Telman Ümman Tircanlı BƏNÖVŞƏ ƏTİRLİ qar 2020 Redaktorları: Könül Telmanqızı

*Vətən fərdlərin deyil, xalqın simasında vətən olur.

*Vətən, vətən deyənlərlə vətən uğrunda canlarını fəda edənlər başqa-başqa insanlardır. Birincilər şüarçı, ikincilərsə savaşçıdır.

*Bu cəmiyyət hara gedir?

Qoca, qarı, cavan yaltaq.

Belələri ömrü boyu

Kimlərəsə olur yamaq.

*Mən millət vəkili ola bilərəm. O isə mən ola bilməz. Aramızdakı fərq Yerlə Göy arasındakı fərq qədərdir.

*Kiminləsə razılaşmaq öz fikrindən dönmək deyil.

*Cəsur ürəyi, döyüşən biləyi olan millət yenilməz.

*Göz yaşlarını təbəssümə çevirmək üçün bir sevgi yetər.

*Ədalət olan yerdə haqsızlıq zəncirlənmiş olacaq.

*Göz qamaşdıran libasın içində bir sərsəmin olması mümkünsüz deyil.

*Düşmənə düşmənlik etməklə məşğul olsan, dostlarını da itirmiş olarsan.

*Qanunsuz ölkə viran, ədalətsiz insan yırtıcıdır.

*Simanın gözəlliyini hər kəs, ruhun gözəlliyini yalnız Tanrı görər.