Ko‘rinib turibdiki, sug‘urta kompaniyalari ustav kapitalining eng kam miqdorlari faoliyat turlariga qarab farqlanadi. Masalan, umumiy sug‘urta sohasida faoliyat yurituvchi sug‘urta kompaniyalari ustav kapitalining eng kam miqdori 2014-yil 1-iyulga kelib 1,5 mln yevro ekvivalentiga teng summada shakllantirilgan bo‘lish shart. Aks holda, mazkur talabga javob bermagan sug‘urtalovchilarning faoliyati qonunda belgilangan tartibda to‘xtatiladi.
2012-yilning boshida O‘zbekiston sug‘urta bozorida jami 37 ta sug‘urta tashkiloti faoliyat ko‘rsatgan. Ularning 2 tasi hayotni sug‘urtalash sohasida, 1 tasi qayta sug‘urtalash sohasida faoliyat ko‘rsatgan. Shundan 4 ta sug‘urta kompaniyasiga sug‘urta faoliyatini amalga oshirish uchun litsenziya 2011-yilda taqdim etilganligi e’tiborlidir.
Milliy sug‘urta kompaniyalari tomonidan 2011-yilda jami 231,6 mlrd so‘m sug‘urta mukofotlari to‘plangan bo‘lib, bu ko‘rsatkich 2010yilning tegishli ko‘rsatkichidan 37,0 foizga ko‘p. 2011-yilda sug‘urta hodisalari sodir bo‘lishi natijasida yetkazilgan zararlarni qoplash uchun jami 45,0 mlrd so‘m sug‘urta qoplamalari to‘langan.
