Seçkilərdə iştirakın sərbəstliyi və məcburi votum.
Sərbəst səsvermə vətəndaşın səsvermə hüququnun könüllü realizə edilməsi imkanını bildirir. Vətəndaş səsvermə məsələsində tamamilə azaddır. O, özü istəsə səs verə bilər, istəmədiyi halda isə bundan imtina edə bilər. Bu prinsip də bəzi ölkələrdə tətbiq olunmur. Məsələn, Türkiyə və Yunanıstanda seçkilərdə iştirak etmək sərbəst deyil, məcburidir. Bu ölkələrdə seçkilərdə iştirak etməyəni cəza və ya digər məsuliyyət tədbiri gözləyir.
Şəxsi səsvermə.
Şəxsi səsvermə onu ifadə edir ki, vətəndaşlar yalnız özləri bilavasitə səs verə bilərlər. Kimsə kiminsə adından səs verə bilməz. Bu, başqasının adından səs verən şəxsin bundan sui-istifadəsinin qarşısını almaq üçündür. Başqalarının əvəzinə səs verən və ya bunun üçün şərait yaradan vətəndaşlar Azərbaycan Respublikasının Cinayət Məcəlləsində və ya İnzibati Xətalar Məcəlləsində göstərilən məsuliyyətə cəlb olunurlar.
