Thutan vaihomho

Thutan vaihomho

Jdg 1:1 Joshua thi nungin Israelten Pakai henga, “Canaan mite sat dia kalah-uva koi phung kon masapen ding ham?” tin adongui.

Jdg 1:2 Pakaiyin, “Judah phung kon masa diu ahi. Judah phung hi hiche gama thaneina kapeh ahitai,” ahinti.
Jdg 1:3 Judah phungin Simeon phung jah a, “Eikipeu gamsunga konbomu hitin, Canaan mite gasat khomu hite. Chuteng nangho kipe gamsunga jong keiho to konkhom naute,” atiuve. Hijeh chun Simeon phung le
Jdg 1:4 Judah phung gal akonkhom’un, Pakaiyin Canaan mite le Periz mite, pasal sangsom jen, Bezek mun a ajosah-un ahi.
Jdg 1:5 Hikoma chun Adonibezek amudoh-un, akisat piule,
Jdg 1:6 ajamin, adel’un agamatdoh phat’un akhut le akeng khopi jung jouse atanpeh tauve.
Jdg 1:7 Adonibezek-in, “Khut le keng khopi tansa cheh leng som sagin kadokhang noiya anmal akilo jiuvin, tun mi kabolna bangin Pathenin eiboltai,” ati. Jerusalema ahin kailut’in hikoma chun athidentai.
Jdg 1:8 Judah miten Jerusalem adelkhum’un alatauve. Khosung mite athat’un, kho ahaltauve.
Jdg 1:9 Hiche nung hin thinglhang gamsung le thinglhangbul dunga chule lhanglam gamgo lah a cheng, Canaan mite asat sat jengui.
Jdg 1:10 Kiriath Arba kitiji, Hebron khopi a cheng Canaan mite sat din akitol tauve. Chukoma cheng Sheshai le Ahiman chule Talmai phung kailhah chengse ahinjouvui.
Jdg 1:11 Hebron a pat Judah miten chupet a Kiriath Sepher kiti, Debir khopi adelkhumtauve.
Jdg 1:12 Alah-uva Caleb-in, “Kiriath Sepher khopi lajoupen pen kachanu Achsah to kichensah inge,” ati.
Jdg 1:13 Caleb naopa Kenaz chapa Othniel’in khopi chu ajouvin, hijeh chun Caleb-in achanu Achsah to akichensah tai.
Jdg 1:14 Akigop ni lhonin Othniel’in ajinu chu apa koma loumun thum din asol’e. Amanu touna sa-ngan chunga kona ahung kumlhah le, ipi deicha ahi ding Caleb-in anadonge.
Jdg 1:15 Amanun, “Twikul phabep kadeiye. Gam neipeh khu gamgo lah jeng ahi,” ati. Hijeh chun Caleb-in twinah chungnung le noinung apetai.
Jdg 1:16 Mose nupapa, Ken mipa chilhah ho chu, lusulei khopi, Jerichoa pat Judah phung mite to lhonin Judah gamsung Arad lhanglam, gamgo lah ajontauve. Hikoma hin Amalek mite lah a achengui.
Jdg 1:17 Judah phung mite le Simeon phung mite akonun Zephath khopia cheng Canaan mite agajou tauve. Khopi agaosap’un, asumanguvin, amin jong Hormah asah tauve.
Jdg 1:18 Pakaiyin Judahte apanpin, hijeh chun thinglhang gamsung alatauve. Gaza le Ashkelon ahiloule Ekron khopi te ni le akimvel dung gam ho alajou pouve.
Jdg 1:19 Twikhanglen pang dunga chengte hin thih kangtalai jeng aneiyun, hijeh chun Judahten adeldoh jou pouve.
Jdg 1:20 Mose thupeh dungjuiyin Hebron khopi chu, Anak chilhah phung khai thumjen khopia kona nodoh, Caleb apetauve.
Jdg 1:21 Benjamin phung sung miten vang Jeresalema cheng Jebus mite anodoh dauvin, hichea pat chun Jebus mite jong Benjamin miho to achenghal tauve.
Jdg 1:22 Ephraim phungle Manasseh phung chu, chuche pet’a Luz kiti, Bethel khopi delkhum din akontauve.
