Thutan vaihomho

Jdg 6:33 Chuphat’in Midiante le Amalekte chule nelgama chengte jouse kikou khomin, Jordan lui galkaiyin, Jezreel phaichama ngahmun asem’ui.
Jdg 6:34 Gideon chunga Pakai Lhagao apansan, ama nungjui din Abiezer insung mite koukhomna din Gideonin sumkon amuttai.
Jdg 6:35 Manassehte gamsungse sea jong anungjui din mi akousah-e. Asher le Zebulun chule Naphtali phungse sea jong mi akousah le, anungjui din ahungtauve.
Jdg 6:36 Hichun Gideonin Pathen henga, “Israel huhdohna dia nei manchah din naseiye.
Jdg 6:37 Aphai, suhlou changphol a khun samulpon kaphai. Jingkah teng gaveng ting, tol kot louhel’a samulpon chung mai maiya daitwi akotle, Israel huhdohna manchah neigot phochen tange,” ati.
Jdg 6:38 Aseibang bangin asoh tah bah-e. Ajing jingkah matah-in Gideon athouvin, samulpon a daitwi aheh lhah le khon khat adimset’e.
Jdg 6:39 Hichun Gideonin Pathen koma, “Lung hang hih-in, khatvei seikit tadinge. Hiche samulpon hin phun san kit tadinge. Tuvang samulpon hi gotsah-in lang, tol joh kotsah-in,” ati.
Jdg 6:40 Hiche jan chun Pathenin hiti mong chun anabol’e. Ajing jingkah-in samulpon agoset’in, tol chu daitwi akotsoh hel’e.
Jdg 7:1 Nikhat Gideonle amite jingpi tah-in athouvun Harod twinah koma ngahmun asem’ui. Midiante ngahmun chu asah lamu phaicham Moreh thinglhangbul ahi.
Jdg 7:2 Pakaiyin Gideon jah a, “Midiante chunga gal josah din nalhonpi mihem atam behseh-e. Ajole athahat’uva galjouvin kiseiyuntin, Kei josah a aseida lo diu ahi.
Jdg 7:3 Mipi jah din, ‘Gal a kicha chan inlama kile kit hen, adangse Gilead molsanga geh-u hite,’ tin seiyin,” ati. Hichea hin mihem sang somni akile kit’un, sangsom seh bou adalhauve.
Jdg 7:4 Pakaiyin Gideon jah a asei kit’in, “Namite atam behseh nalaiye. Luidunga puilhan, hikoma chun lhengkhen tange. Nalhonpi dia kasei sei chu kon diu, nakonpi dia kaseilou chu kon lou ding ahi,” ati.
Jdg 7:5 Miho chu Gideonin luidunga apuilhah le, Pakaiyin a jah a, “Uicha twile banga leiya twi lethose se le bohkhup’a twi chip those se sepkhenin,” ati.
Jdg 7:6 Asekhenle khut’a twi sohdoh a letho mihem jathum bou ahiuvin, adangsen vang bohkhup’in achip thouve.
Jdg 7:7 Pakaiyin Gideon jah a, “Hiche twi letho mihem jathumle nang huhdoh ing ting, Midiante chunga gal kajosah ding nahiuve,” ati.
Jdg 7:8 Hijeh chun hiche jathum tilou Israel dang ho chu Gideonin inlama asoltai, jathum vang hin neh le chah chule sumkon achoiyui. Midiante ngahmun chu anoiyu phaicham lai ahi.
Jdg 7:9 Hiche jan chun Pakaiyin Gideon jah a, “Thouvun Midiante ngahmun delkhumin; kajosah ding nahitai.
Jdg 7:10 Na-ngamjep loule nalhacha Purah puiyin ngahmun khu gave-lhi lhonin.
Jdg 7:11 Hichea chun Midiante kihou jan natin, hansanlo na nanei ding, delkhum ding nangap ding ahi,” ati. Hiti hin Gideon le alhacha Purah chu melmate ngahmun pamchin chin geiyin agakumsuh lhon’e.
Jdg 7:12 Midiante le Amalekte chule nelgama chengte phaichama chun khaokhote jat aphauvin, sangongsang jeng jong Twikhanglen panga neldi jat ahi.
