Telman Ümman Tircanlı BƏNÖVŞƏ ƏTİRLİ qar 2020 Redaktorları: Könül Telmanqızı
Yüklə 292,48 Kb.
|
- Bu səhifədəki naviqasiya:
- MİLLƏTİN ÜZQARASI
- UNUTQAN OLMADIM
- SƏNİ QORUYA BİLMƏDİK, VƏTƏN
| ***
Baş qoşma bizlərə, Tanrım, Biz dəliyik, divanəyik. Sən külli-aləmə sahib, Biz bir şəmə pərvanəyik. BƏNÖVŞƏ ƏTİRLİ QAR Qardan tutub çətrini, Gizli baxır bənövşə. Alıb yazın ətrini, Gəlibdir o görüşə. Boynun büküb baxsa da, Yoxdur giley-güzarı. Bir az vaxtsız çıxsa da, Gözləmirdi bu qarı. Ləçəkləri təzə-tər, Rəngi elə öz rəngi Tanrım, baharı göndər, Kim sevməz bu ahəngi!? Bənövşə ətirli qar, Üşütmə yaz gözəlin! O tər çıçək, qar, bahar Mövzusu min qəzəlin! MİLLƏTİN ÜZQARASI Zəhər olsun çörəyin, Boğazından keçməsin. Ey zülm edən, gözlərin Ağ-qaranı seçməsin. Guya müəllimdi bu, Əslində bir saxtakar. Həkim, mühəndis belə Oğrular qatar-qatar. Sən ziyalı deyilsən, Sən ziyanlı birisən. Dünya irəli gedir, Sən hələ də gerisən. Millətin üzqarası, Onu pula satansan. Şərəfini unudub, Üfunətdə batansan. UNUTQAN OLMADIM Unutqan olmadım heç, Dosta vəfa borcum var. Yoxsa da büllur camım, Əllərim var, ovcum var. Yar olana yaram mən, Belə bəxtiyaram mən. Qışda da baharam mən, Qeyri-adi güçüm var. Üzüm gülənlə gülmür, Güya bir kimsə bilmir. Əlimdən heç nə gəlmir, Vətən darda, acım var. Bezdim qorxaq, qaçaqdan, Kim qorunub olacaqdan. Neçə-neçə alçaqdan Alınacaq öcüm var. Unutqan olmadım heç, Dost da mənim, düşmən də. Qürbət olsa da cənnət, Çox xoşbəxtəm vətəndə. SƏNİ QORUYA BİLMƏDİK, VƏTƏN Qoynunda doğulduq, ərsəyə yetdik, Burada dil açdıq, bülbültək ötdük. Əzəldən var idik, sonradan itdik? Biz səni qoruya bilmədik, vətən! Bizimdir söylədik əlçatmaz dağlar, O yaşıl meşələr, meyvəli bağlar. Bəs hanı sinəyə döyülən çağlar, Biz səni qoruya bilmədik, vətən! Düşmənə bax, quduz köpəkdən betər, Bu gedişlə çətin bu dava bitər. Bu ağrı, bu acı hər kəsə yetər, Biz səni qoruya bilmədik, vətən! Başbilənlər heç demə başdan xarab, Yeyirlər kababdan, içirlər şərab. Bunlardan almadıq müsbət bir cavab, Biz səni qoruya bilmədik, vətən! Haramdır çörəyin bizə, yemərik, Bir də sinəmizə əsla döymərik. Əgər qeyrətimiz varsa, demərik, Biz səni qoruya bilmədik, vətən! Biz varıq, hələ ki, ölmədik, deyək! Səni qəlbimizdən silmədik, deyək! Aciztək qarşına gəlmədik deyək, Biz səni qoruya bilmədik, vətən! EY YARADAN Bezdik şüar deyənlərdən, İnsan haqqın yeyənlərdən, Özün dartıb öyənlərdən Hifz et bizi, ey Yaradan! Haqqımıza girənlərdən, Düzü əyri görənlərdən, Arxamızca hürənlərdən Hifz et bizi, ey Yaradan! Yalandan əl çalanlardan, Kiçilib, alçalanlardan, Sərvətlə ucalanlardan Hifz et bizi, ey Yaradan! Aşa zəhər qatanlardan, Səhər-axşam yatanlardan, Torpağını satanlardan Hifz et bizi, ey Yaradan! Vətən qədri bilməyəndən, Xəcalətdən ölməyəndən, Haqq yoluna gəlməyəndən Hifz et bizi, ey Yaradan! Mayası pozuq olandan, İftiradan, ağ yalandan, Gündə min hava çalandan Hifz et bizi, ey Yaradan! Bu milləti soyanlardan, Ac-yalavac qoyanlardan, Şər toxumu yayanlardan Hifz et bizi, ey Yaradan! Yüklə 292,48 Kb. Dostları ilə paylaş:
|