Bərabər seçki hüququna əsasən vətəndaşlar seçkilərdə, referendumda bərabər əsaslarla iştirak edirlər. Hər bir səsvermə zamanı hər bir vətəndaşın səsi eyni hüquqi qüvvəyə malikdir. Əgər bir vətəndaşın iki səs hüququ varsa, deməli, bütün başqa vətəndaşlarda da iki səs hüququ olmalıdır. İngilis-sakson ölkələrində bu prinsip, bir qayda olaraq, «bir şəxs-bir səs» formulu kimi qəbul edilir. Bu prinsipin pozulması (plüral votum), adətən, müxtəlif səbəblərlə bağlıdır. Məsələn, Böyük Britaniyada 1945-ci ilə qədər şəxs yaşadığı yerdə, həm də əgər başqa yerdə əmlakı vardısa, orda səs verə bilərdi ki, belə şəxslərin artıq iki səs hüququ əmələ gəlirdi.