Jdg 7:13 Gideon ahung chun Midian mi khat’in agolpa mang aseipeh ajai. Aman, “Kamangin sakolchanga kisem changlhah tum khat i-ngahmun sunguva ahung kilih lut’in, ponbuh khat aseleh akiphamatsah jenge,” ati.
Jdg 7:14 Agolpan ma, “Hichu Israelte chemjam hemhat ding, Joash chapa Gideon hatna ding ahibouve! Imacha dang hi hih hel’inte! Midiante chung, chule sepai hijatpi chunga Pathenin Gideon gal ajosah ding ahitai!” ati.
Jdg 7:15 Hiche pa mang chule ipi kiseina ahi ding hilchetna ajahdoh hin Gideon bohkhup’in Pathen alhaitai. Israelte ngahmuna ahung kile kit’in, “Thouvun! Pakaiyin Median sepaite chunga gal najosah diu ahi tai!” tin aseiye.
Jdg 7:16 Amite jat hum chu hop thum in ahomin, mi khat cheh chu sumkon khat le meisel long khat cheh apen, asunga sallom athilpeh-in ahi.
Jdg 7:17 Amite jah a, “Ngahmun pamchin kaphah teng neiveuvin, kabol bol bol’un.
Jdg 7:18 Keile kalhonpi chengin sumkon kamut tengu, nanghon jong mut’un, ngahmun kimvel thongsoh hel’in ginsah-uvin, ‘Pakai le Gideon din sat’uvin! ‘tin sam’un,” ati.
Jdg 7:19 Phat chom khat nung, jan khangkim masangin, Gideon le aloite ngahmun pamchin ageitauvin, ngahmun ngah ho kikheljou tilcha ahi. Chutah-in Gideon le aloiten sumkon amut’un, achoiyu meisallong avokeh-un,
Jdg 7:20 chule loidang nin jong chutiman abol’ui. Khut veilamin meisel adeuvin, jetlama sumkon achoiyun, “Pakai le Gideon din chemjam pan’un!” tin asamtauve.
Jdg 7:21 Ngahmun kimvel’a chun ama ma panmun cheh a apangun, melmate sepaiho vang kale mao thon ajam jam jengui.
Jdg 7:22 Gideon sepaiten sumkon amut mut laiseuvin, Pakaiyin melma sepaite chu khat le khat akisatto sah-in, Zarethan lam jonin ajam’un, Beth Shittah gei, Tabbath kom, Abel Meholah geiyin ajam’uve.
Jdg 7:23 Hichun Naphtali le Asher phung, chule Manasseh phung bahte nia miho akoudoh-un, Midiante adelpeh-uve.
Jdg 7:24 Ephraim gamsung thinglhanga cheng jouse Gideonin agakousah-in, “Hung kitolsuh-un, Midiante hungsat’un. Jordan luile Bethbarah geiya vadung jouse ting tan’un, Midiante galkaisah dauvin,” ati. Ephraim mite akoukhom’un, Jordan lui atingun, Bethbarah geiya vadung jouse ating tantauve.
Jdg 7:25 Midian haosate ni, Oreb le Zeeb aman’un, Oreb songpi phunga Oreb athat’un, Zeeb changphol a Zeeb athat tauve. Midiante nung adelpeh-un, ahung kile phat’un Jordan gal nisolam a Gideon kom geiyin Oreb le Zeeb luchangte ni ahinpolut’ui.
Jdg 8:1 Ephraim miten Gideon jah a, “Midiante sat dia nakon a chu idia neitem dau ham? Idia hitia neibol’u ham?” atiuve. Hiti hin melse tah-in akiphin’uve.
Jdg 8:2 Gideonin, “Kei thilbol le nangho thilbol tekah thei ahinaisaipoi. Ephraim miten themcha nabol’u jong chu kaphung pumpiuva kabolsangun anasajoi.
Jdg 8:3 Ihitale Pathen thahat vanga Midiante haosa ni, Oreb le Zeeb geiya nathau chume. Chutobangto tepi thei ken ipi kaboljouvam?” ati. Hiche asei phat hin alung hang behseh tapouve.
Jdg 8:4 Hichepet hin Gideonle amite jathum chu Jordan lui ahung lhungun, gal jong agalkai tauve. Achol lheh tauvin, hijongle melmate nung adel del nalaiyui.
