Thutan vaihomho

Jdg 11:29 Pakai Lhagao Jephthah chunga apansan, Gilead le Manasseh gamsung akholsoh-in, Gilead gamsung Mizpah ahung lhungin, chuin Ammon ageiyin achei.
Jdg 11:30 Pakai henga Jephthah akitep’in: “Ammon mite neijosah le,
Jdg 11:31 gal kajoa inlam kahung kile kit teng eilamto dia hung potdoh masapen pen nahenga pumgo thiltoa kapeh ding nahi. Hiche mihem chu nahenga kilhaina kapeh ding nahi,” ati.
Jdg 11:32 Hiti hin Ammon mite to kisat din, Jephthah chu luigal akaiyin, chule Pakaiyin gal ajosahtai.
Jdg 11:33 Jephthah-in Ammon mite chu Aroer a pat Minnith kimvel gamkol sung, khopi somni jen chu Abel Keramin geiyin adelkhumtai. Mihem simsenlou athat’un, Israelten Ammon mite ajoutauve.
Jdg 11:34 Jephthah chu ain lam, Mizpah kho jona ahungle, alamdot din achanu ahung potdoh-in, lamle khutbeh thon ahung’e. Cha jong hichenu seh bou anei ahi.
Jdg 11:35 Achanu amu phat’in alung na behseh jengin aponsil abottel’in, “Vo kanao, kalung nasuna behseh jenge! Nangpen tah-in neithoh gimsah lou ikhoh ham? Pakaiya giltah a kitep kahin, haitheihoi kahitapoi!” ati.
Jdg 11:36 Achanun ajah a, “Pakaiya kitepsa nahile, ‘Pakaiyin namelma, Ammon mite chunga phu lahsahta chu, keibolna dia naseisa chu bol jengin,” ati.
Jdg 11:37 Hichea hin achanun, “Thil khat vang neiphal peh-in; lhani sungin neidondan lang, nu-ngah thenga kathi ding pul dounan kaloi kagolte toh molsang dunga gavah leuvinge,” ati.
Jdg 11:38 Jephthah-in anoppeh-in, lha ni din asoldoh tai. Amanu le aloi agolte molsang dunga akaltouvun, ji neilou lai, cha beiya athi ding pul adouvui.
Jdg 11:39 Lha ni nungin apa koma ahung kile kit’in, Pakaiya akitepnasa chu Jephthah-in abol’in, achanu khangdong laicha hiti hin athi. Hichea pat hin Israelte chondan khat akisemdoh lon,
Jdg 11:40 nu-ngah khangdong jouse kumseh le Gilead gamsunga Jephthah chanu pul dou din ni li li pama achemang jiuve.
Jdg 12:1 Ephraim mite galsat din akigouvin, Jordan lui galkaiyin Zaphon a ahungun Jephthah jah a, “Gamgi khokal’a Ammon mite sat dia chea, nalhonpi dia keiho neihil louvu ham? Na-in kahalkhum diu ahi!” atitauve.
Jdg 12:2 Ahinla Jephthah-in ajah-uva, “Keile kamite Ammon mite to kakitomo laiyun kakou vangun neihuhdoh pouvin,
Jdg 12:3 neihu lou diu kahet phat’in, hinkho phal ngamin gamgi kalpeh a Ammonte kagasat’in, Pakaiyin eijosah tai. Idia tua kei sat dia hung nahiuvam?” ati.
Jdg 12:4 Jephthah-in jong Gilead gam mite akoukhomin, Ephraim mite to akisat’ule, ajoutauve. Ephraim miten ajah-uva, “Ephraim le Manasseh gamsung, Gilead a chengte hi Ephraima kona jamdoh loi nahiuve!” atiu ahi.
Jdg 12:5 Ephraim mite jamdoh louna din, Jordan palmun jouse Gilead miten atingtan tauve. Ephraim mi galkai nom hon galkai ding aseiyule, Gilead miten, “Ephraim mi nahim?” tin adongun, “Kahipoi,” atile;
Jdg 12:6 ahile, “Shibboleth,” atisah-un, aleile theilou jeh a, “Sibboleth” atileh; aman paiyun, Jordan palmun khatpen pena athat paiji tauve. Hichea hin Ephraim mi sang som li le sang ni athat’uve.
