TohiD ŞƏHİd seyyiD ƏBDÜLHÜseyn dəSTĞeyb


ONUNCU DƏRS «Dinin əvvəli Allahı tanımaq, Allahı tanımağın kamilliyi isə Onu təsdiq etmək və təsdiq etməyin kamalı isə onu vahid bilməkdir»



Yüklə 1,06 Mb.
səhifə5/13
tarix12.09.2018
ölçüsü1,06 Mb.
#81631
1   2   3   4   5   6   7   8   9   ...   13

ONUNCU DƏRS
«Dinin əvvəli Allahı tanımaq, Allahı tanımağın kamilliyi isə Onu təsdiq etmək və təsdiq etməyin kamalı isə onu vahid bilməkdir».
ZATI, SİFATİ VƏ ƏFALİ TOHİD
Mərifət kamalının istidlali elmlə deyil, qəlbin təsdiq etməsi və inamla olduğunu qeyd etdik. Qəlbi təsdiq və onun mərtəbələri olan «elmul-yəqin», «eynul-yəqin»«həqqul-yəqin» barəsində keçən söhbətlərimizdə bəyan etdik. Həm də bu təsdiq o vaxt kamil olar ki, Allahın vəhdaniyyətinə «təkliyinə» heç bir şərik qoşulmasın. İnsan hər şeydə Allah və Onun təcəllisini görməlidir.

Tövhidin də mərtəbələri vardır: Zatı, sifati və əfali.



Tövhidi zatı: Allahdan başqa Allah yoxdur.

Tövhidi sifati: Allahın bütün sifətləri eyni zatı olub, başqa bir yerdən Ona əlavə olunmamışdır.

Tövhidi əfali: Bütün işləri Allaha aid olmasını və Onun həqiqi fail olmasını dərk etməkdir.

Tövhidi zatıyə başqa sözlə «vacibəl-vücud» deyilir. Allah təkdir, əzəli və əbədidir. Yəni həmişə olmuş və həmişə də olacaqdır. Ona heç bir şey əlavə olunmayıb, hər şeyi zatidir və təkdir. Vacibəl-vücudun vəhdaniyyəti əql mərtəbəsinə yüksəlməklə dərk olunur. İnsan əqli dəlillərlə aləmin mənbəyinin tək olduğunu dərk edir. Bu barədə çoxlu əqli dəlillər gətirilmişdir. Onların bəziləri aşağıdakılardan ibarətdir.



VACİBƏL-VÜCUDUN BİR NEÇƏ ƏDƏD OLMASI QEYRİ MÜMKÜNDÜR
Əgər məbdə (hər şeyin ibtidası, mənbəyi) iki olsa onun tərkib olunması lazım gəlir. Bir halda ki, əgər vacibəl-vücud mürəkkəb olsa, hər mürəkkəbin də öz tərkib hissəsinə və onu tərkib edənə ehtiyaclı olduğunu nəzərə alsaq vacibəl-vücudu möhtac və nəyəsə ehtiyaclı sanmalıyıq. Hər bir mürəkkəb olan şey mümkünəl-vücud olub öz hissələrinə və failinə (mürəkkəb edən, işi görən) möhtacdır. Deməli əgər vacibəl-vücud mürəkkəb olsa, o daha vacibəl-vücud hesab olunmaz. Bəlkə ona mürəkkəb və ona möhtaç olan mümkünəl-vücud deyilər. Fərz edək ki, vacibəl-vücud çox saydadır. Əgər O ikidənə olsa, yəqin edin ki, iki müştərək şeyin arasında mütləq imtiyaz olmalıdır. Yəni müştərək və müxtəlif cəhətlərin bir-birlərinə nisbətdə fərqləri və üstünlükləri olmasa onda onlar iki dənə deyildir. Bu da bizim fərziyəmizə ziddir. Deməli bunların hər biri iki şeylə mürəkkəb oldular. Biri onların müştərikliyi, digəri isə bir-birlərinə nisbətdə olan fərqli olmaqlarıdır. İki şeydən təşkil olunmaq da mürəkkəbliyə aiddir. Mürəkkəb isə möhtac və mümkündür. Elə buna görə də vacibəl-vücud deyildir.