Jdg 1:23 Pakaiyin apanpiuvin, amahon jong khopi sung ve-lhi ding mi alha lut’un,
Jdg 1:24 hichea chun khosunga hung potdoh khat amu’vin, “Khopi sunga lutje neihil leu chun suse pouvinge,” atiuve.
Jdg 1:25 Hijeh chun Ephraim phung mite le Manasseh phung miten khosunga mihem jouse athat’un, hichepa chule a-insung mite bou ahoiyui.
Jdg 1:26 Khonungin hichepa hi Hit mite gamsunga achen, khopi khat aphutdoh-in amin Luz asah-in, tuni geiyin hiti chun akiminvoi.
Jdg 1:27 Manasseh phung miten Beth-Shan, Taanach, Dor, Ibleam, Megiddo, chule naivel khoneo dunga cheng miho anodoh pouvin, hikom dunga hin Canaan mite acheng jinguve.
Jdg 1:28 Israelte athanei cheh cheh phat’un, Canaan mite chu natongin agoiyun, ahivangin adeldoh deh pouve.
Jdg 1:29 Gezer khopia cheng Canaan mite jong chu Ephraim phung miten adeldoh pouvin, hijeh hin hikoma hin Canaan mite amaho to achengkhom jingui.
Jdg 1:30 Kitron le Nahalal khopite nia cheng miho chu Zebulun phungin jong adeldoh pouvin, hijeh chun Canaan mite alah-uva acheng jingun, amavang elbolna na atohsah tauve.
Jdg 1:31 Asher phungin jong Acco le Sidon, Ahlab, Achzib, Helbah, Aphek chule Rehob khopi hoa cheng mite chu anodoh pouve.
Jdg 1:32 Anodoh loujeh-un, Asher phung chu akhonei Canaan mite to achengkhom tauve.
Jdg 1:33 Beth Shemesh le Bethanath khopite nia cheng miho chu Naphtali phungin jong adeldoh pouve. Naphtali phungin khosunga cheng Canaan mite achenkhom piuvin, elbolna na vang atohsah-ui.
Jdg 1:34 Amor miten Dan phung sung mite thinglhang gamsunga adel lut’un, phaicham aphahsah tapouve.
Jdg 1:35 Amor mite chu Aijalon le Shaalbim chule Heres molsanga acheng jingun, ahivangin Ephraim phungle Manasseh phungin achunguva vai ahom’un, elbolna na atohsah-uve.
Jdg 1:36 Sela sahlam, Edom mite gamgin Akrabbim lhanglam ajot’e.
Jdg 2:1 Gilgal a pat Bochim geiyin Pakai Vantil achen Israelte jah a, “Egypt gama pat kahin puidoh-uva, napu napateu kateppehna gamsung kahinlhut nahitauve. Keiman, ‘Nangho to kakitepna sukeh hih hel inge.
Jdg 2:2 Hiche gamsung mite to kitepna nasem thei louhel diu ahi. Amaicham jouseu naphet lhah diu ahi,’ tin kaseiye. Ahinla kasei nabol pouve. Akaleh beh-in thil naboltauve!
Jdg 2:3 Hijeh a chu nakitol tengu jongle hiche mite hi nodoh peh pouvinge. Nagal’uva pang diu, a-pathen houvu khu kipal lhuh lona nanei diu ahi,” ati.
Jdg 2:4 Vantil’in hitia thu aseiphat hin Israelte akap pantauve.
Jdg 2:5 Hijeh a chu hichelai hi Bochim kisah lo ahitai. Hikoma hin Pakai henga kilhaina tampi abol’uve.
Jdg 2:6 Joshuan Israelte asolpai paiyin, amichang cheh-in achan diu gamsung akilah cheh tauve.
Jdg 2:7 Joshua hinlai damsungin Israelten Pakai kin abol’un, Joshua thi nungin jong Israelte dia Pakai thilbol nasa tah tah musa lamkai ho hinlaisen Pakai kin abol jom jing nauve.
Jdg 2:8 Nun chapa, Pakai lhachapu Joshua chu kum jakhat le som khat alhinin athitai.
Jdg 2:9 Along chu ama gamsungma ma, Gaash molsang sahlam, Ephraim thinglhang gamsung, Timnath Serah a avuitauve.
Jdg 2:10 Chuche khang mite athisoh tauvin, aban kit khangin Israelte dia Pakai thilbol asumil tauve.
