Debates tal-kamra tad-deputati
Yüklə 0,51 Mb.
|
- Bu səhifədəki naviqasiya:
- MINUTI
|
MALTA DEBATES TAL-KAMRA TAD-DEPUTATI (Rapport Ufficjali u Rivedut) IT-TMIEN PARLAMENT Seduta Nru. 216 L-Erbgħa, 13 ta' Mejju, 1998 Stampat fl-Uffiċċju ta' l-Iskrivan Kamra tad-Deputati MALTA Prezz Lm1 IT-TMIEN PARLAMENT Seduta Nru. 216 L-Erbgħa, 13 ta' Mejju, 1998 Il-Kamra tad-Deputati ltaqghet fil-Kamra tal-Parlament, il-Palazz, il-Belt Valletta, fid-9.13 a.m. Talba SEDUTA NRU. 216 L-Erbgħa, 13 ta' Mejju, 1998 WERREJ MINUTI 92 MISTOQSIJIET - TWEĠIBIET ORALI 92 TQEGĦID TA' KARTI 97 ORDNIJIET TAL-ĠURNATA 99 ABBOZZ TA' LIĠI DWAR SELF LOKALI 99 LOCAL LOAN BILL 99 AĠĠORNAMENT 118 MISTOQSIJIET GĦAL TWEĠIBIET ORALI MWIEĠBA BIL-MIKTUB 124 MISTOQSIJIET GĦAL TWEĠIBIET BIL-MIKTUB 153 MINUTIIl-Minuti tas-Seduta Nru. 215 li saret fit-12 ta' Mejju, 1998 ġew konfermati MISTOQSIJIET - TWEĠIBIET ORALIMINISTERU TA' L-EDUKAZZJONI - REKLAMAR 9616. L-ONOR. AUSTIN GATT staqsa lill-Ministru ta' l-Edukazzjoni u Kultura Nazzjonali: B'riferenza għall-perijodu mill-1 ta' April sal-31 ta' Ottubru, 1997 u għad-dikasteru li għalih l-Ministru hu responsabbli, jista' l-Ministru jagħti lista ta' aġenziji tar-reklamar użati; jagħti indikazzjoni tal-kampanji afdati lilhom; jgħid kemm intnefaq ma' kull aġenzija; jgħid kemm intnefaq f'kull waħda mill-mezzi tal-media li hawn Malta; jagħti lista ta' l-istamperiji - minbarra dik tal-gvern - li ġew użati; jagħti indikazzjoni ta' x'ġie stampat u kwantita' ta' l-istampar; jgħid kemm intnefaq ma' kull stamperija; jagħti lista ta' kumpanniji ta' l-iscanning li ġew użati; u jgħid kemm intnefaq ma' kull kumpannija? ONOR. EVARIST BARTOLO (Ministru ta' l-Edukazzjoni u Kultura Nazzjonali): Jien informat li fi ħdan il-ministeru ta' l-edukazzjoni u kultura nazzjonali, matul il-perijodu indikat mill-Onor. Interpellant, fuq reklamar u stampar intnefqu l-ammonti li jidhru fid-dokumenti li qed jitpoġġew fuq il-Mejda tal-Kamra. Id-dokumenti li se npoġġi huma dawn: Dok. A - Fondazzjoni għall-Istudji Internazzjonali; Dok. B - Dipartiment tas-Servizzi Korporattivi; Dok. C - Segretarjat Parlamentari għaż-Żgħażagħ, Sport, Kultura u Arti; Dok. D - Dipartiment tal-Biblijoteki u Arkivji; Dok. E - Kunsill Malti għax-Xjenza u Teknoloġija; Dok. F - Diviżjoni ta' l-Edukazzjoni. Ninsab ukoll informat li d-dipartimenti tal-mużewijiet u ta' l-eżamijiet m'għamlu użu minn ebda aġenzija ta' reklamar u ma sar l-ebda xogħol mit-tip ta' dak mitlub fil-mistoqsija bejn l-1 ta' April u l-31 ta' Ottubru, 1997. MINISTERU GĦALL-AFFARIJIET BARRANIN - KAROZZI/MOBILE PHONES 10299. L-ONOR. AUSTIN GATT staqsa lill-Vici Prim Ministru, Ministru għall-Affarijiet Barranin u ta' l-Ambjent: Jista' l-Viċi Prim Ministru jgħid x'inhu n-numru