Əql bu dəlillərin əsasında məbdənin iki deyil, ancaq bir olduğunu hökm edir. Məbdə iki dənə ola bilməz. Əgər iki ədəd olsa heç biri vacibəl-vücud olmayacaqdır. Çünki hər biri onları yaradıb, tərkib edənə möhtacdırlar.


ÇOXLUQ FƏSADA VƏHDƏT İSƏ İSLAHA SƏBƏBDİR
Allah-Təala bu barədə Quranda dəlil gətirərək buyurur: «Əgər yerdə və göydə Allahdan başqa tanrılar olsa idi, onların ikisi də müvazinətdən çıxıb pozulardı».1

Şübhəsiz ki, Xaliq və varlıq aləminin məbədəsi iki dənə olsaydı belə gözəl nizam hasil olmazdı. Bu aləmdə gözəl nizamın olmasına səbəb, onun bir mənbədən xaric olmasıdır. Allah-Təala başqa bir ayədə buyurur: «Onunla yanaşı ibadət ediləcək heç bir tanrı yoxdur. Əgər belə olsaydı, onda hər tanrı öz yaratdıqları ilə əlahiddə gedər, öz məxluqatını ayırıb aparar və onların bir qismi dünyadakı padşahlar kimi digərinə üstün olmağa çalışardı. Allah müşriklərin Ona aid etdikləri sifətlərdən tamamilə kənardır!»2

Bu ayəyə istinad edərək deyə bilərik ki, bütün fəsad və pozğunluqlara səbəb «çoxluqdur». Amma harda düzgünlük və islah varsa, vəhdaniyyət və təklikdəndir. Allah bir varlıqdır ki, bütün məxluqların zahir olması Onun səbəbi ilədir. Bu məsələ ancaq qəlbin nuru ilə dərk oluna bilər.
BAŞA DÜŞMƏDİYİNƏ GÖRƏ MÜXALİFƏT EDİR
Kim Allahı inkar edə bilər? Bir halda ki, hara baxsan Pərvərdigarın təsiri və nişanələrini görə bilərsən. Yer, göy, heyvan, insan və başqa varlıqlar hamsı Allahın məxluqlarıdır. Bu varlıqların heç birini Allahın nəzərindən ayrı düşünmək mümkün deyildir.

Ancaq nəfs ilə cihaddan sonra bu mətləbləri dərk etmək mümkündür. İnsanın qəlbi hicaba örtüldüyünə görə bu məsələləri inkar edir. Çunki o, bilmədiyi şeyin düşmənidir, belə adamlar özlərini bilikli, digərlərini isə nadan hesab edirlər. Öz hallarından xəbərsiz olaraq tövhidə küfr edib (Allahın təkliyini inkar etmək) başqalarını cahil adlandırırlar. Allah-Təala Quranda buyurur: «Allah göylərin və yerin nurudur».1

Göyləri səma dərəcəsinə çatdıran, insanı insan edən və bütün başqa məxluqları var edib onlara həyat bağışlayan ancaq Allahdır. Əgər Allah varlıqları geri götürsə, heç bir şeydən əsər-əlamət qalmaz. Mahiyyət özü özlüyündə heç nədir. Allahdır ki, onu heçlikdən varlıq həddinə çatdırmışdır. Məxluqları var edib, aşkara çıxaran Allahdır. Bu genişlikdə varlıq və vəhdət heç bir an Allahdan ayrı deyildir. Əgər ayrı olsa varlıqdan əsər-əlamət qalmaz. İnsan bu məsələni qəlbin nuru ilə dərk etsə, Allaha yaxınlıq və Onunla birlikdə olduğunu yaxşı başa düşər.
ZAMAN VƏ MƏKAN ÇƏRÇİVƏSİNDƏ OLAN YAXINLIĞIN HEÇ BİR ÜSTÜNLÜK VƏ ŞƏRAFƏTİ OLA BİLMƏZ
Əli (ə) «Nəhçül-bəlaqə»nin əvvəldə qeyd etdiyimiz xutbəsində buyurur: Allah hər mövcudla bir yerdədir. Çünki hər mövcudun varlığı Ondadır. Amma Onun yaxınlığı cisimlərin bir-birlərinə olan məkan və zaman yaxınlığı kimi deyildir. Bir barmağın o biri barmağa nisbətdə olan yaxınlığı məkan çərçivəsində olan yaxınlıqdır.

