. Biz yaxşı iş görənləri belə mükafatlandırırıq.» Ayəyə əsasən bütün bunlar kamillik çağından əvvəl baş vermişdi. Kamillik çağı qırx yaşdır. Bu yaşdan sonra Uca Allah peyğəmbər bəndələrinə vəhy nazil edirdi. Aləmlərin Rəbbinin onlara salavatı və salamı olsun.

Elm adamları kamillik çağının hansı yaş olduğu barədə ixtilaf ediblər. Daha doğru fikir "qırx yaş" deyənlərin fikridir. Uca Allah buyurur: «Nəhayət, (insan) kamillik həddinə yetişib qırx yaşa çatdıqda belə deyər.» (əl-Əhqaf: 15).