Jdg 2:11 Pakai dounan Israelte achonseuvin, Baal doi kinbol’in apangtauve.
Jdg 2:12 Pakai, apu apateu Pathen, Egypt a kona hinpuidoh a Pathen hou atangun, akimvel’uva chengte pathen ho pou ahoutauve. Hicheho pou koma abohkhup’un, Pakai aphin lung hangui.
Jdg 2:13 Pakai hou haiyin, Baal doiho le Astarte doiho pou ahouvui.
Jdg 2:14 Hijeh chun Israel chunga Pakai alung hangtan, achomgam diuvin min adelkhum’ui. Pakaiyin akimvel’uva chengte ajothosah-in, hijeh chun Israelte akivengtup jou tapouve.
Jdg 2:15 Gal akon chan’un, akitepna sa bangin, Pakai adouvun apangtan, Israelte alung hesoh lheh jengtauve.
Jdg 2:16 Hijong chun adelkhumteuva kona huhdoh din Israelte lamkai ding Pakaiyin apei.
Jdg 2:17 Ahivangin Israelten lamkaite thu angaipouve. Pakai tahsan louvin, pathen chom chom ahouvui. Apu apateu vangin Pakai thupeh anit nauvin, hiche khangthahte hin chutin abol pouve.
Jdg 2:18 Pakaiyin Israelte lamkai ding apeh laisen, lamkai khang sungin amelmateuva kona huhdoh din Pakaiyin akithopi jinge. Mi bol gentheina le thoh hahsa kap le maova aum tengu Pakaiyin ahepiji.
Jdg 2:19 Lamkai thitih tih le mipi achon ngaiyin achon jiuvin, khang masa sangin akhoh cheh jiuve. Chonset bolle thilse lamjot tang louvin, pathen chom houvin, akin aboljiuve.
Jdg 2:20 Chuteng Israel chunga Pakai alung hangin, “Anit cheh diuva apu apateu kapeh kitepna chu hiche nam miten anit pouve. Kathu angai loujeh-un
Jdg 2:21 Joshua thigeiya gamsunga cheng, nodoh lou nam mite chu nodoh taponge.
Jdg 2:22 Hiche namdang ho hi Israelten, apu apateu banga kasei anit le nit lou kholtohna kamanchah ding ahi,” ati.
Jdg 2:23 Hijeh chun hiche nam mite chu Pakaiyin gamsunga achensah tai; Joshua jeng jong ajosah pon, Joshua thi nungin jong amaho chu adeldoh poi.
Jdg 3:1 Hitobang hin Canaan gamsung gal bolchaisoh loulai Israelte khol tohna din Pakaiyin gamsunga namdang phabep akhendentai.
Jdg 3:2 Hitia abol hi Israelte galbolna pang khalouhel ho galbolje hil themna dia jong akoi ahi.
Jdg 3:3 Gamsunga gal kichuhna dia kihoi chu Philistinete khopi nga le Canaan mite abonchau, Sidon mite, Lebanon lhang, Baal molsanga pat Hamath lhanglam geiya cheng Hiv mite jouse ahiuve.
Jdg 3:4 Pakaiyin apu apateu dia Mose aseipeh thupeh chengse Israelten anit le anit louvu photchetna dia nam hicheng chu Israel patepna kikhenden ahi.
Jdg 3:5 Hiti hin Canaan mite, Hit mite, Amor mite, Periz mite, Hiv mite chule Jebus mite lah a Israelte acheng thangtauve.
Jdg 3:6 Amaho chutoh akijongtouvin, ahouvu doiho geiyin ahoutauve.
Jdg 3:7 Israelten Pakai a-Pathenu asumil tauve; Pathen dounan achonseuvin, Baal doi le Asherah doi ahouvui.
Jdg 3:8 Hijeh chun Israel chunga Pakai alung hangin, hijeh chun Mesopotamia leng Cushan Rishathaim chun Israel ajouvin, kumget sungin achunguva vai ahomtai.
Jdg 3:9 Chutah chun Pakai henga Israelte othongin ataovun, Aman pasal khat mangchan amaho ajalensah tai. Hichepa hi Caleb naopa Kenaz chapa Othniel ahi.
