Təsdiq edilmişdir Azərbaycan Respublikası Dövlət Gömrük Komitəsinin apardığı reyestrə daxil olmaq üçün banklar və bank olmayan kredit təşkilatlarının müraciətlərinə baxılması qaydasi

4. Reyestrə daxil edilmiş kredit təşkilatının vəzifələri və məsuliyyəti
4.1. Reyestrə daxil edilmiş kredit təşkilatı aşağıdakı vəzifələri daşıyır:

4.1.1. borclu şəxs bank qarantiyası ilə təmin edilmiş gömrük borclarını vaxtında ödəmədikdə, gömrük orqanının təqdim etdiyi hesaba əsasən bank qarantiyası ilə təmin etdiyi məbləği 10 (on) iş günü müddətində öz vəsaiti hesabına ödəmək;

4.1.2. hər rüb üzrə növbəti rübün ikinci ayının 1-dən gec olmayaraq, prudensial normativlərin yerinə yetirilməsi barədə məlumatı Komitəyə təqdim etmək;

4.1.3. Mərkəzi Bankın müəyyən etdiyi hesabat müddətindən 10 (on) iş günü ərzində özünün illik balansını Komitəyə təqdim etmək.

4.2. Ləğv edilən və ya yenidən təşkil edilən, lisenziyası ləğv edilən, yaxud bank qarantiyası üzrə öhdəliklərini yerinə yetirməyən kredit təşkilatları Gömrük Məcəlləsinin 261.4-cü maddəsinə əsasən, Komitənin qərarı ilə Reyestrdən çıxarılır və bu barədə kredit təşkilatına məlumat verilir (6 nömrəli əlavə). Bu zaman Reyestrə daxil olmaq üçün ödənilmiş yığım Gömrük Məcəlləsinin 261.5-ci maddəsinə əsasən geri qaytarılmır.

4.3. Komitə kredit təşkilatının Reyestrdən çıxarılması barədə 3 (üç) iş günü ərzində Mərkəzi Banka yazılı məlumat verir.

4.4. Kredit təşkilatı Reyestrdən çıxarılan günə qədər təqdim etdiyi qarantiya üzrə öhdəliklərinin tam və vaxtında icrasına görə məsuliyyət daşıyır.