Thutan vaihomho

Jdg 18:25 Dan phunga miten, “Imacha cha seidan, ajole miho hi naphindoh a nalonvuh lo diu ahi. Chutile nangle na-insung mite nathagamlo diu ahi,” atiuve.
Jdg 18:26 Amaho akitol paiyun, Micah-in jong ama thuh jou hoi ahilouje amudoh phat’in akile heiyin inlam ajontai.
Jdg 18:27 Dan phung miten Thempupa apuiyuva Micah semsa thil ho apoh mang nungun, akitol’un, Bethrehob to phaicham khat’a umtha, chamle lung mong tah a um Laish khopi adelkhumtauve. Akhosung mite athat’un, khopi ahalvamtauve.
Jdg 18:28 Sidon to kigamlat tah, chule midangto kijongto kila to lou ahijeh-un, Laish khopi hu ding koimacha aumpoi. Dan phunga miten khopi chu asemphauvin achenpha tauve.
Jdg 18:29 Akhomin jong akhel’un, apu luiyu Jacob chapa, apen nau Dan min aputsah-un, Laish khel’in Dan asah tauve.
Jdg 18:30 Dan phung miten hou din milimdoi chu atungdoh-un, Mose tupa, Gershom chapa, Jonathan chu Dan phung din paThempun apangin, achilhahte jong chu sohchan khang geiyin Thempun apangpeh tauve.
Jdg 18:31 Pathen houna ponbuh Shiloh a akison laisen, Micah milimdoi jong chukoma chun akitung jing jenge.
Jdg 19:1 Israelten leng anei masangun, Ephraim thinglhang gamsung lampeh a Levi mi khat anachenge. Amahin Judah gamsung, Bethlehem khoa thaikem din nu-ngah khat akipuiye.
Jdg 19:2 Athaikemnu to akitohmon, anumeinu hi apa in lam, Bethlehem khoa ajamin, lha li jen agathamtai.
Jdg 19:3 Levipan gajol kit’a hin kipui din athaikemnu henga achei. Alhachapa akipuiyin, sa-ngan ni akaiye. Athaikemnun Levipa hi insunga apuilut’in, anupa pan amu phat’in kipah-in analem’e.
Jdg 19:4 Athaikemnu pan nichong dia alho lhojeh-in Levipa hi nithum jen achamtai. Anupa lhonin nekhom le chakhomin, chule ageh khom jing lhontai.
Jdg 19:5 Nili lhin nin jingpin athou lhonin che din akigo lhontai. Ahivangin numeinu pan Levipa jah a, “Ol che lhon nan nate, ikhat khat beh nelhonle chun phante,” ati.
Jdg 19:6 Apu cha lhonin toukhomin anekhom lhontai. Numeinu pan Levipa jah a, “Tujan jong hikoma nomsel’in choldo kit tadin,” ati.
Jdg 19:7 Levipa chu chetei dia adindoh vangin, numeinu pan alho khoh ten phat’in jan khat ageh kittai.
Jdg 19:8 Ninga lhin ni jingpi tah-in che din akigotai; ahinla numeinu pan, “Ikhat khat beh netadin, nilhah lam teng chetan nate,” atin; anekhom kit lhon’e.
Jdg 19:9 Levipa le athaikemnu chule alhacha kipatdoh agot’ule, numeinu pan, “Ni lhum pai ding hita, geh kit jengun; kho jing loi ding ahitai; nomin geh khovah jengun, jing teng matah-in thouvun natin, inlam jontauvin nate,” ati.
Jdg 19:10 Ahivangin Levipan jan khat ge kit ding adatmon, athaikemnu to, lhacha pa le sa-ngante ni chunga toupha phasan akipatdoh tauve.
Jdg 19:11 Jebus (Jerusalem) khopi kom ahung geiyu chu nisa lhum kon cha ahitai; hijeh chun alhachapan, “Hiche Jebus mite khopia hi igepa jenguva itim?” tin apupa adonge.
Jdg 19:12 Apupan, “Israelte kho tilouva ki-nga poute,
Jdg 19:13 chepaiyu hitin Gibeah ahiloule Ramah kho khatjoh sanga gehpa naute,” ati.
Jdg 19:14 Hijeh chun Jebus khopi dalhan akitol paiyun, Benjamin mite gamsung, Gibeah khopi ahinphah-un nisa alhumtai.