Jdg 3:10 Othniel chunga Pakai- Lhaga’o apansan, Israel lamkaiyin apangtai. Othniel gal akonle, Pakaiyin Mesopotamia lengpa geiyin ajosah-e.
Jdg 3:11 Kum somli jen gamsunga cham alengin, chuin Othniel athitai.
Jdg 3:12 Pakai dounan Israelte achonse kittauve. Hijeh chun Moab lengpa Eglon chu Pakaiyin Israel sangin ahatsahjo tai.
Jdg 3:13 Eglon chu Ammon mite le Amalek mite to akithon, Israel ajouvun, Jericho, tumphai khopi chu atouphatauve.
Jdg 3:14 Kum somle get sungin Eglon noiya Israelte asoh changtauve.
Jdg 3:15 Pakai henga Israelte othonga ataovule, jalensah din Aman pasal khat a solpeh-e. Hichepa hi Ehud khut veilongpa, Benjamin phunga Gera chapa ahi. Israelten Ehud hi peh ding thil tampi pumin, Moab lengpa Eglon henga asol’ui.
Jdg 3:16 Ehud hin hemto chemjam tong chan bep khat akikhenin, akhel jetlam, pon noiya akoi.
Jdg 3:17 Ehud-in peh ding thil ho chu, mithaotah Eglon chu apei.
Jdg 3:18 Peh dingdol thil apeh jouvin, Ehud hin thilpo ho in lam a kile kit din asoltai.
Jdg 3:19 Ehud vang chu Gilgal kom, song kijempol laiya chun Eglon heng ajonkit’in, “Vo Lalchungnung, seipeh ding thuguh khat kaneiye,” agati. Hijeh chun lengpa Eglonin asohte jah a, “Keini bou dalhan potdoh cheh-un!” atile, abonchan apotdoh tauve.
Jdg 3:20 Lengpa chu inchung dap lai, indan a achangseh-in atouvin, Ehud-in anailut’in, “Pathena kon seipeh ding khat kaneiye,” atile; lengpa adingdoh tai.
Jdg 3:21 Akhel jetlama akoi chemjam hemto chu Ehud-in asatdoh-in, lengpa oipoh adotlut jenge.
Jdg 3:22 Chemjam chu akung geiyin alut lhumin, athaovin atomjol dentai. Chemjam chu Ehud-in dodoh louva akoiden le, atungtun lam, akengte ni kah a apaiye.
Jdg 3:23 Ehud apotdoh-in, kot alekamdenin, kanglong aheh denin
Jdg 3:24 adalhai. Lengpa sohten kot kikama kanglong hehsa ahung mu’vin, insunga lengpa choldo danin agel bep’ui.
Jdg 3:25 Nga thei chanin a-ngah-un, kot ahondoh louhel phat’in, kanglong laa aheh hong jengule, apupau la lhonglaiya longdamsan akijamtai.
Jdg 3:26 Sohhon apupau anga kah-un Ehud akithol mangtai. Song kijempol kho kal’in, Seirah geiyin ajamtai.
Jdg 3:27 Ephraim thinglhang gam aphah chun, galsat’in Israelte kouna sumkon amut’e. Israelte chu thinglhang gama konin apuisuh-in,
Jdg 3:28 ajah-uva, “Neihin juiyun, nagalteu Moab mite chu Pakaiyin najosah diu ahitai,” ati. Israelten Ehud ajuisuh-un, Moab miten Jordan lui apalna diu mun atouphauvin, mihem khatcha jong agalkaisah pouve.
Jdg 3:29 Hiche nikho hin Israelten Moab sepai phalai cheh sang som tobang athat’un, khatcha ajamdohsah pouve.
Jdg 3:30 Hiche ni hin Israelten Moab miho ajouvun, chukal kum somget sungin gamsunga cham alengtai.
Jdg 3:31 Aban a lamkai chu Anath chapa Shamgar ahi. Amahin bongchal khagu mangin Philistine mite jagup jen athat’e.
Jdg 4:1 Ehud thi nungin Pakai dounan Israelte achonse kit tauve.
Jdg 4:2 Hijeh chun Hazor khopia vaipo, Canaan lengpa, Jabin chu Pakaiyin Israel ajosah tai. Jabin sepai lamkaipipu chu Sisera ahin, chidang namdangte khopi, Harosheth a cheng ahi.