Jdg 8:5 Sukkoth ahung geiyun khomiho jah a Gideonin, “Lungset’in kamite neh ding changlhah phabep neipeuvin; achol behseh-un, ahivangin Midian lengte ni, Zebah le Zalmunna kadel del jeng ding ahinalaiye,” ati.
Jdg 8:6 Ahinla Sukkoth khosung lamkaiten, “Ibolpen a nasepaite neh le chah kapeh diu ham? Zebah le Zalmunna bon man lou laiya,” atiuve.
Jdg 8:7 Hijeh chun Gideonin, “Aphajenge! Pakaiyin Zebah le Zalmunna eimatsah teng, gammang lah a keh lingle khaova kajep diu nahi!’ ati.
Jdg 8:8 Penuel kho geiyin Gideon achen, akhomite koma asei bang chun aseikit’e. Ahinla Penuel kho miten jong Sukkoth kho mite seibang bangin aseiyuve.
Jdg 8:9 Hichun Gideon jong, “Hingle dama hung kile kit tei ding kahin, kahung teng nakhouva intingvum sang kavoh lhuh ding ahi!” ati.
Jdg 8:10 Zebah le Zalmunna chu asepaite to Karkor a aum lhon’e. Nelgam cheng sepai pumpi lah a sang somle sang nga tobang bou aumtan, sang jakhat le sang som ni tobang Israelten athat tauve.
Jdg 8:11 Gideonin Nobah le Jogbehah solam, nelgamgi chin a lamlen ajuiyin, Midian sepaite chu phulou helouvin adelkhumtai.
Jdg 8:12 Midiante lengte ni, Zebah le’ Zalmunna ajam lhonin, ahivangin Gideonin adel paiyin amatdoh phat’in asepai jouse lhon akicha lih paitauve.
Jdg 8:13 Galmuna pat Gideon ahung kile kit chun Heres lampi ahin hon,
Jdg 8:14 Sukkoth khoa golhang khat amanin thil umdol adonge. Gollhangpa hin Sukkoth khosunga lamkai cheh pasal som sagi le sagi min jih thon Gideon apei.
Jdg 8:15 Hichun Sukkoth kho mite henga Gideon achen, “Neikithopi nomlouvu chu nageldoh-um? Zebah le Zalmunna kamatdoh lou laijeh a kelthi dingkon kasepaite neh le chah pehda dia naseiyu chu nageldoh jingum? Veuvin kagamanin hikom kahin lhuttai!” ati.
Jdg 8:16 Chutah chun gammang lah a lingle khao achomkhomin, Sukkoth khosung lamkaiho jepnan aneitai.
Jdg 8:17 Penuel khopi intingvum jong avo lhun, khosung mite athattai.
Jdg 8:18 Chuin Gideonin Zebah le Zalmunna jah a, “Tabor a namitha lhon hoilama nakoi lhon ham?” ati. Amanin, “Nang bep bep ahiuvin, leng chapa cheh tobang ahiuve,” tin asei lhontai.
Jdg 8:19 Gideonin, “Nukhat lhah, kasopi jeng hiuva chu, amaho chu natha lhon lou hile that lhon hih hel inge,” ati.
Jdg 8:20 Chuin achapa lenpen Jether jah a, “Hichete ni khu gathat’in,” atile; achapanla chemjam alam ngamtapoi. Achapan behseh jeh-in akinomsot dentai.
Jdg 8:21 Chuphat’in Zebah le Zalmunnan jong, “Nangtah-in neithat lhonin. Pasal’in pasal kin bol ding ahi,” ati lhone. Hijeh chun Gideonin athat’in, sa-ngan ajepna lhon sum-eng ho geiyin akilah-e.
Jdg 8:22 Chujouvin Israelten Gideon jah a, “Nangle natu nachate kachunguva leng changtauvin. Midian mite khut’a kona neihuhdoh-u ahitai,” atiuve.
Jdg 8:23 Gideonin, “Kei hing kachapa hile nachunguva leng chang lhon ponge. Naleng diu Pakaibou ahi,” ati.
Jdg 8:24 Gideonin aseiben, “Thil khat dong unge. Nachomdoh-u sana bilba chengse chu neipeuvin,” ati. Ajeh chu nelgam cheng ho chonna dol’a Midianten jong sana bilba aba cheh-u ahi.
