Səthi kariyes (caries superficialis) qismən zədələnmiş diş minasında karioz ləkənin
yerində yaranır.
Səthi kariyes zamanı xəstə, ağız boşluğuna kimyəvi (turş, şirin, duzlu) və mexaniki
qıcıqlandırıcıların təsiri nəticəsində qısamüddətli ağrılardan şikayətlənir. Temperatur
qıcıqlandırıcıların təsirindən də diş ağrıya bilər. Müayinə zamanı kələ - kötür səthli
qüsur qeyd olunur. Diş pulpası elektrik cərəyanı qıcığına norma daxilində (2-8 mkA)
reaksiya verir.
Səthi kariyes minanın hipoplaziyasından və eroziyasından fərqlidir. Hipoplaziya üçün
sistem zədələnmə, zədələnmənin səthi kariyes üçün tipik olmayan səthlərdə (dodaq,
yanaq) lokallaşması, eyniadlı dişlərdə zədələnmə sahələrinin eyni səviyyədə
yerləşməsi xarakterikdir. Bundan əlavə, hipoplaziya zamanı zədələnmə sahələri, bir
qayda olaraq, hamar səthlidir. Minanın eroziyası zamanı vestibülyar səthdə
yerləşmiş zədələnmə sahəsi hamar dibli camabənzər formaya malik olur.