Jdg 12:7 Jephthah hin kum gup sungin Israelte alamkaiye. Athi phat’in akho sung, Gilead gamsunga avuitauve.
Jdg 12:8 Jephthah thi nungin Bethlehem khoa Ibzanin Israelte alamkaiye.
Jdg 12:9 Ibzanin chapa somthumle chanu somthum ma aneiye. Achanu somthum chu phung danga ajineisah-in, achapate ji din phung dang chanu somthumma apuilut’e. Ibzanin kum sagi sungin Israelte alamkaiye.
Jdg 12:10 Athi phat’in Bethlehem khoa avuitauve.
Jdg 12:11 Ibzan thi nungin Zebulun phunga mi Elon chun kum som sungin Israelte alamkaiye.
Jdg 12:12 Elon athi phat’in Zebulun gamsung, Aijalon khoa avuitauve.
Jdg 12:13 Elon thi nungin Pirathon khoa Hillel chapa Abdonin Israel alamkaiye.
Jdg 12:14 Abdonin chapa somli le tupa somthum aneiyin, abonchauva sa-ngan touthei ahiuvin, kum get sungin Abdonin Israel alamkaiye.
Jdg 12:15 Abdon athin, Amalekte thinglhang gamsung, Ephraim gam, Pirathon khoa avuitauve.
Jdg 13:1 Israelte Pakai dounan achonse kit’un, hijeh chun Pakaiyin Israelte chunga kum somli jen Philistinete avaihom sahtai.
Jdg 13:2 Hichelai hin Manoah kitipa hi Zorah khoa anachenge. Ama hi Dan phunga mi ahi. Ajinun cha ahing thei hih hel’e.
Jdg 13:3 Ajinu henga Pakai Van til akilah-in, “Cha neithei louhel nahin, tua vang gaiya chapa khat naneivah ding ahitai.
Jdg 13:4 Chingtheiyin jukha hihen vaiju hile don hih hel’in, chule neh lou ding dol ne hih hel’in;
Jdg 13:5 nachapa apen tengle sam navopeh lou ding ahi, ajeh” chu apen nikhoa pat Pathen koma Nazir dia katdoh ding ahitai. Amahin Philistinete khut’a Israelte sut lhamna ding na atoh pat ding ahi,” ati.
Jdg 13:6 Amanun ajipa agaseipeh-in, “Pathen mi khat ahungin, Pathen Vantil lheh lheh ahin, kichat aum’e. Hoilam kon. ahijong kadongpon, amin jeng cha jong eihilpoi.
Jdg 13:7 Kagaiya chapa khat kanei din aseiye. Jukha hihen vaiju hile kadondaa, neh ngailou ima kaneh louhel din aseiyin, chapa chu ahinkho lhum keiya Nazir a pang dia Pathen henga katdohsa ahidol eiseipeh-e,” ati.
Jdg 13:8 Hichun Manoah jong Pakai henga ataovin, “Vo Pakai, nahinsol Pathen mipa hung kit hen lang chapa chu apen teng ikalo lhon ding eiseipeh lhon hen,” ati.
Jdg 13:9 Manoah ngeh bangin Pathenin asol’in, Manoah jinu loulaiya atoupet’in Vantil chu ahung kit’e. Hichepet hin ajipa Manoah akoma anaumpoi,
Jdg 13:10 ajinu apet pet’in alhaijel’in, “Hungven! Nikhat’a hung pa ahung kilah kit’e,” agati.
Jdg 13:11 Manoah kipatdoh-in ajinu ajuitai. Vantil henga chun, “Kajinu koma thuseipa chu nahim?” ati. Aman jong, “Heng,” ati.
Jdg 13:12 Hichun Manoah-in, “Nasei hi agui lhun teng, apeng dingpa chun ipi bol’intem? Itobang hinkhoa kimang ding ham?” ati.
Jdg 13:13 Vantil’in jong, “Kaseipeh jouse chu najinun abol tei tei ding ahi.
Jdg 13:14 Lengpiguiya kilou tapou anehda ding, jukha hihen vaiju hile adon louhel ding, neh ngailou thil jong aneh lou ding ahi. Kaseipeh jouse abol tei tei ding ahi,” ati.