Jdg 8:25 Israelten, “Kipah tah-in peuvinge,” atiuve. Hiti chun pon aphauvin, sana bilba chomdoh jousen asep lhauve.
Jdg 8:26 Hichea sana bilba Gideon kilahse se chu kilogram som ni tobang leo agih-e, chule hiche lah a hin kijepna dangle khiho, Midiante von ponsandup ho, sa-ngongsaote ngongkol a kivei ho apang hih laiye.
Jdg 8:27 Sana bilba chengse hin Gideonin ompho khat asemin, akhopi, Ophrah a akoiye. Ahinla Israelten Pathen joh don talouvin, hiche sana ompho chu ahoulo tauvin, Gideonle ainsung mite din kipalna asoh tai.
Jdg 8:28 Hiti hin Israelten Midiante ajouvun, kichat ding ahetapouve. Kum somli sung, Gideon thi kahsen, gamsunga cham alenge.
Jdg 8:29 Gideon a-in lama achen chukoma apansatai.
Jdg 8:30 Ji tampi aneijeh-in, Gideon hin chapa som sagi aneiye.
Jdg 8:31 Shechem khoa jong thaikem khat aneiyin, hichenu hin chapa khat ahinpeh-in, Abimelech asah-e.
Jdg 8:32 Joash chapa Gideon hi ateh kembet’in athin, Abiezer phung mite khopi, Ophrah a apa Joash lhana avuitauve.
Jdg 8:33 Gideon thinungin Israelten Pathen dalhan Baal doiho pou ahouvun, pathena anei diuvin, kitepna-Baal akisem’ui.
Jdg 8:34 Hiti hin akimvel’uva cheng melmatea kona huhdoh a Pakai a-Pathenu ahouda tauve.
Jdg 8:35 Israelte dia thilpha chujat bolpeh a Gideon insung mite chunga akipah pouve.
Jdg 9:1 Gideon chapa Abimelech hi apute chenna Shechem khopi a achen, apute koma hi,
Jdg 9:2 Shechem kho mite jah a, “Gideon chapa som sagi noiya um ding nadeiyui, khatseh noiya um ding nadeiyum? Abimelech vang hi naphe navouvu ahi,” tisah din aseiye.
Jdg 9:3 Aputen Shechem kho mite koma hiti chun aseipeh-un, athisan’uva peng ahijeh-in, Shechem kho miten Abimelech joh jui din agotauve.
Jdg 9:4 Kitepna-Baal houina dangka som sagi Abimelech apeuvin, hiche sum hin aman apanpi ding mi duhdah bei tampi athalah-e.
Jdg 9:5 Abimelech chu Ophrah khoa, apa ina achen, Gideon chapa som sagi, asopite ho chu song chung khat’a aluu atansoh hel’e. Ahivangin Gideon chapa lhumpen, Jotham chu akisel’in athat kheltai.
Jdg 9:6 Chutah chun Shechem kho mitese le Bethmillo kho mite jouse akikhom’un, Shechem khoa gangpi ai nei phunga ahungun, Abimelech leng achansah tauve.
Jdg 9:7 Hiche thu hi Jothamin ajahdoh phat’in, Gerizim molsanga akaldoh-in ajah-uvah, “Vo Shechem kho mite ngaiyun, chutile Pathenin naseiyu ngaiyinte!
Jdg 9:8 Phat khat’in thingphung jouse akikhom’un alenguva pang ding lhen agouve. Olive thing jah a, ‘Kalengun pangin,’ atiule;
Jdg 9:9 Olive thingin, ‘Nalengu hileng, mihemte le pathen jousen eijabolna thaotwi kapensah thei lou ding ahi,’ ati.
Jdg 9:10 Chuin thingphung hon theichang phung jah a, ‘Kalengun hung pangin,’ atiule;
Jdg 9:11 theichang phungin jong, ‘Nalengu hileng, kaga lhumtah heo ding ahi,’ ati.
Jdg 9:12 Hijeh chun thingphung ho chun lengpigui jah a, ‘Kalengun hung pangin,’ atiule;
Jdg 9:13 lengpiguiyin jong, ‘Nalengun pang leng, mihemte le pathen jouse kipana, kalengpitwi kang ding ahi,’ atikit’e.