Jdg 4:3 Jabinin sakol kangtalai jako jen aneiyin, engse tah le gilou tah-in, kum somni sungin Israelte chunga vai ahom’e. Hichun panpi ngai chan Israelte Pakai henga othongin ataovui.
Jdg 4:4 Lappidoth jinu Deborah chu Themgao ahin, hiche lai hin Israelte thutanin apangin ahi.
Jdg 4:5 Deborah hi Ephraim thinglhang gamsung, Ramah le Bethel kah, tumphung noi khat’a atou jin, athuu tansah din Israelte Deborah henga achejiuve.
Jdg 4:6 Nikhat chu Deborah hin, Naphtali gamsung, Kedesh khopia Abinoam chapa Barak agakousah-in, “Pakai, Israel Pathen chun hita naseipeh ahi: ‘Naphtali le Zebulun phung sung pasal sangsom puiyin Tabor molsanga cheuvin.
Jdg 4:7 Jabin sepai lamkai pipu Sisera hinpui ying ting, Kishon luidunga kasat sah diu ahi. Sakol kangtalai jouse le sepai chengse to hung kon ding, ahivanga nangho kajosah diu ahibouve,’ tin aseiye,” ati.
Jdg 4:8 Barak-in, “Neilhonpi dingle kon ing ting, neilhonpi lou ding vangle kon ponge,” ati.
Jdg 4:9 Deborah-in, “Ahile lhonpi nange, amavang galjo chu min phatpi pon nate, ajeh chu Pakaiyin Sisera chu numei khat athasah ding ahi,” ati. Hiti hin Deborah chu Kedesh jonin Barak to alhontai.
Jdg 4:10 Kedesh khopi nokhum din, Zebulun le Naphtali phung mi sangsom puiyin Barak akontai. Deborah-in alhonpi.
Jdg 4:11 Ken mi Heberin Kedesh kho kom, Zanannim kiti lai, gangpi phung kom a ponbuh songin ngahmun asem’e. Mose nupa pa Hobab chilhah Ken mite adang hoa konin Heber hi akitumseptai.
Jdg 4:12 Barak-in Tabor molsang lam ajottou ahet phat’in,
Jdg 4:13 Siseran jong sakol kangtalai jako le asepaite abonchan akouvin, chidang namdangte khopi Harosheth a pat Kishon luidung lama asoltai.
Jdg 4:14 Chutah chun Deborah-in Barak jah a, “Chetan! Pakaiyin nalamkaiye! Tunia Sisera najosah ding ahitai,” ati. Hijeh hin Barak-in asepaite pasal sangsom puiyin Tabor molsanga konin ahung kitolsuh tauve.
Jdg 4:15 Barak le asepaiten anokhum phat’un, Pakaiyin Sisera le akangtalai jouse chule amite asuhnoh phah peh tan, Sisera jeng jong kangtalaiya konin achomlhan, kengin ajamtai.
Jdg 4:16 Barak-in kangtalai ho le melma sepaite chu chidang namdangte khopi, Harosheth geiyin adel’in, Sisera sepaite athatgamtai. Pasal khatcha jong ahinghoi poi.
Jdg 4:17 Hazor lengpa Jabin le Heber insung mite kihou thei jeh-in, Sisera chu Ken mi Heber jinu Jael ponbuh sunga alhailut’e.
Jdg 4:18 Sisera lamton Jael apotdoh-in, “Hungin kapu, kaponbuh sunga hung lut’in, kicha hih-in,” ati. Hijeh chun Sisera alut’in, Jael’in pondal sunga aseltai.
Jdg 4:19 Siseran Jael jah a, “Kadang achah-e, twi neipen,” ati. Amanun savun peng khat ahongdoh-in, bongnoi don din apen, asel kittai.
Jdg 4:20 Siseran Jael koma, “Ponbuh kotbul’a gadingin, khattou hung vah lut kham tia dong aumle, ahungpoi tin,” ati.
Jdg 4:21 Achol behseh jeh-in Sisera a-ihmudentai. Hichun Jael’in sehcha khat le khoilupon khaina thingkil khat alan, kang chan anailut’in, thingkil chu angeisip lang khat’a akhenlut’in tol to akilmat’in athattai.