Jdg 13:15 Pakai Vantil ahilam helouvin Manoah hin ajah a, “Che hih laiyin, kelgol khat thapeh lhon tadinge,” ati.
Jdg 13:16 Ahivangin Vantil chun, “Kho ngai jong leng na-an neponge. Nabol nom mongle Pakai henga din pumgo thilton gouvam jengin,” ati.
Jdg 13:17 Manoah-in, “Nasei gui lhun teng kaseiphat thei Ihonna din, namin neiseipeh lhonin,” ati.
Jdg 13:18 Vantil chun, “Ibol’a neidoh ham, kamin hi min guh ahibouve,” ati.
Jdg 13:19 Hichun Manoah-in jong kelgol khat athat’in, chang them khat to songpi maicham phunga chun, thil kidang dang bol Pakai henga din atohdoh tai.
Jdg 13:20 Maicham phung meikhu kitundoh pet chun, Vantil jong meikhu lah a chu van lam jona akitoldoh, Manoah le ajinun amu lhon’e. Hichun Manoah hin mipa chu Pakai Vantil ahi ahedoh-in, ajinutotol’a bohkhup’in chibai aboh lhontai.
Jdg 13:21 Vantil chu amukit lhontapoi.
Jdg 13:22 Manoah hin ajinu jah a, “Pathen imu lhontan, thitei ding vang ihitai,” ati.
Jdg 13:23 Ahinla ajinun, “Pakaiyin eitha nom lhonle ithilto jong sangponte; thil hijat jong eimusah pontin, hitobang bang hi eiseipeh lhon louhel ding ahi,” ati.
Jdg 13:24 Manoah jinun chapa khat ahingin, Samson asah-e. Naosen ahung khangdoh-in, Pakaiyin phatthei aboh-e.
Jdg 13:25 Dan phung ngahmun Zorah le Eshtaol kah a aumpet’in, Pakaiyin thahat apepantai.
Jdg 14:1 Nikhat Samson Timnah kho achesuh-in, hikoma chun Philistine nu-ngah khat amudoh tai.
Jdg 14:2 Ina achen anule apa jah a, “Lhanglam Timnah khoa Philistine nu-ngah khat kamudoh-in, kamit’a achangten’e. Neipuipeh lhonin kichenpi ding kanom’e,” ati.
Jdg 14:3 Anule apanla, “Chep tanlou Philistinete lah a khu ji nagahol lou ipi akhohna um ham? Imiteu lah, iphung sunguva nu-ngah mulel hel nahim?” atilhon’e. Ahivangin Samsonin apa jah a, “Neipuipeh tei dia kadei ama khubou ahi,” ati.
Jdg 14:4 Pakaiyin Philistinete sat ding phat pha avet lhih jing molsona dia Pakaiyin Samson hiche bol dia agot lam chu anule apan ahelhonpoi. Hiche laiya hi Israelte chunga Philistinete vaihom ahiuve.
Jdg 14:5 Samson chu anule apa to Timnah a achesuh-un, lengpilei lah ajotnauva sakei bahkai nou ham ajan ahi.
Jdg 14:6 Photlot louvin Pakaiyin Samson tha apen, akhut keoseh-in, kelgol kibolna bangin, sakei chu abottel jengin ahi. Athilbol chu anule apa aseipeh poi.
Jdg 14:7 Nu-ngahnu chu akihoupile adei lheh jenge.
Jdg 14:8 Ni phabep jouvin hichenu chu kichenpi din Samson achetai. Lampi dunga apotdoh-in asakei thasa chu agavei. Kidangtah-in sakei longhom sunga chun khoilhah anakaiyin, khoiju anaumtai.
Jdg 14:9 Khoiphang akhoh lhan, ache pum pumin achoppeh-e. Anule apa jong khoiju phabep agapei. Anule apan anelhon nan, Samsonin la khoiju chu sakei long sunga alahdoh ahi aseipeh poi.
Jdg 14:10 Apa chu nu-ngahnu ina achen, Samsonin jong golvah abol’e. Hichu chulai khanga gollhang chondan ahi.
Jdg 14:11 Philistineten amudoh phat’un aumpi din gollhang somthum asol’uve.
Jdg 14:12 Samsonin gollhangho jah a, “Thulem khat dongung ting, moulop golvah kichaikah, ni sagi sunga ipi kiseina ahi neiseipeh joulouvu le tupat ponnem somthum le golvah von somthum neipeh diu ahi,” ati.
