Telman Ümman Tircanlı BƏNÖVŞƏ ƏTİRLİ qar 2020 Redaktorları: Könül Telmanqızı

*Sevmək əzabdır, əzab sevmək deyil.

*Hüquq qanunların cəmidir. Hər cəmin də hüququ bilməsi xülyadır.

*Xoşbəxtlik nağıldır, bunu hər kəs anlamaz.

*İnsanların bir-birindən fərqi-əxlaqıdır.

*Sakit oğurluq etməkdənsə, hay-küylə müştəri səsləmək daha yaxşıdır.

*Böyük insanların səhvlərini bilmədiyimdən, böyüklüyünü iddia edə bilmərəm.

*Dilin dediyi sözlər ürək deyilən mətbəxdə hazırlanır.

*Xəstə cəmiyyətdə sağlam olmaq, doğulmadan ölmək deməkdir.

*Dövləti idarə etmək, bir ailəni idarə etməkdən daha asandır.

*İnsanlıq üçün mücadilə etmək, gələcəyi işıqlı görmək istəyindən qaynaqlanır.

*Musiqiçilərin və idmançıların millət vəkili olması düzgün deyil. Bu insanlar savadsız (bəzi istisnalar ola bilər) və yalnız özlərini düşünən olurlar.

*Bu gününə sahib çıxmayan gənclik, gələcəyini tapmaqda çox əzab çəkəcək.

*Qorxu ilə tək-tək insanları, sevgi ilə milyonları ram etmək olar. Sevgisi olmayanın özü də yoxdur.

*Riyakara haqq verib, yüzlərin haqqını qurban verən cəmiyyətin, həqiqət haqqında anlayışı yoxdur!

*Bəzilərinin “kişi” sandıqlarını çoxları heç pişik də sanmır.

*Belə düşünməyi hardan öyrənmişik? Yaşın çoxdursa, hörmətlisən. Nəyi pisdir ki? Əla. Vəzifən varsa, çox hörmətlisən. Əgər o insan həqiqətən bu hörmətə layiqsə, niyə də olmasın? Əfsuslar olsun ki, özümüz insanları boynumuza oturduruq. Bir də onda xəbər tuturuq ki, bu o deyil. Artıq iş-işdən keçmişdir. Allah köməyimiz olsun, ey insanlar!

*Birinə layiq olmadığı dəyər verilsə də, gec-tez kim olduğu üzə çıxacaqdır.

*Vətən harınlar üçün gəlir mənbəyi, kasıblar üçün canını belə əsirgəməyəcək varlıqdır! Ədalət bu tərəflərdən hansının yanındadır? Sual gülünc səslənir, elə deyilmi?

*Gecə pislikləri örtən pərdədirsə, gündüz pislikləri və yaxşılıqları əks etdirən aynadır.

*Xəyanətkarı yaşamaqla cəzalandırmaqdansa, ölümlə mükafatlandırmaq daha doğru seçim olardı.

*İnsanları anlamaq, insan olmaq qədər çətindir.

*Biri sənə canfəşanlıqla yaxşılıq etmək istəyirsə, niyyətində xoşagəlməz nəsə ola bilməsi qəribə deyildir.

*Sevməyi bacaranın yaşamağa haqqı vardır.

* Sənə inanan varsa, demək insansan.

*Azərbaycanlılar yatan pələng deyilmiş!

*Mənim polisim məni döyür!

*Torpağı satanlar, analarını çoxdan satmışlardır!

*Maskasız küçələrdə ağalıq edən polisləri virus tutmur, amma evdə oturanlara qənim kəsilib!

*Koronavirus da qohumbazlıqla məşğuldur!

*Əxlaqsız əxlaqdan, ədalətsiz ədalətdən danışırsa, demək dünyanın düzəni pozulmuşdur!

*Hər gün ürəyimlə danışıram mən,

Mən ondan gileyli, o da ki, məndən.

*Ciddi-cəhdlə gözə soxulmaq istəyənlərin payı bir sümükdən artıq ola bilməz.