Dövlət Statistika Komitəsi. 5 fevral 2007-ci ildə Dövlət Statistika Komitəsinin “Qiymət siyasəti” şöbəsinin müdiri Natella Qasımova ilə növbəti görüş keçirilib. Görüşdə tədqiqat qrupunun üzvləri layihə haqqında geniş məlumat verərək həyata keçiriləcək tədbirlərdən danışmış və sahədə DSK ilə əməkdaşlıqda maraqlı olduqlarını bildiriblər.
Nazirlər Kabineti. Fevral ayında növbəti görüş İTM ofisində 08 fevral 2007-ci il tarixində Azərbaycan Respublikası Nazirlər Kabinetinin İqtisadiyyat şöbəsinin müdiri Oqtay Haqverdiyevlə oldu. Görüşdə ilk olaraq cənab Haqverdiyevə layihə barədə məlumat verildi. Həmçinin o görülmüş işlər və aparılmış müzakirələrə dair məlumatlandırıldı. Cənab Haqverdiyev inflyasiyanın səviyyəsinin düzgün hesablanmasının xüsusilə əhəmiyyətli olduğunu qeyd etdi və söylədi ki, hökumət bu istiqamətdə problemlərlə qarşılaşmışdır. Belə ki, ötən il üçün daxili istifadə məqsədilə inflyasiyanın hesablanmış səviyyəsi elan edildiyindən yüksəkdir. Həmçinin cənab Haqverdiyev istehlak səbətində məhsulların sayının çox olduğunu qeyd etdi və azaldılmasının zəruriliyini vurğuladı. Haqverdiyev 70 məhsuldan ibarət kiçik bir səbətin qeyri-rəsmi olaraq formalaşdırıldığını və bu məhsullar əsasında da qiymətlərin dinamikasının müşahidə edildiyini qeyd etdi. Sonda Haqverdiyev layihə barədə onun daima məlumatlandırılmasını və nəticələrinin ona da çatdırılmasını xahiş etdi.