Jdg 14:13 Philistine gollhanghon jong, “Nathulem chu seiyin, ngaiyunge,” atiuve.
Jdg 14:14 Samsonin, “Mi nepaa konin neh thei ahungdoh-in, Athahat’a konin alhumkei ahungdoh-e,” ati. Nithum geiyin jong Philistine gollhanghon thulem chu alham thei hih laiyui.
Jdg 14:15 Nili lhin nin Philistine gollhanghon Samson jinu henga, “Thulem chu ipi kiseina ahi eiseipeh theina diuvin najipa khu lungthim bol’in. Nabolda le napa in le nang kahalvamtha diu ahi. Nangni hin keiho chomgamsih seh dia neikouvu hilou ham?” atiuve.
Jdg 14:16 Mit lhi pumin Samson jinun ajah a, “Neideipoi! Neihot ahibouve! Kagolte thulem khat naseipeh-in, ipi kiseina ahijongla neiseipeh poi,” ati. Samsonin, “Ken kanule kapabon kiseipeh lou, iti nang kaseipeh ding ham?” ati.
Jdg 14:17 Golvah kibol ni sagi sungin Samson jinu jong akap kap jenge. Hijeh chun ni sagi lhin nin Samsonin thulem chu ipi kiseina ahi ajinu ahiltai, Ajeh chu amanun asei sei jeng phat’a ahil ahi. Hichun Samson jinun Philistine golhangho aseipeh tai.
Jdg 14:18 Hiti hin ni sagi lhin nin, Samson jan ihmut masangin, khopi sung mihon ajah a: “Khoiju sanga lhumjo ipi hiya, Sakei sanga hatjo ipi ham?” atiuve. Samsonin: “Kabongpi manga loukai lou hileu chun, Kathulemsei hedoh pouvin nate,” ati.
Jdg 14:19 Photlot louvin Pakaiyin thahat apen, Ashkelon kho anokhumin, pasal somthum athat’in, avonu ahoh lhan, thulem seidoh ho chu ahoppeh tai. Hiche nung hin lung nommo tah-in Samson inlama ahung kile kittai,
Jdg 14:20 ajinu ma chu akichenni lhon a agolpa apetauve.
Jdg 15:1 Phat chom khat nung, suhlou chang bol laiyin, Samsonin ajinu agavil’in, kelgol khat akaipeh-e. Samsonin ajinu pa jah a, “Kajinu indan a kalut nom’e” ati. Ahivangin ajinu pan alutsah poi.
Jdg 15:2 Samson jah a, “Nahot mong dan a kagel jeh-in nagolpa kapetai. Anaonu hi hoichehjo ahi. Amahi nakichenpi thei ahi,” ati.
Jdg 15:3 Samsonin, “Tuchunga vang Philistinete ilo jong leng mo kapoh lou ding ahi!” ati.
Jdg 15:4 Hijeh chun Si-al jathum jen agamanin, Sial ni nin ameiyin akhitmat’in, akhimatna laiya meisal asomlhopsoh keiye.
Jdg 15:5 Chuin Si-alte meiya asomlhop meisal jouse chu ahal’in, abonchauvin. Philistinete changleiya alhalut’e. Hiti hin pol lah keo kalouvin, changkung ding lai jouse geiyin, olive thingpah ho pumin akachaitai.
Jdg 15:6 Athilsoh hi Philistineten ajahdoh phat’un akhol’ule Samson bol anahi. Ajeh chu Timnah khoa mi pasal, Samsonin nupa aneipan, Samson jinu, achanu chu Samson golpa anapehdoh jeh a Samson hita chu chon jeng ahi. Philistinete akon’un hichenu chule apa in ahalvam tha tauve.
Jdg 15:7 Samsonin ajah-uva, “Hitipia hi chon nahiuve ong! Aphai, kalethuh masangseuvin nga ponge,” atin,
Jdg 15:8 akonin nasatah-in akisat pin, Philistinete tampi athat’e. Chujouvin Samson Etam mun a songpikoa akiseltai.
Jdg 15:9 Philistinete ahung kon’un Judah gamsunga ngahmun asem’un, Lehi khopi adelkhumtauve.