totali ta' karozzi u mobile phones użati fid-dekasteru li għalih hu responsabbli u x'kienet l-ispiża għal kull karozza u kull mobile phone mill-1 ta' Jannar, 1997 sal-lum? Jikkonferma l-Viċi Prim Ministru li din l-ispiża għandha titnaqqas b'5% matul l-1998, skond id-direttiva tal-budget? ONOR. JOE MIZZI (Ministru mingħjar Portafoll fi ħdan l-Uffiċċju tal-Prim Ministru) (f'isem il-Viċi Prim Ministru, Ministru għall-Affarijiet Barranin u ta' l-Ambjent): In-numru totali ta' vetturi u mobile phones użati, flimkien ma' l-ispiża tagħhom, bejn Jannar u Novembru, 1997 fid-dipartimenti u enti li għalihom jien responsabbli kienu hekk:
Għalkemm dawn il-faċilitajiet li għandu l-ministeru se jibqgħu jintużaw bl-aktar mod effikaċi u li jiswa l-anqas flus, ma jfissirx li l-ispiża għalihom se tonqos b'5%, kif qed jindika l-Onor. Membru. Fil-fatt it-tnaqqis ta' 5% li ssemma fil-budget jirreferixxi għall-ammonti pprovduti b'mod ġenerali u mhux għal items speċifiċi ta' infiq. MINISTERU TA' L-EDUKAZZJONI - REKLAMAR 11027. L-ONOR. CHRIS CARDONA staqsa lill-Ministru ta' l-Edukazzjoni u Kultura Nazzjonali: Jista' l-Ministru, għad-dekasteru li għalih hu responsabbli, jagħti għall-perijodu 1989 - 1996 lista ta' aġenziji ta' reklamar użati; jagħti indikazzjoni tal-kampanji fdati lilhom; jgħid kemm intnefaq ma' kull aġenzija; jgħid kemm intnefaq f'kull waħda mill-mezzi ta' media li hawn Malta; jagħti lista ta' l-istampar - barra dik tal-gvern - li ġew użati; jagħti indikazzjoni ta' x'ġie stampat u kwantita' ta' l-istampar; jgħid kemm intnefaq ma' kull stamperija; jagħti lista ta' kumpanniji ta' l-iscanning li ġew użati; u jgħid kemm intnefaq ma' kull kumpannija? ONOR. EVARIST BARTOLO (Ministru ta' l-Edukazzjoni u Kultura Nazzjonali): Ninsab informat li l-Universita' ta' Malta ma tagħmilx użu minn aġenziji tar-reklamar filwaqt li d-dipartiment ta' l-eżamijiet m'għamilx użu tagħhom fil-perijodu bejn l-1989 u l-1996. Il-fondazzjoni għall-istudji internazzjonali ma tużax servizzi ta' aġenziji, la ta' reklamar u lanqas ta' l-iscanning, peress li dawn is-servizzi jiġu pprovduti mill-communications office tal-fondazzjoni. Bejn l-1989 u l-1996 il-fondazzjoni nefqet is-somma ta' Lm167.41 għal reklamar tal-public lectures u lunch-time concerts. Dawn ir-reklami tpoġġew f'''The Times''. Matul l-istess perijodu l-fondazzjoni għamlet dawn l-ispejjeż għall-istampar:
Il-publikazzjonijiet uffiċjali tal-fondazzjoni huma dawn:
Dawn il-figuri ġew miġbura mill-audited accounts tal-fondazzjoni li saru minn Falzon & Falzon 1989/1991 u Coopers & Lybrand (1992/1996). Il-kumplament tat-tagħrif li ngħatajt hu kif jidher fid-dokumenti li se nqiegħed fuq il-Mejda tal-Kamra kif se nsemmi: Dok. A - Ministeru ta' l-Edukazzjoni u Riżorsi Umani; Dok. B - Dipartiment tal-Libreriji u Arkivji; Dok. C - Dipartiment tal-Mużewijiet; Dok. D - Segretarjat Parlamentari għaż-Żgħażagħ, Sport, Kultura u Arti; u Dok. E - Diviżjoni ta' l-Edukazzjoni. Fejn jirrigwarda Dok. D qed tingħata l-informazzjoni li nstabet mir-records ta' l-accounts section responsabbli mid-dipartiment tal-kultura u taż-żgħażagħ u sport. Jidher li għas-snin 1989 u 1990 ma nstabu l-ebda records, filwaqt li mis-snin 1991 sa 1994 l-informazzjoni hija waħda parzjali, peress illi kopji ta' payment vouchers ma kenux disponibbli. UNIVERSITA' - SHARE CAPITAL F'KUMPANNIJI 11330. L-ONOR. CARMELO ABELA staqsa lill-Ministru ta' l-Edukazzjoni u Kultura Nazzjonali: Jista' l-Ministru jgħid liema huma l-kumpanniji li l-Universita' ta' Malta għandha sehem fihom u jgħid x'inhu x-share capital ta' kull kumpannija, kif ukoll x'inhu l-persentaġġ ta' kull share capital reġistrat f'isem l-Universita'? Jista' l-Ministru jgħid jekk l-Universita' tikkonsidrax li tagħti spazju fuq dawk il-bordijiet fejn għandha ishma li jiġu eletti diretturi ħaddiema, kif ukoll li jsiru health and life insurance policies għall-impjegati ta' dawn il-kumpanniji? Jirriżultalu l-Ministru li impjegati ta' kumpanniji ta' l-Universita' fl-ittra tal-ħatra tagħhom, meta dawn ġew ingaġġati, kien stipulat lilhom li s-salarju tagħhom jiġi rivedut kull sena u fil-fatt din ir-reviżjoni tas-salarju mhux qiegħda sseħħ, bi ksur ta' l-istess ittra tal-ħatra mill-employer stess? Jekk fl-affermativ, jista' l-Ministru jieħu l-passi biex ma tkomplix tinkiser il-liġi ta' l-impjiegi stess peress li fl-ittra tal-ħatra ta' dawn l-impjegati hemm stipulat li sseħħ reviżjoni tas-salarju? Jikkonsidra l-Ministru li l-ombudsperson li twaqqaf fl-Universita' jkun jgħodd għall-persuni impjegati f'kumpanniji fejn l-Universita' għandha sehem? Jikkonsidra l-Ministru li kumpanniji ta' l-Universita' jiġu ISO registered? ONOR. EVARIST BARTOLO: Ix-share capital maħruġ u l-persentaġġ mill-ishma ta' kumpanniji li l-Universita' għandha sehem fihom huwa kif se nsemmi:
Mill-kumpanniji msemmija hawn fuq:- (1) il-Malta University Services Limited għandha 50% mix-share capital maħruġ ta' Lm50,000 tal-Malta University Centre for Distance Learning Limited, kif ukoll Lm5,000 mix-share capital maħruġ tal-Malta University Publishers Limited; (2) il-University Broadcasting Services Limited għandha 50% mix-share capital maħruġ ta' Lm10,000 tal-UNIMAS Limited; (3) il-Metallurgical Services Limited għandha 75% holding mix-share capital maħruġ ta' Lm160,000 tas-Surface Engineering Limited; u (4) il-Malta University Share Management Limited għandha 9.87% mix-share capital maħruġ ta' Lm111,500 tal-Malta University Services Limited. Naqblu mal-prinċipju ta' diretturi