Jdg 19:15 Gibeah khopi lamka akiheidoh-un, jan geh ding akigouve. Khopi sung lut’in, kholaiya atouvule, koiman jong jan gesah dia in a pui agopouve.
Jdg 19:16 Kholaiya atoupet’un tehsepu khat loukon ahung vailhungin, masanga Ephraim thinglhang gamsunga chengsa ahin, tua vang Gibeah khopia cheng ahitai. Khosung mi adangse vang Benjamin phunga mi jeng ahiuve.
Jdg 19:17 Hiche tehsepu hin maljinpa kholaiya tou amun ajah a, “Hoilam kon, hoiche go nahim?” ati.
Jdg 19:18 Levipan, “Judah gamsung Bethlehem khoa jin kahiuvin, tua vang Ephraim thinglhang gamsung lampeh in jon kahiuve. Koiman tujan beh eigesah nomlou danu ahin,
Jdg 19:19 sa-ngante ni neh le chah, kei le kathaikemnu chule lhachapu neh le chah lhingset’a kipoh kahinauve. Ijakai ngaichat dolse kaneikim’ui,” ati.
Jdg 19:20 Tehsepun, “Oh, kei ina hung lhung jengun! Ken gesah nauvinge; kholaiya nageu angaipoi,” ati.
Jdg 19:21 Tehsepun in lama apuiyin, sa-ngante ni an apei. Ajin hon keng asop’un, an anetauve.
Jdg 19:22 Nom asah pet tah-un phot lot louvin khopi sunga mihuh hon in chu ahin umkim’un, kotpi ahinsutauve. Tehsepu jah a chun, “In a nahinpuilut pa chu hinkaidoh-in numei bol’a kabol diu ahi!” atiuve.
Jdg 19:23 Tehsepu apotdoh-in ajah-uva, “Ahipoi ule nao! Hitobang chonthanghoi pi hi boldauvin! Ama hi kajinpa ahibouve.
Jdg 19:24 Vetau, ama thaikemnu le kachanu pasalto kitimat louhel khat um khu me, amani khu hinpuidoh ing ting, amani khu nanop nop’in boltauvin. Hitobang thilse vang hichepa chunga bol hih beh-un!” ati.
Jdg 19:25 Mihuhhon la angaipeh deh pouve. Levipan athaikemnu akaidoh-in ahenguva asondohtai. Jan khovah hel’in kichepnan aneiyun, athang adol’in abol’un, jingkah khovah geiyin atangpouve.
Jdg 19:26 Khovah lhah-in thaikemnu ahungin, ajipa ge na tehsepu in kotpibul’a alhutai. Nisa so geiyin hikoma chun akijamdentai.
Jdg 19:27 Jingkah chun ajipa thouvin, chepai gon kot ahonleh, athaikemnun kotpibul tuh a, in maiya kijam amudoh-e.
Jdg 19:28 Aman jong, “Thouvin chetaute,” atile; adonbut tapoi. Chuphat’in aman jong along chu sa-ngan chunga avaijamin inlam ahinjontai.
Jdg 19:29 In ahung lhunphat’in chemcha alan, athaikemnu tahsa chu hal somle ni a-at lhan, hal khat cheh chu Israel phung som le ni ho khat cheh athot’e.
Jdg 19:30 Levipa thaikemnu tahsaphe mu jousen, “Hitobang thilsoh akija khapoi! Israelten Egypt adalhah-uva pat hitobang thil hi asoh kha hih laiye! Ikhat khat ibol tei diu angaiye! Ipi ibol diu ham?” atiuve.
Jdg 20:1 Israel chate jouse, sahlam Dan a pat lhanglam Beersheba gei, niso lam Gilead gamsung geiyin galbol ding anomtauve. Mizpah mun a Pakai angsunga lung khat tah-in akikhomtauve.
Jdg 20:2 Pathen mite kikhopna hin Israel phung lamkai jouse apangsoh keiyun, tolsepai jeng jong mihem sang jali alhinguve.
Jdg 20:3 Mizpah a Israel phung dangse se kikhop hi Benjamin chaten ajatauve. Israelten, “Thilse hitobang hi itiso mong mong ham?” atiule;
Jdg 20:4 athaikemnu asuh lihpeh-u Levipan, “Keile kathaikemnu Benjamin gamsung, Gibeah khopia jan geh din kalut lhon’e.