Jdg 9:14 Akhon nan thingphung ho hin naolhai phung jah a, ‘Kalengun hung pangin,’ atiule;
Jdg 9:15 naolhai phungin, ‘Lenga neipansah nom mongule, kalim noiya hung keh khom’un. Naboldaule kabahnang lah a mei hung koudoh a Lebanon cedar phung ho geiya akah vam ding ahi,’ ati.
Jdg 9:16 “Lung thengsel le lungdih pua Abimelech hi leng chansah nahinah um? Atoh phat dungjuiya Gideon geldoh jingle a-insung mite phat bol nahiu hinam? ,
Jdg 9:17 Kapan gal nasatpeh-u chu sumil hih-un. Midiante khut’a nangho huhdohna dia hinkho phalngama pang anahi.
Jdg 9:18 Tunla kapa insung mite nadoutauve. Achapa som sagi jen, song khatseh chunga nathat gamtauve. Hiche hi Abimelech, asohnu chapa natupau ahijeh a, Shechem a leng chansah ding deina nabol’u ahibouve.
Jdg 9:19 Tunia Gideon le a-insung mite nabolnau hi thildih ahile kipah-un lang, Abimelech chunga jong kipah-un, aman jong kipapiu hen.
Jdg 9:20 Thildih lou ahivangle Abimelech a pat mei hung koujah hen, Shechem kho le Bethmillo kho mi jouse kavamhel hen. Shechem kho le Bethmillo kho mitea konin jong mei hung koudoh hen lang Abimelech kavam jeng hen,” ati.
Jdg 9:21 Asopipa Abimelech ginjeh-in, Jotham ajamin Beer a achengtai.
Jdg 9:22 Abimelech chu kumthum sungin Israel chunga avaihom’e.
Jdg 9:23 Pathenin Abimelech le Shechem kho mite akidousah-in, Shechem miten Abimelech gal abol khumtauve.
Jdg 9:24 Hitia thilsoh hi Abimelech chungle ama tildoh a Gideon chapa som sagi thasah Shechem kho mite chunga chonset man phu lahna ding ahi.
Jdg 9:25 Shechem kho miten molsang vum’a Abimelech achanlhihsah-un, ahinjotpa chan achom’un ahi. Aum chanu hi Abimelech aseipeh tauve.
Jdg 9:26 Gaal chapa Ebed asopite to Shechem khoa ahungle, akho miten atahsan tauve.
Jdg 9:27 Lengpiga agalouvun, achil lhauvin, lengpitwi asouvin, golvah abol’uve. A-pathenu houina acheuvin, aneuvin adon’un, Abimelech demna thu jeng aseiyui.
Jdg 9:28 Gaal chun, “Shechem khosunga moh mai mi ihiuvam? Idia Abimelech kinbol’a ipan pan diu ham? Abimelech chu ija kibol ham? Gideon chapa hibou chume! Zebul akamsangin apangin, ikhoh a alhacha ipan diu ham? Naphung bulpiu, pului Hamor bou jabol un!
Jdg 9:29 Hiche mite hi lamkaiving lang, Abimelech that leng kati tave! Ken ajah a, ‘Sepai goiben lang hung konin kisat hite!’ tileng,” ati.
Jdg 9:30 Khopi sung vaipo Zebul’in Gaal thusei ajah chun alung hangtai.
Jdg 9:31 Arumah khoa Abimelech henga mi asol’in, “Ebed chapa Gaal, asopite to Shechem khoa ahungun, khopi sunga nalutsah lou diu ahitai.
Jdg 9:32 Tun namite to jan kah-in kitoldoh-un, loujaova kisel’un.
Jdg 9:33 Jingkah niso son kipat’un, photlot louvin khopi hindel khum’un. Gaal le amiten nahinleno tengu najo chanin bol jengun!” atisah-e.
Jdg 9:34 Hijeh chun Abimelech le amite janlaiyin akitol’un, Shechem khopi pama loili jenin akiseluve.
Jdg 9:35 Abimelech le amiten Gaal hung potdoh a khopi kotphunga ding amu’vin, akiselna mun cheh-uva ahung kipatdoh tauve.