Jdg 15:10 Judah miten anadongun, “Ibol’a neidel khum jengu ham?” atiuve. Philistineten, “Samson matdoh a sohchansah ding, aman eibolna banguva ama bol ding katiu ahi,” atiuve.
Jdg 15:11 Judahte mihem sangthum jen akon’un Etam songpikoa Samson jah a, “Philistinete ichunguva vaihom ahiu helou nahim?” atiuve. Samsonin, “Eibolna banguva kabol hichume,” ati.
Jdg 15:12 Judah ten, “Nang kan a Philistinete pedoh dia hungkon kahiuve,” atiuve. Samsonin, “Neitha louna diuvin nachemjamu neipeuvin,” ati.
Jdg 15:13 Amahon, “Kan a Philistinete pehdoh mai mai ding katiu ahin, nathat pouvinge,” atiuve. Hiti hin khaothah leh nin akan’un, songpikoa konin inlama ahinkaitauve.
Jdg 15:14 Samson Lehi ahinlhut lhut’un Philistineten ahindel’un, lhang asap khum jengule; hetman louhelin Pakaiyin thahat apen, akhut le abanjang akan nau khao jouse chu patjang bep’in abottan soh tai.
Jdg 15:15 Hichun Samsonin sa-ngan thikam khagu khat amaikhan, Philistinete sang khat aveilih nai.
Jdg 15:16 Hichea hin Samsonin hanla asah khumin: “Sa-ngan khagun pasal sang khat kathat’in, Sa-ngan khagun mihem long kajamchap’e,” ati.
Jdg 15:17 Hichun sa-ngan khagu apaiyin, hitobang thilsona mun chu Ramath Lehi asah tauve.
Jdg 15:18 Samson adangchah behseh jengin, Pakaiya ataovin, “Vo Pakai nasatah-in gal neijosah nan, dangchah a thi dingkon, hiche cheptan louho khut luma lou ding ngap kahitah-em?” ati.
Jdg 15:19 Pathenin komtong, Lehi kho koma ahongdoh-in, twi aputdoh chu Samsonin adon leh tha akidotai. Hijeh chun hiche twinah chu Hakkore akisah-in, tugeiyin Lehi khoa aum jing nalaiye.
Jdg 15:20 Gamsunga Philistinete vaipoh sung, kum somni sungin Samsonin Israelte alamkaiye.
Jdg 16:1 Nikhat hi Philistinete khopi Gaza Samson achele numei noti khat amun, aluppi.
Jdg 16:2 Gaza khosung miten Samson hung ahetdoh phat’un, aumna mun aumkim’un, jan khovah hel’in khopi kelkot phunga achang khovah hel’ui. Jan khovah hel’in athip beh-un, ageldol’un, “Jingkah geiyin ngah-utin, khovah teng that naute,” atiuvin ahi.
Jdg 16:3 Samson la jankim geibou a-ihmun, chuin athouvin khopi kelkot phung abotdoh-in, akhom ho le agol ho, akanglong geiyin apumangtai. Abonchan apun, Hebron khopi gah noivetna lhang geiyin apodoh peh-e. Samson le Delilah
Jdg 16:4 Hiche nung hin Samsonin, Sorek phaiya cheng, Delilah kiti numei khat adeichai.
Jdg 16:5 Philistine lengte nga jen acheuvin Delilah jah a, “Samson hi lungthim bol’in, athahat hoiya um, i-lo leuveng katuh ngoiyuva, kantum a chatmoa kalha thei diu ham. Najole leng khat cheh-in dangka sang khat le ja khat cheh peuvinge,” tin ajoltauve.
Jdg 16:6 Hijeh chun Delilah hin Samson jah a, “Ibol’a hiti hat nahim, lungset tah-in neihil’in. Khattouvin kantum a chamosah din nadeile itibol’in natem?” tin adonge.
Jdg 16:7 Samsonin, “Thalpi khao nou chet, jang sagin eikanleu, midang bang banga chat thei lou ding kahitai,” ati.
Jdg 16:8 Philistine lengten thalpi khao nouchet, jang sagi ahinchoiyun, Delilah-in Samson chu akantai.
