12.04.2012
Petrozavodsk
...MƏNİ ÇƏTİN QANARSAN
Həyat yoldaşıma
Deyirsən sən məni sevmirsən daha,
Elə demə, ağır gedər Allaha.
İncidib könlümü, batma günaha,
Sonra sözlərindən peşman olarsan!
Beş balamın anasısan axı, sən,
Nə yatmısan, nə görəsən yuxu, sən?!
Sevilənin azı mənəm, çoxu sən,
Əl uzatsam ürəyimə qonarsan,
Eh... gülüm, sən məni çətin qanarsan!
Sirli bir aləməm, içim sərvətdi,
Yüküm dünya boyda eşq-məhəbbətdi.
Deməyə başına sözmü qəhətdi?
Mən ölsəm hər gecə məni anarsan!
Eh... gülüm, sən məni çətin qanarsan!
Əsil sevən dildə deməz “sevirəm”,
Sevgi şöhrət deyil arxa çevirəm.
Eşqinin uğrunda alışdı Kərəm,
Od tutub alışsam, məni qınarsan,
Eh... gülüm, sən məni çətin qanarsan!
Səni sevməyimi sor ürəyimdən,
Bu yolda namərdlik gəlməz əlimdən.
Dəymə xatirinə Əşrəfin hərdən,
Məni itirərsən, yetim qalarsan!
Eh...gülüm, sən məni çətin qanarsan!
Dostları ilə paylaş: | 
