BƏNDƏÇİLİYİN ÜÇ XÜSUSİYYƏTİNİN TƏSİRİ Allah-Təala bəndəni bu üç şeylə (özünü malik hesab etməmək, Allahı həqiqi tədbirçi bilmək və həmişə Allahın razılığını əldə etməyə çalışmaq) hörmətli edən kimi, bəndə kamil surətdə azad olaraq heç bir şeyə meyli olmur. Onun üçün dünyanın qiyməti aradan gedir. Daxilindəki mənəmlik aradan götürülür. Xalqın ondan razı olub-olmamasının, tərif və ya məzəmmət etməsinin onun üçün heç bir fərqi yoxdur. Çünki, artıq o, Allahın həqiqi bəndəsidir. Elə buna görə də pul yığmaq, izzət və şöhrət dalınca getmək və başqalarına qalib gəlmək kimi zəhmətli işlər onun üçün mənasız olur. O, artıq öz əziz ömrünü belə işlərdə hədərə vermək istəmir.
Elə buna görə də həqiqi bəndə çəkdiyi nəfəslərin və ömründən gedən saatların qədrini bilir.