Jdg 4:22 Barak-in Sisera ahung hoi phat’in, Jael apotdoh-in, “Hungin, naholpa chu vetsah inge,” agati. Barak-in ajuilut le, Sisera chu athisan tol’a akijamin, thingkil chun aluchang adotpaiye.
Jdg 4:23 Hiche nikho hin Pathenin Canaan lengpa Jabin chunga Israelte gal ajosah-e.
Jdg 4:24 Israelten aha nocheh ahanocheh jengun, asuhmang soh geiyun anouve.
Jdg 5:1 Hiche nikho hin Deborah le Abinoam chapa Barak-in hitin la asa lhon’e:
Jdg 5:2 Pakai thangvah-un! Galsat ding Israelte a-ngamtauve, Japi acham chamin akipedoh jengui.
Jdg 5:3 Ngaiyuvin leng hon! Gelkhoh-un vaibolten! Tumging to thon la sange, Pakai Israel Pathen vahchoi nan!
Jdg 5:4 Vo Pakai, Seir molsang ho nadalhah a, Edom gamkaiya napotdoh chun; Leiset kilingin go aju jenge. Ahi, meilom lah a konin gotwi alhai.
Jdg 5:5 Molsang jouse akilingtai Sinai Pakai, Pakai, Israel Pathen angsunga!
Jdg 5:6 Anath chapa Shamgar le Jael hat laiyin, Kholjin nom jouse atangin, Khol lamlengle jong Lampel a acheuve.
Jdg 5:7 Vo Deborah, Israel nua nahung pan masangin, Israel khopi jouse min ajamsanin, Ahomkeo jengin akijamlnuve.
Jdg 5:8 Israelten pathen chom chom ahoujeh-un Gamsunga gal alangtan; Israel pasal sang somli jen, Lum neiya le teng choiya koi ham?
Jdg 5:9 Kalung gil’in Israel gal lamkaite panpin, Acham chama kipedoh jengho kahui. Thangvah-un Pakai!
Jdg 5:10 Seichoi leuvin sa-ngan kang chung, Toupha hoitah tah chunga tou ho! Lamlhah dunga vahle jousen jong.
Jdg 5:11 Twikul vel dunga kikhom japin ngaiyun, Pakai galjo seichoile ho, Israelte galjo seile ho! Akhopiuva konin Pakai mite akitolsuh tauve.
Jdg 5:12 Lamkaiyin Deborah, lamkaiyin! Lamkaiyin, la san, lamkaiyin! Manon, Abinoam chapa Barak, Gal-hing nakaiho kaimangin!
Jdg 5:13 Tahsan um miten lamkaite ni ahin jonsuh-un, Pakai mite galsat din Ahenga ahung kikhom’ui.
Jdg 5:14 Ephraim gama pat phaicham a ahungun, Benjamin phung, amite nunga ahung kitol’ui. Machir a pat gal lamkaite akitolsuh-un, Zebulun a konin vaipote ahungui.
Jdg 5:15 Issachar lamkaite Deborah to ahung lhonun, Issachar le Barak jong ahung lhon’e; Phaicham geiyin ahin juisuh peh-ui. Reuben phung vang akikehsouvin, Hoilamjoh jot ding ahethei tapouve.
Jdg 5:16 Ibol’a kelngoite to umden hiuva, Kelngoi chingte kelngoi kougin ngai hiuvam? Reuben phung akihom khen’un, Hoilam jot ding ahetapouve.
Jdg 5:17 Gad phung Jordan luigal solam a aumden’un, Dan phung kong innei hoa aumtauve. Asher phung Twikhanglen panga aum den’un, Twikhanglen panga akigoltauve.
Jdg 5:18 Zebulun le Naphtali phung mite vang Thi ngam in galmuna apangui.
Jdg 5:19 Taanach mun, Megiddo luipanga Leng jouse akisat’un; Canaan lengten gal asat’un, Dangka khatcha jong alajou pouve.
Jdg 5:20 Vanthamjol’a ahsiten gal abol’un, Sisera dounan vanlaijol’a kon gal asat’uve.
Jdg 5:21 Kishon lui twipin alhoh mangun, Kishon vadung twi kinongin apomangtauve. Huham tah a kitol tol jeng ding kahitai!