Jdg 16:9 Indan chom khat’a Delilah hin mi achangpansah-in, hijeh chun, “Vo Samson! Philistinete ahungtauve!” tin asamtai. Ahinla Samsonin thalpi khao jouse chu patjang mei kahtan bangin atumtansoh tai. Hiti hin amahon athahat konna ahedoh thei deh pouve.
Jdg 16:10 Delilah hin Samson jah a, “Nei ngol bol’in, thudih neiseipehpoi. Min iti nakanjou mong mong ding ham neiseipeh tei teiyin,” ati.
Jdg 16:11 Samsonin, “Man khah louhel khao thah-in eikan’ule, midang bang banga chatmo jeng ding kahi,” ati.
Jdg 16:12 Delilah-in khao thah alan Samson akantai. Hichun, “Vo Samson, Philistinete ahungtauve!” tia asap le; Philistineten indan chom khat’a angau ahin, Samsonin la aban akanna khao ho chu patjang bon abottan kittai.
Jdg 16:13 Delilah-in Samson jah a, “Neingol bolna laiyin, thudih neihilpoi. Min iti nakanthei ding ham neihil’in,” atikit’e. Samsonin, “Kasam ba sagi hi lomkhat’in pheh-in lang, samkil’in kil matsoh keile chun midang bang bangin chatmo tange,” ati.
Jdg 16:14 Delilah-in Samson chu alhim ihmun, asam ba sagi chu ba khatseh-in apheh gomin, samkil’in akilmatsoh keiyin, “Vo Samson, Philistineten nadelkhum tauve!” tia asap le; Samson ahung thouvin, asam kilmatsa chu athing lhan akilham soh tai.
Jdg 16:15 Hichea hin Delilah-in, “Nalungthimbon neipe lou ibol’a neideiya kisei nahim? Thumvei neingol bol’in, ipin thahat napeh neiseipeh hih laiye,” ati.
Jdg 16:16 Hitia hi niseh a adoh doh jengle, ahenga angih jing chu Samsonin atheichim behseh tan,
Jdg 16:17 akhon nan aseidoh peh tah bah tan, “Kapen a pat Pathen dia katdohsa, kasam vokhah louhel ahin, kasam kivouchai le katha beiya midang bep bep kahi ding ahitai,” atidohtai.
Jdg 16:18 Adihtah aseidoh ahet phat’in Delilah-in Philistine lengte agakousah-in, “Hung kit’un, adih tah aseidoh tai,” atisah-e. Hichun ahungun sum jong ahinchoiyui.
Jdg 16:19 Delilah-in Samson chu apheichunga a-ihmutsah-in, asam ba sagi chu pasal khat achetansahtai. Chule hichea pat hin kichepnan aneiyin, thabei ahitah jeh-in aning anop’in aboltai.
Jdg 16:20 Chujouvin, “Vo Samson, Philistineten nadelkhumtauve!” tia asap le; Samsonin amasahoa bangin kithing lhang ting tin agel’in, Pakaiyin adalhah lam ahepoi.
Jdg 16:21 Philistineten aman’un amitchangte ni akaldoh-un, Gaza khopia akailut’un, sum-eng khaovin akan’un, songkul sunga sumhei goiyin apansah-uve.
Jdg 16:22 Ahinla asam ahung khangpan kittai.
Jdg 16:23 Philistine lengte chu a-pathenu Dagon koma kilhaina nasa tah bol din akikhom’un, “I-Pathen’un melma Samson eijosah tauve!” tin la asauve.
Jdg 16:24 Akipah behseh jengun, “Samson gakoudoh-un, golnop bolnan neiyu hite!” tin asamtauve..
Jdg 16:25 Songkul’a konin Samson agakaidoh-un, golnop bol nan amangun, inkhom ni kah a adinsah-ui. Mipin amutah-un a-pathenu vahchoi la asauvin, “Mi tamtah that gam a, gamsung sugamhel, melmapa. chu i-Pathen’un eijosah tauve!” atiuve.
Jdg 16:26 Akhut’a kaile chapangpa jah a chun Samsonin, “Inpi ki-ngapna khomte ni chu neithamsah-in, kaki-ngai nom’e,” ati.
Jdg 16:27 Insung mihem, numei pasal, dimset ahi. Philistine lengte nga jong um, abonchauva inchunga um chu numei pasal sang thum jen tobangin Samson umchan golnop’a avet’uva, nopsahna aneiyu ahi.
