89. (Ey Rəsulum!) Zəkəriyyəni də (yada sal)! Bir vaxt o: “Ey Rəbbim! Məni tək (kimsəsiz, varissiz) buraxma. Sən varislərin ən yaxşısısan! (Bütün məxluqat yox olar, ancaq Sən qalarsan!)” – deyə yalvarıb Rəbbinə dua etmişdi.
90. Biz (Zəkəriyyənin) duasını qəbul buyurduq, ona Yəhyanı bəxş etdik və zövcəsini (doğmağa) qabil bir hala gətirdik. Onlar xeyirli işlər görməyə tələsər (yaxşı əməllər etməkdə bir-birini ötməyə çalışar), ümid və qorxu ilə (rəhmətimizə ümid bəsləyib əzabımızdan qorxaraq) Bizə ibadət edirdilər. Onlar Bizə müti idilər. (əl-Ənbiya: 89-90).
Başqa ayədə isə belə deyilir:
85. Zəkəriyyanı, Yəhyanı, İsanı, İlyası da (hidayətə çatdırdıq). Onların hamısı əməlisalehlərdən idi. (əl-Ənam: 85).
Uca Allah Peyğəmbəri Muhəmmədə insanlara Zəkəriyyənin başına gələnləri çatdırmağı əmr edir. O qocalıb əldən düşəndə ona övlad bəxş etmişdi. Arvadı isə cavanlığından bəri qısır olduğu halda, yaşlı vaxtında hamilə qalmışdı. Uca Allah ona görə belə etmişdi ki, heç kəs Allahın lütfündən və mərhəmətindən ümidini üzməsin.
Uca Allah buyurur: «2. (Ey Rəsulum!) Bu sənin Rəbbinin öz qulu Zəkəriyyəyə olan mərhəmətinin xatırlanmasıdır! 3. (Zəkəriyyə) Rəbbinə gizlicə dua edib yalvardığı zaman» (Məryəm: 2-3). Qatadə bu ayələri açıqlayıb demişdir: "Uca Allah təmiz qəlbi bilən, gizli səsi eşidəndir"470. Bəzi sələflər deyirlər: "O, gecənin bir vaxtı oyanıb ətrafındakıların onu eşidəcəyindən ehtiyat edərək dua edib: "Ey Rəbbim! Ey Rəbbim! Ey Rəbbim!" – deyə Rəbbinə müraciət etdi. Uca Allah isə üç dəfə: "İstəyini qəbul edərəm!" – deyə cavab verdi. O dedi: «“Ey Rəbbim! Artıq» qocalıq səbəbi ilə «sümüyüm sustalmış, başım ağappaq ağarmışdır...»
Deyilənə görə onun qocalığı həm zahirən, həm də daxilən açıq-aşkar hiss olunurdu. Ona görə Zəkəriyyə belə demişdi: «“Ey Rəbbim! Artıq sümüyüm sustalmış, başım ağappaq ağarmışdır...»
Dostları ilə paylaş: |