Jdg 5:22 Sakolte leithong nimin ahung lhaiyun, Atin’un tol atat nimdep dup’uve.
Jdg 5:23 Pakai Vantil’in, “Meroz kho gaosap’un, Akhoa cheng jouse gaosap chang hen. Pakai panpin ahung kondauvin, Gal satpeh sepai kon atho pouve,” ati.
Jdg 5:24 Nunnompen numei Jael, Ken mi Heber jinu! Ponbuh song numei lah a Nunnompen numei!
Jdg 5:25 Siseran twi’athumle bongnoi apei; Khon hoitah a bongnoi lhum apei.
Jdg 5:26 Khoilupon khaina thih hem khut khat’a choiyin, Khut lang khat’in sehcha achoiye; Sisera akhen beh-in lubuh akhenvange; Aluchang akhenvang hel’e.
Jdg 5:27 Sisera akidil denin, Jael kengbul’a akijamtai. Jael kengbul a kidi’in alumin, Tol’a kileh lhan athitai.
Jdg 5:28 Anun bangkot’a Sisera akailhit jingin, Bang vangkah a ave-lhi jinge. “Idia akangtaiai hitigei hiya, Asakolte hung kilevah lou hitam?” ati.
Jdg 5:29 Numei lal chingthem hon anu adonbut’un, Aman avel vel’in aseiyin;
Jdg 5:30 “Kihom hom ding thil chom kichu’va, Sepai khat nu-ngah khat le ni gei chan ding, Sisera ding ponsil tampi, Lengnun ngongveiya anei ding kijempah leh ho,” atiuve.
Jdg 5:31 O Pakai, namelmate hitobang chun thi cheh hen, Nagol napaite vang ninou soh bangin vahsel hen! Kum somli sungin gamsunga cham aleng’e.
Jdg 6:1 Pakai dounan Israelte achonse kit tauvin, hijeh chun Aman kum sagi sungin achunguva Midian mite vai apohsah tai.
Jdg 6:2 Israelte sanga Midiante ahatjoh phat’in, Israelte songko dungle thinglhang gamsung alhavang lai laiya akisel tauve.
Jdg 6:3 Israelten muchi atujongle, Midiante le Amalekte chule nelgam a chengte ahung kon’un adelkhumji tauve.
Jdg 6:4 Ahung kon’un ngahmun asemden’un, gamsunga anche louhing, changle mim jouse asugam’un, lhanglam Gaza geiyin asuhgam peh jiuve. Kelngoite
Jdg 6:5 Abongteu le ponbuh chengse pumin, khaokhote kitol thon ahungjiuve. Mihem le sangongsan’g ho simsen ahipouve. Gamsung ahung nechaihel jiuvin,
Jdg 6:6 Israelten alonaje him him ahetapouve.
Jdg 6:7 Midian mite dounaa apanpi diuvin Israelte othongin Pakai henga ataovun,
Jdg 6:8 Pakaiyin adiuvin Themgao ahinsol’in, amahin Pakai Israel Pathena kon thu ahinpon: “Nasohchan nau Egypt a kahinpuidoh-un,
Jdg 6:9 Egypt mitea konin kachu lhauvin, chule hiche gamsung mite nadouvuva pangtea konin jong kahuhdoh-ui. Namasanguva kadeljamsoh keiyin, agamsungu nangho kapei.
Jdg 6:10 Kei Pakai na-Pathenu kahi, nachen nau gampute, Amor mite pathen semthuho hou lou dia kaseipehsa nahiuve. Ahivangin kasei nangaipouve,” ati.
Jdg 6:11 Pakai Vantil chu Ophrah khoa ahungin, Abiezer phunga mi Joash gangpi phung noiya atouve. Achapa Gideon hin Midian miho mu louna din guh thim chan changphol’a suhlou chang achil’e.
Jdg 6:12 Gideon henga Pakai Vantil chu akilah-in, “Vo mihang mithahat, Pakaiyin naumpi!” agati.
Jdg 6:13 Gideonin Vantil jah a, “Pu, Pakaiyin eiumpiu le thilse hijat pin iti eilhunden thei diu ham kati thei dem? Kapu kapateuvin Pakai thilbol kidang datmo chujat aseiyu chu hoilam hita, itobang tah a Egypt a kona ahinpuidoh-u aseiyu chu hoiba hitam? Pakaiyin eidondauva, Midianho kichepna dia eikoiyu ahitai,” ati.
