Telman Ümman Tircanlı BƏNÖVŞƏ ƏTİRLİ qar 2020 Redaktorları: Könül Telmanqızı

*Darıxanda güzgüdə özünə bax.

*Hər gün onlarla yalan danışanla rastlaşsam da, ildə bir doğru danışanla rastlaşmıram.

*Mənliyi olmayanın şənliyi çox eybəcər olur.

*Ədaləti olmayanın ləyaqəti olmaz.

*Biri düşmənim deyilsə, onun dostum olması anlamına gəlməz.

*Qanmazı qandırmaq üçün onun səviyyəsinə enməyə ehtiyac yoxdur.

*Yalançı şahid əxlaqsız qadından da pisdir.

*Qatığın qara olduğunu iddia etmək istəyənin mayası pozuq olar.

*Yaltaqların ucaltdığını öz içindəki təkəbbürü yıxar.

*Cəhd etmədən məqsədə yetmək əfsanədir.

*Şərəfini satmış biri, hər şeyi satmağa qadirdir.

*Ləyaqətsiz biri ləyaqətdən danışırsa, deməli dünyanın düzəni pozulmuşdur.

*Əzazil mərhəmətdən, hədsiz ədalətdən danışırsa, ya yeni oyun başlayacaq, ya da sonu çatmışdır.

*Hər kəsin tərəfini saxlamaq vacib deyil, haqq olanın tərəfini saxlamaq şərəfdir.

*Yalanlar içində doğru axtarma, yalanı törədən səbəbi axtar.

*Yalan qorxaqların silahıdır və bu silah teatr xəncərinə bənzərlikdən başqa bir şey deyil.

*Mən heç nədən və heç kimdən qorxmuram, Allahıma yararsız bəndə olmağımdan qorxuram.