I aparıcı:
Musiqi kollecinin tələbəsi Rüstəm Əliyevin ifasında “Dilqəmi”saz havasını dinləyək.
II aparıcı:
İndi də oxucuların ifasında sevimli şairimizin “Gözəl dünya gözəllərin var olsun” şeirini dinləyək.
I Oxucu:
Gülüşündəndə güllər açdı könlümüz,
Gözəl dünya, gözəllərin var olsun!
Vurğunu da, yorğunu da biz olduq
Gözəl dünya, gözəllərin var olsun!
Ürəyi var, ürəklərin nəşəsi,
Toxunarsan, pul-pul olar şüşəsi.
Könül verib,könül almaq peşəsi
Gözəl dünya, gözəllərin var olsun!
II Oxucu:
Neçə dəfə pəncərədən daş gəlib,
Neçə dəfə xumar gözdən yaş gəlib,
Sevən kəslər allaha da xoş gəlib,
Gözəl dünya, gözəllərin var olsun!
Əcəl ömrü zəmi kimi biçsə də,
Şərbət bilib bir qurtuma içsə də,
Vaxtlı-vaxtsız Zəlimxanlar köçsə də,
Gözəl dünya, gözəllərin var olsun!
I aparıcı:
Zəlimxan Yaqub qüdrətli şairlər və azman aşıqlar dövründə yaşadı. Hüseyn Arif səmimiyəti, Osman Sarıvəlli sığalı, Aşıq Şəmşir məharəti gördü, Muğanna sehirində sehirləndi, Bəxtiyar Vahabzadənin, Məmməd Arazın, Xəlil Rzanın və neçə-neçə böyük mütəfəkkirlərin səsinə səs verdi. Onun dövrü idi ki, Ustad aşıqlar –Xındı Məmməd, Əmrah Gülməmmədov, Hüseyn Saraclı, Kamandar Əfəndiyev və Alxan Qarayazılı öz qüdrətlərini ortaya çıxardaraq, Əmrah sazının, Hüseyn sözünün və Kamandar avazının vəhdətindən aşıq sənətinin “Qızıl Dövrü”nü yaratdılar.
Onun möcüzəli saza olan sevgisinin özü də bir möcüzədir. Dinlədikcə insan duyğusallaşır:
Arılar gül mənəm, qonun üstümə,
Məndən nə çəksəniz, saf çəkərsiniz.
Başına götürər ətrim dünyanı,
Sözün gülşənində kef çəkərsiniz.
İndi şairin sözlərinə bəstələnmiş “Bu yaşıl ağacın altı bizimdir” mahnısını dinləyək
II aparıcı:
Xalq şairi Zəlimxan Yaqub “Mən sazdan doğulmuşam”
“Saz mənim dilimin duası, saz mənim bütün varlığım”
deyir:
Gözəllər nazdan doğulub,
Çiçəklər yazdan doğulub,
Zəlimxan sazdan doğulub,
Sarıldığım sazdı mənim.
Əl atmaq nə lazım kağız qələmə,
Heç kəsə demərəm yaz ünvanımı,
Kimə gərək olsa sözüm, söhbətim,
Ona göstərəcək saz ünvanımı!
Dostları ilə paylaş: |