Zamana görə bu gün dünənlə müqayisədə bizə yaxındır. Allahın özündən başqa varlıqlarla olan yaxınlığını rütbə yaxınlığı kimi də fərz etmək olmaz. Həmçinin əgər, Allahın müqabilində müstəqil mövcud hesab olunurlar. Xaliqlə məxluq arasında olan yaxınlıq nə məkan nə zaman və nə də ki, rütbə və şərafaət yaxınlığıdır.

Əli (ə)-ın Həzrəti Peyğəmbərə (s) olan nisbət və yaxınlığı dərəcə və şərafət yaxınlığıdır. Heç bir məxluq öz Xaliqi ilə bu şəkildə yaxın deyildir. Allah-Təala bu cür nisbət və yaxınlıqlardan pak və münəzzəhdir.

Pərvərdigarın məxluqlar ilə yaxınlığı barəsində heç bir misal çəkmək olmaz. Çünki, Onun misli yoxdur. Bizim danışıq və əbədi dilimizdə yaxınlıq haqqında nə qədər terminlər varsa, Allah bunların hamısından pak və ucadır.


HÜLUL VƏ İTTİHAD KÜFRDÜR
Əli (ə) buyurur: «Allah hər bir şeylə yaxın olmadan onunla bir yerdədir».

Pərvərdigari-aləmin şeylərlə ittihad və birləşmə nəzəri küfrdür. Əgər bir kəs məxluqla Xaliqin müttəhid və birləşmiş olduğunu desə, o artıq Allaha şərik qərar vermişdir. Həmçinin «Hülul» da küfr hesab olunur. Məsələn, suyun qaba daxil olduğu kimi-Allah da, bir şeyin içinə daxildir deyilsə, bu, Allaha hülul nisbəti vermək hesab olunur.

Hal varlıığın vəziyyəti, məhəl, məkan və yer ayrı-ayrılıqda iki varlıqdırlar.

«Allah sizinlədir»-deyiləndə, Allahı və özünüzü ayrı-ayrılıqda olan varlıq kimi təsəvvür etməyin. O hər şeydən ayrıdır. Amma nəinki Allah ayrı bir varlıq, məxluq da başqa bir varlıq hesab oluna. Bu mətləblər çox incə və dəqiq olduğuna görə adi fikirlə başa düşülə bilməz. Əli (ə) başqa bir yerdə buyurur: «Allahdan ayrı təssəvür olunmadan, məxluq onunla ayrılıq şəklindədir».

Qəlbin tövhid nuru ilə işıqlanmağından ötrü insan bütün ömrünü cihadla keçirib, bəsirət səfasını öz istedadı dərəcəsində Allahın həqiqi vəhdaniyyətini dərk etməyə yüksəltməlidir. Məhəmməd və Ali Məhəmmədin (s) yetişdiyi tövhidin kamil mərtəbəsinə - həqqul-yəqinə çatmalı, Allahdan qeyri şeylərdən uzaqlaşıb, ancaq ona bağlı olmalıdır.