Jdg 20:5 Janin Gibeah khoa pasal hon eihindel khum’un, in ahin umtauve. Kei tha eigot’u ahin, chuin kathaikemnu joh nam nah-in ajonpiuvin athilotai.
Jdg 20:6 Along kahinpon, atahsa kasemtel’in, phe hal khat cheh Israel phung somle ni khat cheh a kahin thot ahi. Benjaminte hin ilah-uva thilse tah le jon thanhoi aboltauve.
Jdg 20:7 Hikoma kikhom chengse Israel nahi cheh-ui. Hiche hi i-ilo diu hitam?” ati.
Jdg 20:8 Japi adingdoh cheh-un, “Ponbuh a cheng hihen in kisajousa cheng hile, ibonchauva koimachan inlam ijot thei louhel diu ahi.
Jdg 20:9 Hita ibol diu ahi: vang san a Gibeah khopi del khum ding mi ilhendoh diu ahi.
Jdg 20:10 Israel pasal som lah a khat khat chu sepaite anthah a panga, adangsen, Israel sunga hitobang jon thanhoi bol, Gibeah khopi agabol chah diu ahi,” atiuve.
Jdg 20:11 Hiti hin Israel pasal jouse, Gibeah khopi delkhum din lung kitoh tah-in apangkhomtauve.
Jdg 20:12 Israelten Benjamin gamsung pumpia mi asol’un, “Ipi dia hitobang melse thil bol nahiuvam?
Jdg 20:13 Gibeah khopi sunga mihuhho thadoh a, Israel lah a thilse paidoh theina din, neipedoh-un,” atisah-ui. Ahinla Benjaminten Israel dangho thusei ngaisah-in aneipouve.
Jdg 20:14 Israel dangho to kisat din Benjamin gamsung khopi jousea konin Gibeah khopia ahung kikhomtauve.
Jdg 20:15 Hiche ni hin akhopi chengseuva konin sepai sang somni le sang gup akoukhom’ui.
Jdg 20:16 Hicheng tilouvin Gibeah khosunga, lhentum cheh, khut veilong, pasal ja sagi jong ahinalaiyui. Amaho hin songbom manga, thil samjangte jong sep khel louhel ahiuve.
Jdg 20:17 Israel dang hon hilthemsa cheh sepai sang ja li akhomdoh-ui. Benjaminte douna gal
Jdg 20:18 Israelte chu Pathen houna mun Bethel’a acheuvin, Pathen henga, “Koiphung pen hin Benjaminte adelkhum masah ding ham?” tin adongui. Pakaiyin, “Judah phung kon masa hen,” ati.
Jdg 20:19 Israelte ajing jingkah-in akipat’un Gibeah khopi koma ngahmun asemtauve.
Jdg 20:20 Benjamin sepaite delkhum gon, sepaiho chu Gibeah khopi lam ngan agoltoh tauve.
Jdg 20:21 Benjamin sepai ho jong khopia konin ahung kitoldoh-un, nisa lhum masangin Israel sepai sang somni le sang ni athat tauve.
Jdg 20:22 Chuphat’in Israelte Pathen houna mun, Pakai angsunga acheuvin, nilhah geiyin pul adouvui. Pakai koma, “Kasopiteu Benjaminte sat dia kakon kit diu ham?” tin adongui. Pakaiyin, “Kon’un,” ati.
Jdg 20:23 Hichea hin Israel sepaite akitildoh kit’un, ni masa nia apansahnau mun ma ma chun sepaite agol kit tauve.
Jdg 20:24 Hiti hin anivei nan Benjamin sepaite adelkhum kittauve.
Jdg 20:25 Anivei nan jong Gibeah khopia konin Benjamin sepaite ahung kitoldoh-un, Israel sepai hilthemsa cheh sang somle sang get athat’uve.
Jdg 20:26 Israel pumpi Bethel muna akitol touvun alunghem tauve, Bethel a hin Pakai angsunga nelou chalouvin, nilhah geiyin atouvui. Pakai angsunga pumgo thilto kilhaina le kiloikhom thilto kilhaina agouvam’ui.
Jdg 20:27 Hiche laiya hi Pathen kitepna thingkong chu Bethel a um, Aaron tupa, Eleazar chapa, Phinehas thingkong chinga pang ahi.
