Debates tal-kamra tad-deputati (Rapport Ufficjali u Rivedut)

ONOR. GEORGE VELLA: L-Onor Interpellant huwa ġentilment mitlub jindika għal liema xogħolijiet qiegħed jirreferi.

ETC - REĠISTRAZZJONI GĦAX-XOGĦOL

4723. L-ONOR. JOE CASSAR staqsa lill-Ministru tal-Ħarsien Soċjali: Jista' l-Ministru jgħid kemm nies li kienu qed jirreġistraw fl-ewwel parti tar-reġistru li sabu xogħol matul ix-xahar ta' Frar, 1997?

ONOR. EDWIN GRECH: L-informazzjoni mitluba għadha qed tinġabar.


ANZJANI - KURA TA' L-ANZJANI

4724. L-ONOR. JOE CASSAR staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jgħid x'ħidma qed issir mill-Gvern mal-kunsilli lokali fil-qasam tal-kura ta' l-anzjani?

ONOR. MICHAEL FARRUGIA: Il-Gvern qiegħed jaħdem mal-Kunsilli Lokali fil-qasam ta' l-anzjani kif se jingħad:
Il-gvern għammar il-postijiet ta' Day Centres f' Ħal Qormi u Ħad Dingli bl-għamara u l-faċilitajiet, inkluż l-istaff, biex id-Day Centres bdew jaħdmu.
Fil-Każ tad-Day Centre li se jitwaqqaf f'Tas Sliema, id-Dipartiment għall-Kura tal-Anzjani se jagħmel it-tibdiliet meħtieġa, u l-faċilitajiet inkluż l-istaff biex jinfetaħ dan id-Day Centre. Bħalissa għaddejjin taħditiet mal-Kunsilli Lokali ta' l-Imsida biex jitwaqqaf Day Centre ġod-Dar għall-Anzjani ta' l-Imsida.
Fuq l-istess prinċipji qed isiru taħditiet ma' Kunsilli Lokali oħra biex dawn jiftħu Day Centres.
Qed issir koperazzjoni bejn il-Gvern u madwar 20 Kunsill Lokali fil-Proġett Info-Anzjan. L-informazzjoni miġbura qed tiġi mdaħħla fil-computers bil-għajnuna teknika ta' l-INIA (International Institute on Ageing) biex issir analiżi sabiex il-Gvern ikun jista jfassal policy li tkun l-aktar adattata għal ħtiġijiet attwali ta' l-anzjani. Fuq din it-tema kien sar seminar li fih ħadu sehem il-Kunsilli Lokali kollha u s-Segretarju Parlamentari għall-Anzjani.
Hemm ukoll ħidma kontinwa bejn il-Gvern u l-Kunsilli Lokali fil-proġett Kartanzjan. Filwaqt li l-Kummissjoni Elettorali tipprepara l-karti ta' l-identita speċjali għal dawk il-persuni li jkunu se jagħlqu s-sittin sena, il-Kunsilli Lokali qiegħdin jieħdu ħsieb li jqassmu dawn il-karti ta' l-identita speċjali lill-anzjani propju f'egħluq is-sittin sena ta' dawn l-anzjani.

ETC - PLACEMENTS

4725. L-ONOR. JOE CASSAR staqsa lill-Ministru tal-Ħarsien Soċjali: Jista' l-Ministru jgħid kemm saru "placements" mill-Korporazzjoni għall-Impjiegi u Taħriġ (a) f'Malta u (b) f'Għawdex matul ix-xahar ta' Marzu 1997?

ONOR. EDWIN GRECH: In-numru ta' nies li ġew "placed" mill-Korporazzjoni għall-Impjiegi u Taħriġ matul ix-xahar ta' Marzu 1997
(a) f'Malta kien ta' 157 u
(b) f'Għawdex kien ta' 7.


ETC - STUDJU STRATEĠIKU

4726. L-ONOR. JOE CASSAR staqsa lill-Ministru tal-Ħarsien Soċjali: Jista' l-Ministru jgħid meta se jkun lest l-istudju strateġiku dwar il-Korporazzjoni ta' l-Impjiegi u Taħriġ u dwar id-Dipartiment tax-Xogħol li kien tkellem dwaru fis-seduta tas-16 ta' Diċembru, 1996?
ONOR. EDWIN GRECH: Tweġiba tingħata f'xi seduta oħra

VOLONTARJAT SOĊJALI

4727. L-ONOR. JOE CASSAR staqsa lill-Ministru tal-Ħarsien Soċjali: Jista l-Ministru jgħid x'ħidma qed iwettaq il-Gvern biex tissaħħaħ ir-rabta bejn l-Istat u l-volontarjat soċjali?

ONOR. EDWIN GRECH: Tweġiba tingħata f'xi seduta oħra