Rəhman və Rəhim olan Allahın adı ilə

DAVUDUN  ZİKRİ
17. (Ey Peyğəmbər!) Onların dediklərinə səbr et və qüvvətli bəndəmiz Davudu yadına sal! Çünki o, daim Allaha sığınan bir kimsə idi.

18. Biz dağları ona ram etmişdik. Onlar axşam-səhər onunla birlikdə (Allahı) təqdis edib şəninə təriflər deyərdilər.

19. Biz quşları da toplu halda (onun ixtiyarına vermişdik), hamısı ona tərəf yönəlməkdə idi.

20. Biz onun mülkünü (səltənətini) möhkəmləndirmiş, ona hikmət (peyğəmbərlik) və (haqla batili ayırd edib) düzgün hökm vermək qabiliyyəti bəxş etmişdik. (Sad: 17-20).

Mucahid⁴²³ deyir: "Ayədəki «qüvvətli bəndəmiz» – Allaha itaətdə qüvvətli olan mənasındadır. Yəni, o, ibadətlərini və yaxşı işlərini edərkən dözümlülük nümayiş etdirirdi. Qatadə⁴²⁴ deyir: "Ona ibadətdə dözümlülük, İslamda⁴²⁵ isə müdriklik verilmişdi".

"İki Səhih" kitabda deyilir ki, Peyğəmbər  demişdir: "Allaha ən sevimli namaz Davudun namazıdır. Allaha ən sevimli oruc da Davudun orucudur. O gecənin yarısını yatır, üçdə birini namaz qılır, sonra altıda biri qədər yatırdı. O bir gün oruc tutur, bir gün isə iftar edirdi. Düşmənlə üz-üzə gəldikdə isə meydandan qaçmırdı."⁴²⁶