Jdg 20:28 Mipin Pakai henga, “Kasopiteu Benjaminte kagasat kit diu ha, ka-ngah diu hitam?” atiuve. Pakaiyin, “Gasat’un. Jing teng nangho josah tauvinge,” ati.
Jdg 20:29 Hichun Israelten sepai phabep Gibeah khopi vel’a asel’un,
Jdg 20:30 abanjop’in, nithum lhin nin jong Benjamin sepaite delkhum din, masanga abol bangun, Gibeah khopi lam ngan sepaite agoltauve.
Jdg 20:31 Benjamin sepaite amaho to kisat dia ahung kondoh phat’un khopia konin apui mangtauve. Masanga bangin gamvalai, Bethel lampi dungle Gibeah lampi dunga Israel sepai phabep athat kittauve. Hichea jong hin Israel sepai somthum tobang athat’ui.
Jdg 20:32 Benjamin sepaihon, “Amasate nia banga ijokit thou thouvu hiya hi,” atiuve. Israelten la khopia kona pui manga, lamlhang dunga puidoh ding gontohsa akoiyu ahibouve.
Jdg 20:33 Israel sepai honpi kiletol’a Baaltamar akikhop kah-uvin, Gibeah khopi kimvel’apang Israelte chu phulou helouvin khopi kimvel, akiselnau songko dunga konin ahung lhaidoh tauve.
Jdg 20:34 Israel lah a lhentum sepai sangsomin Gibeah khopi anokhum’un, akihasat lheh tauve. Israelten asuhgam diu lam Benjaminten ahedoh hih laiyui.
Jdg 20:35 Pakaiyin Israelte chu Benjaminte sangin ahatsah tai. Hiche ni hin Israelten Benjaminte sang somni le sang nga to ja khat athat’un,
Jdg 20:36 hichun Benjaminten jong gal alel diu ahetauve.
Jdg 20:37 Hiche asel’u sepaite hin Gibeah khopi adel lut loiyun, khopi sunga akithe thangun mai phah phah athat’uvin ahi.
Jdg 20:38 Israel sepai honpi le asel’u sepaihon kihettona khat anasemsau ahi. Mipin khopi sunga kona meikhu kijel let lut amu tengu,
Jdg 20:39 lamlhang dung, galmuna Israelte chu hung kilehei kit diu ahi. Hiche kah a hi Benjaminten Israel sepai somthum jen anatha man’u ahi, Benjaminten, “Amasa banga ijo kit thou thouvu hiya hi,” atiu ahi.
Jdg 20:40 Hichun kihettona, melchihna meikhu, khopia kon kitungdoh chu amutauve. Benjaminten nunglam avet’ule, khopi pumpi meikouva leng jeng chu adatmo lheh jengtauve.
Jdg 20:41 Chutah-in Israelten alenoule, Benjaminte chu min athagam diu ahetdoh phat’un, kichan akisunoh dentauve.
Jdg 20:42 Israeltea kona gamchang noi adel vangun ajamdoh thei tapouve. Israel sepai honpi le khopia hung kondoh sepaite kah a akinong den’un, Israelten asu gamhel tauve.
Jdg 20:43 Amelmateu chu Israelten alhem lhauvin, tang louhel’in adel’un, Gibeah khopi niso lam geiyin, achepum pumin athatpeh-ui.
Jdg 20:44 Benjamin sepai lhentum cheh, sang somle sang get athat’uve.
Jdg 20:45 Adangse vang ajam’un, gamchang noi adel’un, Rimmon songko ajontauve. Lampia mi sang nga athat den’uvin, Israelten adel del jengun, Gidom geiyin sangni athat kit’uve.
Jdg 20:46 Hiche nikho hin sepai hang lai cheh, Benjaminte sang somni le sang nga athat’uve.
Jdg 20:47 Pasal jagup vang, gamchangnoi, Rimmon songko langa ajamdoh-un, songkoa chun lhali jen atham’ui.
Jdg 20:48 Israelten Benjaminte adangse se, numei pasal, gancha ho geiyin athat gamtauve. Gamsunga khopi jouse jong ahalvamsoh hel’ui.
Jdg 21:1 Mizpah a akikhop’un Israelten Pakaiya giltah-in kitepna aneiyun: “Benjaminte dinga ichanu’u ipeh louhel diu ahi,” anatiuve.