ALLAHIN VERDİYİ GÖZ, QULAQ VƏ ƏLLƏRLƏ İŞ GÖRÜLÜR
«Üsuli-kafi»də belə bir hədis nəql olunur: Görən gözlər, eşidən qulaqlar və əta edən əllər hamısı Allahındır. Əgər bir kəs bu məsələni dərk edə bilsə, Allah qarşısında öz faniliyini başa düşüb, hər yerdə Allahı, Onun təcəlli və zühurunu görəcəkdir. Allahın təcəlli və zühuru Quran və hədislərdə çox işlənmişdir. Misal üçün, Quranın «Əraf» sürəsindəki «Pərvərdigarı-aləm dağa təcəlli etdikdə» ayəsinin və Həzrəti Peyğəmbərin (s) «Məbəs» duasında işlətdiyi «Pərvərdigara! Mən Səndən Sənin ən böyük təcəllini istəyirəm» kəlməsini gətirmək olar. Adam bu kəlmələrdən dəhşətə gəlib, qorxuya düşməməlidir. Sözsüz ki, xudpəsənd adamlar bu ifadələrdən qorxmalıdır. Amma o mən, sən və başqa varlıqlar Allahdan ayrı təsəvvür etdikdə heç olduqlarını dərk edən kimi daha qorxusu qalmayacaqdır. Əlbəttə bunu dərk etmək müşkül məsələdir. Amma cavanlar bunun öhdəsindən tez bir zamanda gələ bilərlər. Özünüzə rəhm edib, nəfsinizin qarşısını alın ki, bu məsələlər sizin üçün çətin olmasın. Şəriətin düzgün qanunu ilə nəfsinizlə cihad edib, öz mənəviyyatınızı artırın. Bu yolda sizin üçün Allahdan tofiq və xeyir istəyirik.


ON BİRİNCİ DƏRS
«Dinin əvvəli Allahı tanımaq, Allahı tanımağın kamilliyi isə Onu təsdiq etmək və təsdiq etməyin kamilliyi isə Onu vahid bilməkdir».
BÜTÜN MƏXLUQLAR VAHİD OLAN ALLAH TƏRƏFİNDƏN YARADILMIŞDIR
Pərvərdigari-aləmin təkliyi haqqında elm əldə edən şəxs, Allaha olan mərifətinin naqis olmamasından ötrü Onun vəhdaniyyətinin ahəngində olmalıdır. Yəni tövhidin «Allah təkdir və heç bir şəriki yoxdur» məsələsinin zati, sifati və əfali surətdə dərk edib Onun ibadət və pərəstiş məqamına ucalmalıdır.

Tövhidi-zati - Allahın müqəddəs zatının bütün varlıq aləminə məbdə olması deməkdir. Yəni varlıq aləmində baş verən bütün hadisələr və yaranan bütün mövcudlar Onun vasitələridir və qaydışları da ona tərəfdir. O, həmişə olmuş və həmişə də olacaqdır. Ondan başqa olan hər bir şey yaradılmışdır. Vücudu varlıq təsəvvürünə görə üç qismə bölürlər:

1 – Vacibəl-vücud; - Yəni, olması vacib və zəruri olan varlıq.

2 - Mümkinəl-vücud; - Yəni, olması ilə olmaması eyni və mümkün olan varlıq.

3 - Mümtəniəl-vücud; - Yəni, olması və vücuda gəlməsi mümkün olmayan mahiyyət.

Əgər vücud və varlıq bir şeyin zatının eyni olsa, buna vacibəl-vücud deyilir. Amma əgər vücud bir şeyin zatının eyni olmayıb, ona başqa yerdən əlavə olunsa buna mümkünəl-vücud deyilir. Yəni onun yaranıb-yaranmaması mütləq deyildir. Mümtəniəl-vücudun yaranmasının qeyri mümkün olduğuna əql mütləq surətdə hökm verir. Yəni onun yaranması qəti surətdə qeyri mümkündür. Misal olaraq, Allahın şərikini qeyd etmək olar. Əgər zühnimizdə Allaha şərik təsəvvür edə bilsək, onun xarici aləmdə varlığının olması qeyri mümkündür.


ALLAHIN ŞƏRİKİNİN OLMASI QEYRİ MÜMKÜNDÜR
Vacibəl-vücud bir deyil, iki olduğu halda onların bir-birlərindən fərqlənməsi lazım gəlir. Bütün cəhətlərdən eyni olan şeylər iki dənə ola bilməz. İki dənə olan şeylərin mütləq aralarında müxtəliflik olmalıdır. Əgər müxtəliflik olmasa, ikilikdən söhbət ola bilməz. Müştərək və müxtəlif olan cəhətlərin tərkib olunmağa mütləq surətdə ehtiyacları vardır. Hər mürəkkəb olan şey öz tərkib hissəsinə və onu tərkib edənə möhtacdır. Bu anda inqilab, yəni, bir şeyin bir halda başqa hala düşməsi lazım gəlir. Yəni vacibəl-vücud mümkünəl-vücud olur. Çünki mürəkkəb və möhtac olan şey mütləq mümkün olub, onu, vücuda gətirən vacibə ehtiyaclıdır. Bu dəlil və nəzəriyyə ilə Allahın şərikinin mumtəniəl-vücud yəni, mütləq surətdə qeyri-mümkün sübut olması olur.