Jdg 9:36 Hichun Gaal’in Zebul jah a, “Ven, molsang vum lama konin mihem ahung kitolsuh-uve!” ati. Zebul’in la, “Mihem hiloupi, molsang le hibou khu,” atipeh-e.
Jdg 9:37 Gaal’in aseikit’in, “Vemong mongin, molsang lailunga konin mihem ahung kitolsuh-in, loi khat jong phunsante touna ji gangpi phung lamlen a kon khun ahung’e!” ati.
Jdg 9:38 Hichun Zebul’in ajah a, “Nanop paona hoilamba hitam? Hiche Abimelech kitipa lhacha panlou khohsah lou chu nang nahilou ham? Naning nanopma nahouho chu hung hitauva khu. Konin lang gakisatpi tang,” ati.
Jdg 9:39 Gaal’in Shechem kho mite lamkaiyin Abimelech agakisatpi.
Jdg 9:40 Galmuna konin Gaal ajamtan, Abimelech chun adeltai. Mihem tampi amapun, khopi kotphung geiyin anolut tauve.
Jdg 9:41 Abimelech Arumah khoa apansan, Zebul’in Gaal le asopite Shechem khoa konin anomangin, Shechem a achengthei tapouve.
Jdg 9:42 Ajingin Shechem kho mite lou kon kigo chu Abimelech hin ahedoh-in,
Jdg 9:43 amite apuiyin, hop thumin akhenin, loulaiya kisel’in achang pansahtai. Khopia kona mipi hung kitoldoh amu phat’in, amaho that din akiselnauva konin ahung potdoh tai.
Jdg 9:44 Abimelech le aloiten khopi kotphung tintan loi ding agot pet’un loi ni man loulaiya mipite akisat piuvin, athat gamhel’ui.
Jdg 9:45 Akisat nilhum keiyun, Abimelech chun khopi alan, amite athat’in, kulpi avochimin, khopi sung chigum bangin meivam abansah tai.
Jdg 9:46 Shechem khopi kulpi lamkaiten hiche ajahdoh phat’un, kitepna-Baal houin kulpia kisel din agouve.
Jdg 9:47 Chukoma akikhop’u chu Abimelech aseipeh-un,
Jdg 9:48 hijeh chun Abimelech le amite Zalmon molsang lama akontoutauve. Abimelech-in heichan thingbah khat atulhan, alengkouva akhaiyin ahi. Ama bol bang bang bol loi din amite jong aseipeh-e.
Jdg 9:49 Amichan cheh-in thingbah alham’un, Abimelech nung juiyin, thingbah chengse chu houin kulpi maiya asechap jengui. Hiti hin kulsunga mi um pum pumin thingbah ho chu ahalden’un, kulpi sunga kisel numei pasal agom a sang khat hel tobangpi chu athigam hel’ui.
Jdg 9:50 Abimelech akonin Thebez khopi aga-umin, chule alatai.
Jdg 9:51 Intingvum dettah khat anaumin, khopi sunga numei pasal jouse, lamkaiho gei geiyin intingvum chu adel’ui. Kot akikamden’un, inchung lama akaltouvui.
Jdg 9:52 Intingvum ahindel khum phat’in Abimelech chun, mei halden kit din intingvum kotpi lam ajontai.
Jdg 9:53 Ahinla numei khat’in sumhei song ahinlhah khumsah le, aluchang asep khan, alugu achiptai.
Jdg 9:54 Chuphat’in Abimelech chun agalvonpo gollhangpa akou loiyin, “Numei thaa kakithan ding kadeipoi, chemjam satdoh-in neithat loiyin,” ati. Hijeh chun gollhangpan Abimelech avaotan jengle, athideltai.
Jdg 9:55 Abimelech thi amudoh phat’un, Israelten inlam akijot cheh tauve.
Jdg 9:56 Apa douna achapate som sagi athapeh themmona chu Pathenin Abimelech chunga hitobang hin alethuh tai.
Jdg 9:57 Gideon chapa Jotham gaosapna bangin, Shechem kho mite jong athoh diuva asei chengse, agit lou manu athoh-uve.
Jdg 10:1 Abimelech thi nungin Dodo tupa, Puah chapa Tola chu Israel jalensah din ahunge. Amahi Issachar phunga mi, Ephraim thinglhang gamsung, Shamir khoa cheng ahi.
