Nöqtələr
7-ci ayədə deyildi ki, övladını dəryaya atmağı Allah Musanın (ə) anasına ilham buyurdu. Ona bildirildi ki, narahat olmasın, övladı hifz olunacaq. Bu ayədə Allah İslam Peyğəmbərinə (s) vəd edir ki, onu doğulduğu yerə qaytaracaq. Bəli, Musanı (ə) anasına qaytaran qüdrət sahibi səni də (hicrətdən sonra) Məkkəyə qaytaracaq.
“Məad” sözünün hansı məna daşıdığı və onun hansı nümunələrinin olması ilə bağlı fərqli fikirlər var. Bəziləri bu sözün peyğəmbərin dünyaya gəldiyi Məkkəyə işarə olduğunu bildirir. Onların nəzərincə, bu ayə qeybi bir xəbərdir. Peyğəmbərin nəzərinə çatdırılır ki, bir gün Məkkə sənin əlinlə fəth olunacaq və oraya qayıdacaqsan. Bəziləri də bu sözün Peyğəmbərin (s) şəfaət məqamına işarə olduğunu bildirir. Başqa bir qrup uyğun sözü Qiyamət və behişt mənasında təfsir edir. Amma rəvayətlərdə bu ayədəki “məad” sözünün İslam Peyğəmbərinin (s) dünyaya qayıdışına (“ricət”) işarə olduğu bildirilir. Ayə və rəvayətlər əsasında belə bir qənaətə gəlirik ki, “məad” sözü “ricət” mənasında işlənmişdir. Yəni Allah Qiyamətdən öncə övliyalarından bir qismini dünyaya qaytaracaq.
Dostları ilə paylaş: |