Əgər başqa bir vacibəl-vücud da olsa və aləmin məxluqlarının iki məbdə və iki illətdən yarandıqları fərz olunsa, bu əvvəlki söhbətlərimizdə qeyd etdiyimiz fəsad və hərc-mərcliyə səbəb olacaqdır. Çünki vacibəl-vücudun məxluqları yaratması vacibdir. Belə olan halda vacibəl-vücudların hər biri ayrı-ayrılıqda məxluqlar xəlq edəcək, onların özlərinə məxsus ayrıca aləmləri olacaqdır. Bu zaman onlardan hansı biri digərinə qələbə çala bilər? Əgər qələbə çala bilməsələr bu açizlık əlamətidir və Allah da aciz ola bilməz. Yox, əgər qələbə çala bilsələr, onda fəsad və hərc-mərcliyin olması lazım gəlir. Allah Quranda buyurur: «Əgər belə olsaydı, onda hər bir tanrı əlahiddə öz yaratdıqları ilə gedər və onların bir qismi digərinə üstün olmağa çalışardı».1 Biri digərinə üstünlük əldə edə bilsə bu fəsadın yaranmasına səbəb olacaqdır. Məğlub olan isə artıq vacibəl-vücud deyildir. Çünki Allah heç vaxt məğlub olmur.

Quran ayələri və əqli dəlillərlə Allahın şərikinin mümtənil-vücud olması aşkar olur.
XİLQƏTİN VƏHDƏTİNDƏN XALİQİN VƏHDƏTİ MƏLUM OLUR
Xilqətin vəhdətinin keyfiyyətindən Allahın vəhdətini başa düşmək olar. Məsələn, altı milyarddan artıq olan bəşər hamısı nütfədən yaranmışdır. Deməli bizim hamımız O, yaratmışdır. Hamının yaranışı keyfiyyət cəhətdən birdir. Bu məsələ heyvanlarda da eynidir. Deməli, insan və heyvanların Xaliqi bir olan Allahdır. Bitkilər aləmində də bu məsələni müşahidə etmək olar. Bitkilərin hamısı toxumdan əmələ gəlir, narın inkişafında gördüyümüz qüdrət nişanəsini eynilə alma, armud və başqa bitkilərdə də müşahidə edə bilərik.

Məxluqların hamısı bir qüdrətdən olub eyni zamanda da bir hikmətə aiddirlər. Filin yaranışında işlənən qüdrət və hikmət ağacaqanadın yaranışında da sərf olunmuşdur. Ağcaqanadın nazik incə xortumu filin xortumundan heç də geri qalmır. Bəlkə filin xortumundan çox zərif və itidir. Allah-Təala ağcaqanada əlavə olaraq iki qanad da vermişdir. Filin böyüklüyünə baxmayaraq onda olan eşitmə, görmə dadbilmə, hazimə və başqa üzvlər ağcaqanadda da vardır. Görəsən xilqətin bu vəhdətindən Xaliqin vəhdətini başa düşmək olmur? Bir halda ki, fili yaradan Allah ağcaqanadı da yaratmışdır.


TOHİD VƏ MƏXLUQLARI YARATMAĞIN HƏDƏFİ
Vəhdəti dərk etməyin yollarından biri də məxluqların yaradılış hədəfini və onların arasında olan rabitəni başa düşməkdir. Şübhəsiz hər yaradılan mövcudun yaradılmasında müəyyən məqsəd və mənfəətlər vardır. Hər bir varlıq müəyyən bir cəhətə görə başqa bir varlığa aid olur. Bütün məxluqların bir-birilərinə nisbətdə rabitələri vardır. Məsələn, qoyunun dişləri ot yeməkdən ötrü, mədəsi isə onu həzm etməkdən ötrü yaradılmışdır. Deməli, qoyunun və onun bədən üzvlərinin Xaliqi, onun yediyi ot-ələfin də Xaliqidir. Bu məsələ ət yeyən heyvanlarda da eyni ilə bu şəkildədir. İtin diş və mədəsinə fikir verin. Onun mədəsinə bu hərarəti verən Allah, onun diş və yediyi sümüyüdə yaratmışdır.