Jdg 16:28 Hichun Samson ataovin, “Vo thaneipen Pakai, neihin geldoh-in; kamitchangte ni akaldoh jeh-uva, hiche Philistinete chunga phu kalah theina din, O Pathen, lungset tah-in, chom khatseh ding hijongle thahat neipe kit tei teiyin!” tin athum’e.
Jdg 16:29 Hichun inpi douva pang khompi lailungte ni chu Samsonin atuh chah kheh tai. Khompi khat cheh chu akhut jetle veiyin asonton, hanuh nuh a anuh jenga,
Jdg 16:30 “Hiche Philistinete hito thiden jeng tange!” tia asap a; atha neichasun a anuh leh, inpi achimtan, Philistinete leng nga le mipi chujat chu adel lihsoh ta

i. Ahin laiya atha sangin Samsonin athia atha atamioi.

Jdg 16:31 Asopite le a-insung mite ahung konsuh-un Samson long apotauve. Along chu apouvin Zorah le Eshtaol kah, apa Manoah lhan ma maa avuitauve. Samson chu kum somni sungin Israel lamkaiyin anapange.
Jdg 17:1 Phat khat’in Ephraim thinglhang gamsunga Micah kitipa chu anachenge.
Jdg 17:2 Micah-in anu jah a, “Nasum dangka sang khat le ja khat akiguh mang chun, agupa nagaosap’e. Nagaosap chu kajai; ven sum kakoiye, agua chu kei kahi,” ati. Anun jong, “Kanao Pakaiyin vang boh hen!” ati.
Jdg 17:3 Micah-in sum chu anu apen, anun jong, “Ka kase nachunga chuh louna din, hiche sum hi Pakai henga giltah a kakatdoh ahitai. Thingin milimdoi kisui hen, hiche dangka hin kitomjol hen. Hijeh chun dangka hi hiche ding chun lepeh kit inge,” ati.
Jdg 17:4 Micah-in sum chu anu apeh le, dangka ja ni achoiyin dangka kheng ho apen, amahon milimdoi thingin asuiyin, dangkan atomjol tauve. Hiche doi chu Micah in a akoiyui.
Jdg 17:5 Micah hin doiphung tum khat aneiye. Milimdoi phabep asemin, Thempu lenga ban ding jong asemin, achapate lah a khat Thempun apansah-e.
Jdg 17:6 Hiche lai hin Israelte lah a leng anaumpoi; mi jouse aning anop a chon cheh ahiuve.
Jdg 17:7 Hiche lai hin Judah gamsung Bethlehem khopia Levi gollhang khat anachenge.
Jdg 17:8 Bethlehem khoa konin achaovin, chenna ding khochom akiholtai. Chenna ding aholle naa hin Ephraim thinglhang gamsung, Micah ina ahung khai.
Jdg 17:9 Micah-in, “Hoiya hung kon nahim?” ati. Levi golhangpan, “Judah gamsung Bethlehem khoa hungkon, Levi mi kahin, chenna ding kho holle kahi,” ati.
Jdg 17:10 Micah-in, “Kei koma chengin lang, thumop dingle Thempun pangin, kum khat sunga tonman din neh le chah, sille chen, chule dangka som khat penange,” ati.
Jdg 17:11 Levi gollhangpa chu anomin, Micah chapa bangin achengkhom lhontai.
Jdg 17:12 Micah-in Thempun apansah-in, Levipa jong Micah in a achenge.
Jdg 17:13 Micah-in, “Levi khat Thempua kineita, ijakai Pakaiyin kadia abol phat ding kahetai,” ati.
Jdg 18:1 Hiche lai hin Israelte din leng anaumpoi. Israel phung lah a achan diu gam akilah lou laijeh-un, hiche lai hin Dan phung miten achan diu gam akihol tauve.
Jdg 18:2 Hiti hin Dan phunga miten aphung sunguva mi pasal nga alhengdoh-un amaho hi Zorah le Eshtaol khopi te nia konin achan diu gamsung kholtoh-in asoltauve. Amisolteu Ephraim thinglhang gamsung agei phat’un Micah ina ageh pauve.
Jdg 18:3 Micah ina aumpet’un Levi golhangpa chu akason ahedoh-uvin, anailut’un, “Hikoma ibol, kon hikom nalhut ham?” tin adongtauve.