Jdg 6:14 Hichun Pakaiyin, “Nathahat laiyin konin, Midiante khut’a kon chun Israelte gahuhdoh tang-em. Ken kasol nahichu me,” ati.
Jdg 6:15 Gideonin, “Ken iti Israel kahuhdoh jou ding ham? Ka-insung la Manasseh phunga alhachompen, keila ka-insunga imacha hilou pen kahi,” ati.
Jdg 6:16 Pakaiyin, “Kapanpi dingjeh a najotei ding ahi. Midiante chu pasal khatseh bol’a nabol’a nasuhgep jeng ding ahi,” ati.
Jdg 6:17 Gideonin, “Neinoppeh le, Pakai tahbeh nahi photchetna neimusah-in.
Jdg 6:18 Chule neh le chah thilto kapeh masangin neidalha hih-in,” ati. Pakaiyin, “Nahung kile kit kah-in ngah nange,” ati.
Jdg 6:19 Gideon ina acheloiyin, kelgol khat athat’in, changbong neldisel kilogram som, cholsolouvin changlhah asemin, kelsa le changlhah chu pochan ahindomin, satwi jong bel khat’in ahindomin, gangpi phung noiya Pakai Vantil chu apei.
Jdg 6:20 Vantil chun, “Sa le changlhah chu hiche songpi chunga hin koiyin, chule satwi chap khumin,” ati. Gideonin chut in aboltai.
Jdg 6:21 Hichun Pakai Vantil’in sa le changlhah chu tenggol mongin athaiye. Chutah-in songpia konin mei ahung kouvin sa le changlhah chu ahalvamtai. Chujouvin Vantil amangtai.
Jdg 6:22 Amu chu Pakai Vantil ahi ahedoh-in, atija behseh jengin Gideonin, “Vo thanei chungnungpen Pakai, Na-Vantil to kimaiton kakihou lhontai!” ati.
Jdg 6:23 Pakaiyin ajah a, “Kicha hih-in, lung mongin, thipon nate,” ati.
Jdg 6:24 Hikoma hin Gideonin Pakai minin maicham khat asemin, “Pakai chu lungmonna Pakai ahi,” tin aminvoi. Hiche maicham chu tuni geiyin Abiezer insung mite gamsung, Ophrah a aum nalaiye.
Jdg 6:25 Hiche jan hin Pakaiyin Gideon jah a, “Napa bongchal le kum sagi lhingsa bongchal chom khat kaiyin, napan Baal houna maicham asem chu vochimin, maicham koma Asherah pathennu lim kisem jong chu sat lhun.
Jdg 6:26 Hiche vuma hin Pakai na-Pathen din maicham hoisel’in semin. Chutengle nasat lhuhsa Asherah pathennu lim chu thingin mangin, bongchal nina chu pumgo thilto din apumin gouvamin,” ati.
Jdg 6:27 Alhacha mi som khat apuiyin, Pakai hil bang bangin Gideonin agaboltai. A-insung mite le khosung mite mitmua sun laiya bol ding kichatjeh-in, jan laiyin abol’e.
Jdg 6:28 Kho mite jingpitah a athoule, Baal maicham kivochimle Asherah lim kisem kiphuh lhu amu’vin, maicham kisemthah a bongchal nina pumgo thiltoa kigouvam amudoh-uve.
Jdg 6:29 Akihouvun, “Koiham hiche bol’a hi?” akitiuve. Akhol toh-ule, Joash chapa Gideon bol anahi.
Jdg 6:30 Kho miten Joash jah a, “Nachapa hinkai doh-in katha diu ahi! Baal maicham avochimin, akoma kitung Asherah lim jong asat lhui,” atiuve.
Jdg 6:31 Ahindel khumho jah a Joash chun, “Baal huh a ama kithopia pang nahiuvem? Baal dinga pang jouse chu jingkah masanga tha ding ahi. Baal chu pathen ahinah le amale ama kihuh tah ta! Min avohchim chu ama maicham hichu me,” ati.
Jdg 6:32 Joash chun, “Baal chu amale ama kihuh tah ta, min avohchim chu ama maicham hichume,” atia pat Gideon chu Jerubbaal akitilo tai.