Allah-Təala heyvanlara şirinlik, turşuluq və acılığı bilməkdən ötrü dadbilmə orqanı da vermişdir. Onlar bu orqanın vasitəsilə müxtəlif dadlarda olan qidaları bir-birindən ayırırlar.

Deməli müxtəlif meyvə və xörəkləri yaradan Allah, həmin dadbilmə orqanını da yaradan Allahdır. Bunların hamısı Xaliqin vəhdaniyyətini başa düşməkdən ötrü bir vasitədir.

İybilmə orqanlarında da həmin məsələni müşahidə etmək olar. Allah, qoxuları bir-birindən fərqli olan gül-çiçəkləri yaratmışdır ki, insan iybilmə qüvvəsilə onların bir-birlərindən ayıraraq Pərvərdiğarını tanıyıb Ona şükürlər etsin.

Bu orqanların başqa bir xüsusiyyəti də budur ki, insan onların vasitəsilə zərərli şeyləri xeyirli şeylərdən ayıra bilsin. Məsələn, ətin qoxusundan onun iylənməsini bilib onu yeməkdən çəkinirlər.

Sözün qısası, məxluqların arasında olan rabitə, onların ancaq bir Xaliq tərəfindən yaradıldıqlarını başa düşməkdən ötrüdür.


GÜNƏŞ VƏ AYIN BULUD, TARLA VƏ BAŞQA ŞEYLƏRLƏ RABİTƏSİ
Allah-Təala yeri və başqa mövcudları dirildib, inkişaf etdirməkdən ötrü günəş nurunu doxsan milyon mil məsafədən yollayır. Bitki və heyvanların həyatı ona bağlıdır. Üç yüz min kilometr məsafədən yerə gəlib çatan ay nurunun yer kürəsi üçün on doqquz xüsusiyyəti vardır. Onlardan biri günəş nuru vasitəsi ilə hərarətlənən bitki və başqa mövcudların tempraturlarını aşağı salmaqdır. Görəsən Allah-Təala günəş və ayın nurunu yerlə necə uyğunlaşdırmışdır?

Pərvərdikari-aləm bunu elə nizama salıb ki, nə həmişə yandırıcı istilikləri olan gündüz olur, nə də gecə. Allah Quranda buyurur: «Həqiqətən, göylərin və yerin yaradılmasında, gecə ilə gündüzün bir-birini əvəz etməsində, içərisində insanlar üçün mənfəətli şeylər olan gəmilərin dənizlərdə üzməsində, quruyan yer üzünü Allahın göydən yağış yağdıraraq yenidən diriltməsində, növbə-növ heyvanları onun hər tərəfinə yaymasında, küləyin bir səmtdən başqa səmtə əsməsində, göylə yer arasında Allahın əmrinə tabe olan buludların hərəkətində ağıl və düşüncə sahibləri üçün əlamətlər vardır».1 Deməli, buludları öz əmrinə tabe edib yağış yağdıran həmin Allahdır ki, yer üzündə bitkilər də bitirir. Allah-Təala günəşi yaradandan sonra onun istiliyi nəticəsində əmələ gələn buxar, milyon tonlarla suyu havada hərəkətə gətirir.

Bu dəlillər vasitəs ilə Allahın vəhdaniyyətini başa düşmək olar.

Buludun yaradılmasından məqsəd qışın soyuğu və yayın yandırıcı istisinin təsiri ilə aradan getmiş yerlərlərin, bitki aləminin yenidən dirilməsidir. Bu qədər dəlil və sübutlardan belə bir nəticəyə gəlirik ki, bulud və yağışın Xaliqi bitkilərin də Xaliqidir. Bitkilər yaradan Allah, heyvanlarınn mədə və müxtəlif həzm sistemlərini də yaratmışdır. Bu sistemləri yaradan Pərvərdigar xörəkləri köməkdən ötrü ğöz də xəlq etmişdir. Bütün bunları yaradan Allah xörəyi hazırlayıb, ağıza qoymaqdan ötrü əl də yaratmışdır.