Jdg 10:2 Amahi kum somle ni sungin Israel lamkaiyin apange. Athi phat’in Shamir khoa avuitauve.
Jdg 10:3 Tola thi nungin Gilead a konin Jair ahung kisepdoh-e. Amahi kum somni Israel lamkaiyin apange.
Jdg 10:4 Jairin chapa somthum aneiyin, sangan somthum ma atouphauve. Gilead gamsunga khopi somthum aneiyun, abonchan tugeiyin Jair khote hon akiseiye.
Jdg 10:5 Jair athi phat’in Kamon khoa avuitauve.
Jdg 10:6 Pakai dounan Israelte achonse kit’un, Baal doiho ahouvun, Astarte ho pou, Syria mite le Sidon mite, Moab mite Ammon mite chule Philistia mite doiho pou ahouvui. Pakai adalhauvin, houjong ahouda tauve.
Jdg 10:7 Hijeh chun Pakai Israel chunga alung hangin, Philistine ho le Ammon mite ajosahtai.
Jdg 10:8 Philistinete le Ammonten kum somle get sungin Israelte, Amorte gam, Jordan gal nisolam, Gilead gamsunga cheng ho, genthei hesoh-in abol’uve.
Jdg 10:9 Ammon mite chu Judah le Benjamin chule Ephraim phungho to kisat din, Jordan san ahung galkaiyui. Hiti hin Israelte analung gim lheh jengui.
Jdg 10:10 Israelte Pakai henga othongin ataovun, “Nang douna chonsen, ka-Pathenu Nang dalhan Baalte kahoutauve,” atiuve.
Jdg 10:11 Pakaiyin adonbut’in, “Egyptte, Philistinete,
Jdg 10:12 Sidon mite, Amalek mite, chule Maon miten masangin nabolgim’un kahenga nataovui. Hiche hoa kona kahuhdohda khah am?
Jdg 10:13 Huhdoh jong leng neidalhauvin pathen chom chom nahouvui; hijeh chun huhdoh kit tapouvinge.
Jdg 10:14 Nadeilhen pathente henga chun gataovun. Nagenthei tengu hiche ho chu kihuhdohsah tauvin,” ati.
Jdg 10:15 Ahivangin Israelten Pakai henga, “Kachonseuve, nadei deiyin neibol tauvin, amavang tunin neihuhdoh tei teiyun,” atiuve.
Jdg 10:16 Hiti hin namdangte doilim semthu jouse apaiyun, Pakai ahouvun, hichun Israelte gimna chunga Pakai alung natai.
Jdg 10:17 Ammon sepaite ahung kon’un, Gilead a ngahmun asemtauve. Israelte jong akikhom’un, Gilead gamsung Mizpah a ngahmun asem’ui.
Jdg 10:18 Mizpah muna hin Israel phung lamkai jouse le mipi akidong touvin, “Ammonte to kisatna koipen ilamkai diu ham? Lamkaipen pen chu Gilead gamsunga lamkaiya pangden ding ahi,” akitiuve.
Jdg 11:1 Gilead gamsung cheng, noti chapa Jephthah chu apa Gilead- ahin,
Jdg 11:2 Gilead hin ajinu to chapa dang jong anei lhonin, ahung khandoh phat’un Jephthah hi ina konin adelmangtauve. Gilead chapaten Jephthah jah a, “Ipau gou nalo thei louhel ding ahi; nuchom hin nahibouve,” atiuve.
Jdg 11:3 Jephthah asopitea kona jamdoh a Tob gamsunga gacheng ahi. Tob gamsung pannabei mihon angaiyun, akilhonpi lei luljiuve.
Jdg 11:4 Phat phabep nunga Ammon miten Israelte ahinsat’u ahi.
Jdg 11:5 Ammon mite hung galkon phat’a, Gilead gamsung Israel lamkaiho cheuva, Tob gama Jephthah agapuiyu ahi.
Jdg 11:6 Amahon, “Ammon mite to kisatna din neihung lamkaiyun,” atiuve.
Jdg 11:7 Jephthah-in, “Neihot behseh-uva kapa insunga kona kacham louva neideldoh-u hilou ham? Nagenthei phat’uva ibol’a neihung kouvu-ham?” ati.
