Elm İşığı İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr

Universitetləri İslama uyğunlaşdırmağın müxtəlif cəhətləri

Universitetlər İslama tam uyğunlaşmamışdır. İslama uyğunlaşmaq təkcə hicaba riayət etmək və digər bu kimi işlər deyil. Elm və tədqiqatın həyata keçməsi İslama uyğunlaşmaqdır. Əgər universitetin tamamilə İslama uyğunlaşmasını istəyiriksə, onda bütün cəhətlərə riayət olunmalıdır, lakin olunmur. Siz çalışmalısınız. İş siz tələbələrin əlindədir.⁴⁰⁷

Böyük elmi işlərin alimlərin öhdəçi ruhunun səmərəsi olması

Sizə deyim ki, dünyanın müxtəlif elmi sahələrində bütün böyük işləri bu öhdəliyə malik şəxslər etmişlər; istər müsəlman, istər qeyri-müsəlmanlar. Çünki bu öhdəçi ruhun hər bir insanda olması mümkündür. O, dərin bir dini inanca arxalandıqda isə təbii ki, daha davamlı, daha mənalı, daha istiqamətli və daha uzunömürlü olar. Ancaq mömin olmayanın da həmin öhdəliyə malik olması mümkündür. Bütün dünyada insanların məişətini yaxşılaşdırmaq üçün mühüm elmi axtarışlara həmin öhdəlik və öhdəçi hiss səbəb olur, böyük kəşflər ərsəyə gətirir. Mən bu ixtira və kəşflərdə olan kommersiya maraqlarından xəbərsiz deyiləm, lakin onların əsas amili insanda olan öhdəçi hissdir. Əgər elmə, insana və insaniyyətə qarşı bu hiss olmasaydı, şübhəsiz, bu gün sizin təbabətdə gördüyünüz nailiyyətlər əldə edilməzdi. Bunun qədrini bilin. Bu öhdəçi hiss çox dəyərlidir.

Müqəddəs müdafiə dövründə bizim yüksək rütbəli həkimlərimizi, dəyərli cərrahlarımızı və birinci dərəcəli mütəxəssislərimizi xəstəxana və klinikalardan düşmən xəttinin bir neçə kilometrliyinə aparan amil belə öhdəçi hiss idi. Mən Xuzistanda öz həkim uşaqlarımızın düşməndən 7-8 kilometr aralıda açdığı bir xəstəxananı yaxından gördüm. Bilirsiniz ki, 8 kilometr məsafə orta səviyyəli bir qumbaranın altı deməkdir. Həmin uşaqlar Favda yüksək imkanlı və təmiz bir səhra xəstəxanası təşkil etdilər. İraqlılar Favı alanda ondan nə qədər istifadə etdilər! İnsan bu xəstəxanalara daxil olanda həzz alırdı. Sizin sözünüzlə desək, bu xəstəxananın yaraşıqlı, gözəl və qəşəng hotelinqi elə idi ki, insan oranın səhra olduğunu yaddan çıxarırdı: təmiz, ağ, parıltılı, doktor hazır, əməliyyat otağı hazır, cərrah hazır; uşaqları gətirir və orada dərhal cərrahiyyə əməliyyatı edir, lazım olduqda geriyə göndərirdilər və nə qədər insan xilas olurdu. Bu, sözügedən öhdəçi hissdir.⁴⁰⁸