İcmali bir nəzərlə bütün mövzuların müəyyən bir hissədə bir-birlərilə rabitədə olub, Allahın vahdaniyyətinə şəhadət vermələrini başa düşürük.

«Bir olan Allahdan başqa Allah yoxdur, O, təkdir və heç bir şəriki yoxdur». Varlıq aləminin Əlim (əl elmli), Həkim (ən hikmətli) və Qədir (ən qüdrətli) olan ancaq bir məbdəsi vardır. Bu məbdə, yəni Allah hər bir şeyi müəyyən bir hədəfdən ötrü yaratmışdır.

ON İKİNCİ DƏRS
ƏGƏR BAŞQA MƏBDƏLƏR DƏ OLSAYDI, ONLAR DA PEYĞƏMBƏRLƏR GÖNDƏRƏRDİLƏR
Əli (ə), İmam Həsənə (ə) etdiyi vəsiyyətində töhid haqqında bu cümləni buyurmuşdur: «Oğlum, bunu da bil ki, Allahın şəriki olsaydı, o, da peyğəmbərlər göndərərdi». Əgər insanların maddi cəhətdən idarəçiliyini iki rəbbin tərəfindən olduğunu təsəvvür etsək, onda məxluqların ruhi və mənəvi idarəçiliyə də onların öhdəsində olmalıdır. Elə buna görə də, fərz etdiyimiz ikinci Allah yaratdıqlarını öz tərəfinə dəvət etməkdən ötrü peyğəmbərlər göndərməlidir. Çünki, öz Xaliqinə yaxın olmaq, bəşərin kamalı hesab olunur. Əgər fərz etdiyimiz şərik, peyğəmbərlər göndərməsə onda onun Allah olmağı aşkar olmayacaqdır. Bir halda ki, həzrəti Adəmdən (ə) Xatəmə (s) qədər bütün peyğəmbərlər bir olan Allah tərəfindən gəlib, bütün bəşəriyyəti töhidə dəvət etmişlər. Peyğəmbərlərin hər biri «Həqiqətdə mən, aləmlərin Rəbbi tərəfindən gəlmişəm» deyiblər. Deməli, əgər başqa bir Allah da olsa, o da mütləq, peyğəmbərlər göndərməlidir. Amma bütün peyğəmbərlər heç bir şəriki olmayan bir olan Allah tərəfindən gəlmişlər. Bununla da məlum olur ki, Allah-Təalanın həqiqətən də heç bir şəriki yoxdur.
ALLAHIN ŞƏRİKİNDƏN HEÇ BİR ƏSƏR-ƏLAMƏT YOXDUR
Əli (ə) yuxarıda qeyd etdiyimiz vəsiyyətnamənin davamında buyurur: «Sən onun (ikinci Allahın) bacarıq və qüdrətinin əsərlərini görərdin, onun işlərini də, sifətlərini də tanıyardın». Bir halda ki, bütün varlıq aləmində olan şeylərin bir-birlərilə rabitələri vardır. «Elə bil ki, bütün varlıq aləmi bütöv bir vahid şəklindədir». Aləmdə olan bütün şeylər kiçik işlərin əmələ gətirdiyi böyük bir işdən ibarətdir. Təsəvvür edin ki, böyük bir zavod, içərisində çarxlar, pərlər, motorlar olan dəzgahlardan təşkil olunmuşdur.

«Ancaq özünü vəsf etdiyi kimi, O, tək Allahdır».1 Allah-Təala Quranda da öz təkliyini vəsf etmişdir.

«Qüdrətdə Ona qarşı dura bilən bir varlıq yoxdur».2 Aləmdə nə varsa, Onun yaratdığıdır. Heç bir kəs Onun ziddinə kedə bilməz.