Jdg 11:8 Amahon Jephthah jah a, “Gilead gama cheng jouse neilamkaiyuva, Ammon mite to ikisat theina diuva kadei phat’uva kahung kouvu hichume,” atiuve.
Jdg 11:9 Jephthah-in ajah-uva, “Ammon mite to kisat dia in a neipui kit’uva, Pakaiyin gal eijosah-ule, nachunguva vai kapoh-ding ahi,” ati.
Jdg 11:10 Amahon, “Kanom’uve, Pakai isakhiu ahijenge,” atiuve.
Jdg 11:11 Hijeh chun Jephthah chu Gilead gamsung lamkaite to alhonin, mipin vaipole lamkaiyin asemtauve. Avaipoh dingdol chu Jephthah-in Mizpah khoa Pakai angsunga aphongdoh-e.
Jdg 11:12 Hichun Jephthah-in Ammon lengpa koma mi asol’in, “Ibol’a neikinah piuva, kagamsunguva gal hung bol nahim?” agatisah-e.
Jdg 11:13 Jephthah misol ho jah a Ammon lengpan, “Egypt a ahung kitoldoh-u chun Israelten Arnon luidunga pat Jabbok le Jordan luidung gam einalahpeh-un, hichu lung lhaisel’a neipeh kit diu ahi” ati.
Jdg 11:14 Ammon leng pa henga Jephthah-in mi alesol kit’in,
Jdg 11:15 aseidiu thu hilsan, “Israelte Moab ahiloule Ammon gam lamanga neingoh-u adihpoi.
Jdg 11:16 Hitijoh anahi: Egypt a ahung kitoldoh-u chun Israelten nelgam ajot’un, Aqaba twikol paltanin, Kadesh a ahung bouvui.
Jdg 11:17 Hikoma hin mi asol’un, agamsung apaltanna diuvin Edom lengpa phalna agathumsah-ui. Edom lengpan aphalpehpoi. Moab lengpa henga athumu jong le, aman jong agamsung ajotsah deh poi. Hijeh chun Israelte Kadesh a apansauve.
Jdg 11:18 Hichun Israelten nelgam ajotpeh-un, Edom le Moab gamsung avelkol peh-uvin, Arnon luigal lang khat, Moab nisolam geiyin ahung kitol’ui. Hikoma hin ngahmun asem’un, Moab gamgi ahijeh-in Arnon lui jong agalkai pouve.
Jdg 11:19 Chuin Heshbon khoa Amor lengpa, Sihon henga Israelten mi asol’un, agamsungu lutna dia ama gamsung paltanna din phalna agathumsah-ui.
Jdg 11:20 Sihonin jong Israelte apaltansah deh poi. Asepaite akhom loiyin, Jahaz mun a ngahmun asemin, Israelte adelkhumtai.
Jdg 11:21 Ahinla Pakai Israel Pathenin Sihon le asepaite chu Israelte ajosahtai. Hijeh chun chugama cheng Amor mite gamsung jouse Israelten alatauve.
Jdg 11:22 Israelten Amorte gam atouphau chu, lhanglam Arnon luiya pat sahlam Jabbok luidung gei, nisolam nelgama pat lhumlam Jordan lui gei ahi.
Jdg 11:23 Hitia chu amite Israelte dia Amor mite delmanga chu Pakai Israel Pathen ahibouve.
Jdg 11:24 Hiche gam nunglah kit nagot’u ham? Na-pathenu Chemosh chun napeh gamsung chubou kikoiyun, keihon jong Pakai ka-Pathen’un eipeh chengseu kakoi diu ahi.
Jdg 11:25 Moab lengpa, Zippor chapa, Balak sanga phajoa kigel nahim? Aman Israel aphin khapoi, aphin am?
Jdg 11:26 Israelten kum jathum sunga Heshbon le Aroer hi alou ahitan, akimvel’a khopi chengse le Arnon luipanga khopi jouse jong alothau ahi. Ahile ibol’a phat hichan sunga nakinunglah dau ham?
Jdg 11:27 Ima dih louva kabolnau aumpoi. Gal neibol khum jengu adihpoi. Thutan a Pakai ahi. Israelte le Ammon mite kah a Aman thu tan nante,” ati.
Jdg 11:28 Ahivangin Jephthah thu thot chu Ammon lengpan iman agelpoi.