Jdg 21:2 Tun Israelte Bethel’a acheuvin, hikoma hin nilhah geiyin Pakai angsunga atouvui. Othongje jun, laina tah-in lunghemin akap’ui,
Jdg 21:3 “Vo Pakai, Israel Pathen! Ibol’a hitobang thil soh hitam? Israel lah a Benjamin phung mang ding hitam?” atiuve.
Jdg 21:4 Ajingin jingpi tah-in mipin maicham khat asem’un, kiloikhom thilto le pumgo thilto kilhaina abol’un,
Jdg 21:5 “Mizpah mun, Pakai angsunga kikhopnia panglou Israel phung lah a khattou um kham?” tin aholtauve. Hiche nia chu hiche kikhopna pang lou lou tha dia giltah a kihouna ananeiyu ahi.
Jdg 21:6 Israelten asopiteu Benjaminte alung natpiuvin, “Tunin Israel phung lah a khat amangtai.
Jdg 21:7 Benjamin pasal hingdoh ho ji ding iti iholpeh diu hitam? Ichanu’u peh louna dia Pakaiya giltah a kitepsa ihitauve,” atiuvin ahi.
Jdg 21:8 Mizpah muna kikhopna panglou Israel phung lah a aholnauva Gilead gamsung, Jabesh khoa kona koima hung lou amudoh-ui;
Jdg 21:9 sepaite min akou nauva Jabesh khoa mi hung lou anahi.
Jdg 21:10 Israel khoppin pasal gal-hang cheh sangsom le sang ni asol’un, “Jabesh khoa mihem, numei pasal, chapang geiyin gathat gam’un,
Jdg 21:11 pasal jouse le pasalto kitimatsa numeiho abonchan sugamhel’uvin,” atiuve.
Jdg 21:12 Ama vang Jabesh khopi sunga hin pasalto kitimat loulai nu-ngah khangdong jeng ja li amandoh-un, Canaan gamsung, Shiloh ngahmuna ahinpui lut tauve.
Jdg 21:13 Israel khoppi pumpin Rimmon songkoa um Benjaminte henga chamna ding thu athot tauve.
Jdg 21:14 Benjaminte ahung kile kit’un, Israel dang hon Jabesh khopia ahing hoiyu nu-ngahho chu apeh-ule achang tapouve.
Jdg 21:15 Israel phung sunga Pakaiyin Benjaminte akeh lhah jeh hin mipin avoujang natpi lheh jengui.
Jdg 21:16 Khoppi lamkaihon, “Benjamin phunga la numei abeitan, ahing nalai pasal, numei chang louho ji hoilam ihol diu ham?
Jdg 21:17 Israel phung khat manda le phante. Benjamin phunggui jopmat teina ding lampi ngaito ding ahin,
Jdg 21:18 ichanuteu Benjaminte to kichensah pen pen gaosap chang dia giltah a ikitep jeh-unla ichanuteu to kichensah theipoutin,” atiuve.
Jdg 21:19 Hichun, “Shiloh a kumseh le Pakai dia kut kibolji kut phat hivah ding ahitai,” atiuve. Shiloh hi Bethel sah lam, Lebonah lhanglam, Bethel le Shechem kah lampi niso lam ahi.
Jdg 21:20 Benjaminte jah a, “Cheuvin lengpi leiya kisel’in,
Jdg 21:21 ngah-un, Kut a lam dia Shiloh kho nu-ngah ho ahung tengle, lengpileiya konin hung potdoh-un lang, nu-ngahho lah a khat cheh chu thahatsanin, ji din, Benjamin gamsunga kilhoh lut jengun.
Jdg 21:22 Apate auteuvin nahung jahdaule, ‘Neilahpeh dauvin, ji dia gal hatman a kalah-u ahipoi. Neipeh-u ahiloujeh chun nakitepnau sukeh a mochang thei nahipouve’ tin seiyuvin,” atiuve.
Jdg 21:23 Benjaminten hiti chun abol’un; Shiloh a hung lam nu-ngah ho lah a chun ji ding khat cheh akilhoh mangtauve. Agamsungu akijot’un, khopiho akisem phat’un achengtauve.
Jdg 21:24 Israelte adangse jong, ama ama phung cheh le a-insung cheh, chule agam leiset cheh a akile kit tauve.
Jdg 21:25 Hiche lai hin Israelten leng aneipouve, mitin adei bangin achon cheh-uve.