ħaddiema. Fil-fatt il-ħaddiema huma direttament rappreżentati fil-kunsill. Il-kumpanniji ta' l-Universita' huma kważi interament magħmula minn ħaddiema li jaħdmu l-Universita'. Ikun tajjeb li l-impjegati tal-kumpanniji ta' l-Universita' jingħataw il-benefiċċju ta' health and life insurance meta l-impjegati kollha ta' l-Universita' jibdew jibbenifikaw mill-istess benefiċċju. Hemm każi fejn il-kuntratti ta' impjieg jipprevedu reviżjoni fis-salarji li tkun performance related. Naturalment mhux fil-każi kollha jingħata salarju rivedut għax dan jiddependi mid-deċiżjoni dwar il-performance ta' l-impjegat. Kien hemm ukoll każi fejn saru lmenti lill-Ombudsman dwar dan, iżda l-Ombudsman qabel mad-deċiżjonijiet tal-kumpanniji ta' l-Universita'. Il-post ta' l-ombudsman ta' l-Universita' ġie maħluq biex prinċiparjament jieħu ħsieb affarijiet akkademiċi. Kwestjonijiet kummerċjali bħal tal-kumpanniji qed jitressqu quddiem l-Ombudsman nazzjonali. Tkun idea tajba li kieku l-kumpanniji ta' l-Universita' jkunu reġistrati għall-ISO 9000 iżda wieħed irid jgħarbel jekk l-ispejjeż biex iġibu din ir-reġistrazzjoni humiex ġustifikati meta mqabbla mal-vantaġġi li jistgħu jinkisbu minn din ir-reġistrazzjoni. MINISTERU TA' L-EDUKAZZJONI - KONSULENTI 11421. L-ONOR. CHRIS CARDONA staqsa lill-Ministru ta' l-Edukazzjoni u Kultura Nazzjonali: Jista' l-Ministru jgħid min kienu l-konsulenti ngaġġati bejn is-snin 1987 u l-1996 fil-ministeru tiegħu u fid-dipartimenti li jaqgħu taħtu? ONOR. EVARIST BARTOLO: Ninsab informat li matul il-perijodu bejn is-26 ta' Lulju, 1991 u l-31 ta' Diċembru, 1996 kien hemm is-Sur Peter Darmanin li kien impjegat bħala konsulent mal-ministeru. Għal dak li għandu x'jaqsam mad-diviżjoni ta' l-edukazzjoni, it-tagħrif hu kif se nsemmi: Dipartiment ta' l-istudji ogħla u edukazzjoni adulta 1988: Mr Kabeli, konsulent Grieg, li ġie għal perijodu qasir permezz tal-UNDP biex jagħti pariri dwar l-iskema ta' taħriġ estiż fis-snajja'. 1992-95: Mr Regis Marrony, Direttur ta' l-Universita' ta' Perpignan, li ġie kemm-il darba għal perijodi qosra permezz tat-tieni protokoll finanzjarju ta' l-Unjoni Ewropea għall-proġett Raising Educational and Technological Standards, Sotto-Proġett Fellenberg Training Centre for Industrial Electronics u Precision Tool Centre. 1996: Mr M P Killen, Loughborough College, Loughborough, Renju Unit ġie għal ħames ġimgħat imqassmin matul is-sena permezz tat-tieni protokol finanzjarju ta' l-Unjoni Ewropea. Huwa ssottometta rapport dwar it-tagħlim ta' l-elettronika industrijali fiċ-Ċentru Fellenberg. 