Sevgi Naminə

Məncə, elə 3-cü cümlə yetər ki...

Çinarə bir andaca məyus oldu. yazmağa davam etdi.

4. Onunla rahat həyat yaşamaq olmaz. hər an gözləmədiyin hadisə baş verə bilər. O, qeyri-adidir. Hər kəs kimi deyil...

5. Onunla “happy end” mümükün deyil. O, “happy end”lərə inanmır.

Çinarə yazmağa daha heç nə tapmayıb, keçdi vərəqin sağ tərəfinə: müsbət cəhətləri:

1. O, çox mülayim və mərhəmətlidir.

Elə ilk cümlədən Çinarənin çöhrəsində təbəssüm yarandı. Yazmağa davam etdi.

2. O, çox mədənidir. Işlətdiyi cümlələr elə nəzakətlidir ki...Ən hirli vaxtında belə, onun dilindən söyüş və ya təhqir eşitməmişəm.

Çinarə bir anlıq Nurlanın qəzəbli anını gözlərinin önünə gətirdi:
-Hardadır? Axı bura qoymuşdum. Hara qoymusan onları? Mənim əşyalarıma toxunma!

O, ən qəzəbli vaxtında belə, cəlbedici və xarizmatik idi. Cahil insanların əsəbiləşməsi vəhşilik, mədəni insanların əsəbiləşməsi isə xarizmatikdir.

-Mən dəyməmişəm. –Çinarə pəncərəyə tərəf qısılmış və balaca uşaq kimi ehtiyatla Nurlana baxırdı.

Indi xatırladı. Çinarə heç vaxt Nurlana səsini qaldırmamışdı. Ona görə yox ki, bilirdi ki, Nurlanın həyasız qadınlardan xoşu gəlmir. Ona görə ki, bilirdi ki, heç 2 dəqiqə keçməmiş Nurlan onu gəlib qucaqlayacaq və “bağışla” sözünün əvəzinə onu öpəcək.

Və o qucağı qazanmaq üçün Çinarə uşaq kimi göz yaşı tökməyə razı idi.
3. Onun qəlbində zərrə qədər də olsa, nifrət yoxdur. Onun nurlu qəlbi var. Və bu, əsas və yetərli səbəbdir.

Görəsən, valideynləri haradan bilirdilər ki, onun qəlbi nurlu olacaq? Və ona görə də adını Nurlan qoydular. Doğrudan da, insanın adı ilə onun şəxsiyyəti arasında mistik bir əlaqə var. Hər adın daşıdığı məna və onun insan həyatına təsiri...

Əvvəl ona Nurlan deyil, babasının adını - Əzizağa qoymaq istəyiblərmiş. Sonra son anda atası fikrini dəyişir və deyir:

-Oğluma heç kimin adını qoymayacam. Düşər düşməzi olar. Qoy oğlum kiminsə adını daşımasın, kiminsə həyatını yaşamasın. Öz şəxsi adı və müstəqil düşüncəsi, özünəməxsus həyatı olsun. Və ad kitabından ona ad seçirlər: Nurlan.

4.O, çox ağıllıdır. O, çox dərin düşünür və cavabları, sualları, danışığı çox fəlsəfidir. O, məndən qat-qat ağıllıdır. Ona qibtə edir, və mən də ona çatmağa, onun zəka səviyyəsinə çatmaq istəyirdim...O, çox zəngin bir xəzinə idi...

5. O, çox cəsarətlidir. O, mənə də cəsarətli olmağı öyrətdi. Onu tanıyana qədər cəsarətsiz, kompleksli, qorxaq biri idim. O, mənə özüm kimi olmağı öyrətdi. Öz müstəqil qərarlarıma görə hərəkət etməyi öyrətdi. O, mənə özgüvəni öyrətdi. Onu tanımayan qədər, valideynlərimin qayğısı altında, onların diktəsilə, onların iradəsi ilə hərəkət edə, onların qərarlarından və qanunlarından kənara çıxmayan, daim qorxu və cəsarətsizlik kompleksi keçirən bir qız idim. O, mənə azadlığı göstərdi. O, mənə valideynlərimə hörmətsizlik etmədən, öz qərarlarımla yaşamağı öyrətdi...

Çinarə dayandı. Onun müsbət cəhətlərini yazdıqca, qəlbindəkı sızıltı yenidən baş qaldırırdı. Çinarə artıq heç nə yaza bilmədi. qələmini yerə qoydu. Kağızın həm sağ, həm də sol tərəfinə baxdı. 5-ə 5. müsbət və mənfi cəhətlərin sayı eyni idi. Axı nəsə qalmalı idi qeyd olunası. Nəsə...Hər hansı bir keyfiyyət. Rəqəmlərin nisbətini dəyişəcək bir şey. Sanki nisbət pozularsa, Çinarə qalib gələcəkmiş kimi. Sanki onun bundan sonrakı həyat müqəddaratı bu nisbətdən asılı imiş kimi: tamam yoxsa davam?

Çinarə o qədər çarəsiz vəziyyətdə qalmışdı ki, taleyini testlərə və kağızlardakı nəticələrə buraxmışdı. Sadəcə 1 cavab kifayətdir. Sadəcə 1 cavab! Birdən Çinarənin gözlərinə işıq gəldi. Müsbət cəhətlər tərəfdəki 6-cı cümləni yazdı:

6. O, mənə Sevgini göstərdi.

Və altdan xətt çəkərək yazdı: Davam!

***

Deyl Karneqi kitabında yazır:

Ailə həyatını xöşbəxt etmək üçün 7 qayda:

Qayda 1: Heç vaxt öcəşməyin!

Qayda 2: Öz partnyorunuzun xarakterini dəyişməyə çalışmayın!

Qayda 3: Tənqid etməyin!

Qayda 4: Səmimi minnətdarlıq bildirin!

Qayda 5: Azca diqqət yetirin!

Qayda 6: Nəzakətli olun!

Qayda 7: Ailə həyatının seksual aspekti haqqında kitab oxuyun!

Çinarə bu qaydaları əzbər bilirdi və hər birinə ailə həyatında ,sözsüz, əməl edirdi. Ama bəzən qaydalara tam riayət etmək belə, ailəni dağılmaqdan xilas etmir.