Jdg 18:4 Levipan, “Athempua panga, tohman eipeh dia Micah to kihoutoh kahitai,” tin aseiye.
Jdg 18:5 Dan miten, “Kajin nau lolhing ding hinam, Pathen neidoh peh tem’un,” tin asol’uve.
Jdg 18:6 Thempupan, “Lung gim dauvin, nakholjinna chan’uva Pakaiyin lhonpi nauvinte,” ati.
Jdg 18:7 Hijeh chun Dan mite pasal nga chun Laish khopi ajontauve. Akho mite Sidon mite banga lung mongtah a cheng amu’ve. Lung mongtah a um mi, uhpoh eosa bei, kinah kibao neiloute ahiuvin, angaichat jouseu kimsoh ahi. Sidon mite to kigamlat tah, koima dangto kijongto kila to louhel ahiuve.
Jdg 18:8 Pasal nga chu Zorah le Eshtaol ahung lhun kit phat’un mihon athilmudoh-u adongui.
Jdg 18:9 Amahon, “Hungun, Laish khopi delkhum jengu hite. Gampha tah ahi kamudoh tauve. Mohseh seh-in hikoma umdauvin, kino loiyun! Del lut’in toupha jengu hite.
Jdg 18:10 Amun nalhun tengu amiten koimacha ginmo aneilou dol mudoh tauvin nate. Gam lentah, dei le ngai kimsoh, Pathenin napeh-u ahitai,” atiuve.
Jdg 18:11 Zorah le Eshtaol khopite nia konin Dan phung mite jagup, galbol din akipandoh tauve.
Jdg 18:12 Akitol touvun, Judah gamsung, Kiriath Jearim gal lhum lam a ngahmun asemtauve. Hijeh a chu tuni geiya Dan ngahmun kisahlo ahi.
Jdg 18:13 Chukoma kon akitol’un, Ephraim thinglhang gamsung, Micah in ahinphatauve.
Jdg 18:14 Hichun Laish khopi kimvel gam ve-lhi pasal nga chun aloiteu jah a, “Hiche in ho lah a in khat sunga khu thing milimdoi kisuiya dangka kitomjol kikoi hea nahitah-um? Doi chom chom le Thempu lengban jong kikoitha ahi. I-lo dia nagel’um?” atiuve.
Jdg 18:15 Hiti hin Levi golhangpa chenna, Micah insunga alut’un, Levipa damle damlou thu adongui.
Jdg 18:16 Hichepet hin Dan phung mite sepai jagup, galbol dia gotsa chengse chu kelkot phunga adingui.
Jdg 18:17 Gam ve-lhia cheho chu insunga jang jel’in alut’un, thinga kisem milimdoi dangka kitomjolle, doilim chom chomho, chule Thempu lengban chu, Them pupa le sepai jagup kelkot phunga akihou pet’un achomdoh tauve.
Jdg 18:18 Micah insunga lut’a hiche thil theng ho agalah-u hin Thempupan ajah-uva, “Ipi bol nahiuvem? ati.
Jdg 18:19 Amahon, “Thip-in, paopoh dan. Hungin Thempu le thumop’in neipanpeh jo’uvin. Pasal khatseh insunga Thempua pan sanga Israel phung khat dia Thempua napanjoh lou ding ham?” tin adongui.
Jdg 18:20 Aseiyu hin Thempupa akipasah lheh jengin, thil theng ho chu choiyin amaho to akilhontai.
Jdg 18:21 Hiti hin ajite achateu to, anei anga jouse pumin, ganchate amahoiyun akitol tauve.
Jdg 18:22 Micah in chu gamla tah adalhatauvin, hichun Micah-in aheng akom jouse galbol din akoukhomtai. Ahinla Dan phunga hung galkonte chuto akisutouvin,
Jdg 18:23 lhang asap khum jenguve. Ahinla Dan miten Micah jah a, “Ipi hiya mihon hijatpi hung kitol nahiuvam?” atiuve.
Jdg 18:24 Micah-in jong, “Isei beh kisa nahiuva, ‘Ipi ham’ natiu ham? Kathempu pui manga, kasemsa doilim jouse pomanga kitol jeng nahilouvu ham? Ipi neikhenpeh beh-um?” ati.