1996: Prof Graham Chapman mill-Universita' ta' De Montfort fir-Renju Unit ġie għal ħames ġimgħat imqassmin matul is-sena, permezz tat-tieni protokol finanzjarju ta' l-Unjoni Ewropea. Huwa ssottometta rapport dwar il-kurrikulu u t-tagħlim prattiku ta' l-inġenerija mekkanika fl-istitut tekniku Sir Mikielanġ Sapiano f'Raħal il-Ġdid. Dipartiment tas-servizzi għall-istudenti u relazzjonijiet internazzjonali Bejn l-1994 u l-1995 is-Sur John Norris u s-Sur Peter Hill tal-London Institute of Education taw servizz ta' konsulenza dwar it-tagħlim tal-lingwa Ingliża (ELRC). Dipartiment tal-kurrikulu F'dan id-dipartiment taw servizzi dawn il-konsulenti:
Ninsab informat ukoll li fil-perijodu msemmi ma kien hemm l-ebda konsulent ingaġġat mad-dipartimenti ta' l-ippjanar u żvilupp ta' l-operations u tal-finanzi u amministrazzjoni li jaqgħu taħt l-istess diviżjoni u lanqas mad-dipartiment ta' l-eżamijiet. Rigward is-segretarjat parlamentari għaż-zgħażagħ, sport, kultura u arti, mir-riċerki li saru għal nies li ġew ingaġġati biex jagħmlu xogħol bħala konsulenti fid-dipartimenti tal-kultura, nstabet din l-informazzjoni li ta' min jgħid iżda li r-records li għandu d-dipartiment mhumiex direttament u speċifikament għal tali skop, u mhumiex komprensivi biżżejjed biex ikopru l-perijodu kollu bejn l-1987 u l-1996. Madankollu minn dak li nstab is-segwenti persuni għamlu xogħol ta' konsulenza:
Skond ir-records tal-fondazzjoni għall-istudji internazzjonali, il-konsulenti bejn l-1987 u l-1996 kienu dawn:
Il-Kunsill Malti għax-Xjenza u Teknoloġija nformani li ma jistax iforni t-tagħrif mitlub minħabba li r-records kienu jinżammu mill-Universita'. Min-naħa tal-Universita', jien informat li ma ngaġġat l-ebda konsulent bejn is-snin 1987 - 1996. Il-konsulenti ngaġġati mid-dipartiment tal-mużewijiet fil-perijodu msemmi huma dawn: Mr Jim Richerson, Konsulent fl-Ippjanar u Disenjar ta' mużewijiet; Il-periti K. Buhagiar, D. Felice, A. Torpiano, M. Bonello, K. Cole u A. Mamo; Ms S. Sultana B.A. (Hons) Archaeology; Inġinier A.R. Scicluna M.Sc., C. Eng., MIMech. E. MCIBSE. L-informazzjoni li ngħatajt dwar konsulenti ngaġġati mad-Dipartiment tal-Libreriji fiż-żmien stipulat fil-mistoqsija hija din:
MADAM SPEAKER (Onor. Myriam Spiteri Debono): Grazzi. Il-ħin tal-mistoqsijiet għadda. L-Onor. Anglu Farrugia ONOR. ANGLU FARRUGIA (Chariman tal-Kumitat Permanenti għall-Konsiderazzjoni ta' Abbozzi ta' Liġi): Madam Speaker, nippreżenta l-minuti konfermati tal-laqgħat numri 26 u 27 tal-Kumitat Permanenti għall-Konsiderazzjoni ta' Abbozzi ta' Liġi li saru fid-29 ta' April u fis-6 ta' Mejju, 1998 rispettivament. Nixtieq nirrapporta wkoll li l-Abbozz ta' Liġi msejjaħ Att biex jemenda Att dwar it-Tribunal għal Talbiet Żgħar għadda mill-istadji kollha ta' Kumitat. Grazzi. MADAM SPEAKER: Grazzi. Tqegħid ta' Karti. Il-Ministru Mizzi. Yüklə 0,51 Mb. Dostları ilə paylaş:
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||