«O, zavala uğramaz, əbədidir».3 Həmişə olmuş və həmişə də olacaqdır. Heç vaxt aradan gedən deyildir.
BÜTÜN MƏXLUQLARIN YARADILIŞI ALLAHDANDIR, QAYIDIŞ DA ONA TƏRƏFDİR
Əli (ə) həmin vəsiyyətin davamında buyurur: «Allah hər şeydən əvvəldir, onun əvvəlinə heç bir əvvəl ola bilməz». Bütün varlıqlar onun tərəfindən yaradılmışdır. Çünki əgər Allah-Təala haqqında ilkinliyə laiq olsaq, yəni Ona «hadis» desək, Onun sonradan yaranması lazım gəlir. Bəlkə «huvəl-əvvəl» mənası, bütün mövcudlar Onun tərəfindən yaradılmışdır və «huvəl-axir» mənası isə, bütün məxluqların qayıdışı Ona tərəfdir deməkdir.

«Hər şeydən sonradır, sonuna bir son ola bilməz». Özünün sonu olmadan, bütün şeylərin qayıdacaq yerləri və axırı Odur.
İKİ ŞEYƏ PƏRƏSTİŞ EDƏNLƏR NƏ DEYİRLƏR?
«Sənəviyyə» adı ilə məşhur olan bir dəstə, tövhidi-zatinin əksinə çıxaraq çoxallahlığa qaildirlər. Bu əqidəli insanlardan Hindistanda hələ də vardır. İki məbdəyə inanmaqların səbəbi haqqında belə deyirlər: Bir varlıq aləmində xeyir olan inək, qoyun və şər hesab edilən ilan, əqrəb və yırtıcıları müşahidə edirik. Heç vaxt xeyir və şər məbdəsi bir ola bilməz. Deməli, iki məbdə olmalıdır. Biri xeyir məbdəsi olan nurdur ki, ona fars dilində «yəzdan», digəri isə şər məbdəsi olan «İblisdir» ki, ona zülmət deyirlər.

Əlbəttə onlar naqis əqillərinə uyğun olaraq bu cür dəlillər gətirmişlər.


DEMƏLİ ALƏMDƏ MÜTLƏQ ŞƏR YOXDUR
Bu dəstənin dediyinə görə, bu aləmdə elə şərlər vardır ki, onların xeyir məbdəsindən olması qeyri-mümkündür. Bir halda ki, bu aləmdə heç bir cəhətdən xeyri olmayıb, mütləq və xalis olan şər yoxdur. Hara baxsanız xeyir həmişə xalis və qalib olduğunu, şərrin isə o şeyə müqayisəli şəkildə başa düşüldüynü və sonradan daxil olduğunu görərsiniz.

Zəhərli olan ilan və əqrəbi faydasız heyvan hesab edib, onların haqqında misal çəkirlər. Görəsən bu heyvanların şər olmaqları onların yaradılışındadır? İlan özünün gözəl dərisilə nəyə görə şər olmalıdır? Əgər onların şər hesab olunmaqları zəhərlərinə görədirsə, belə nəql edirlər ki, bu heyvanların zəhərli olmaqları havada olan zəhərləri, zərərli qazları cəzb etdiklərinə görədir. Nəticədə onlar bizim yaxşı tənəffüsümüzdən ötrü havanı təmizləmiş olurlar.

Bundan əlavə zəhərin özü çox mənfəətli bir şeydir. Ondan dərman düzəldib bəzi xəstəliklərin müalicəsində istifadə edirlər. Deməli bu heyvanlar havanı təmizlədiklərinə və zəhərləri bəzi xəstəlikləri sağaltdığına görə xeyirli hesab olunurlar. Bundan əlavə bu heyvanların bədənində zəhərin ziddinə olan maddələr də vardır. Əqrəbin bədəninin ortasından kəsib onun sancdığı yerə qoysaq, orada olan zəhəri çəkib çıxaracaqdır. Eyni zamanda onun yağı zəhərlənmiş yerlər üçün çox mənfəətlidir. Əgər bir nəfər öz səhvi və diqqətsizliyi ucbatından əqrəbin sancmasına məruz qalırsa, bu əqrəbin şər olmasına dəlil deyildir. Bəlkə bu təbii bir hadisədir. Başqa bir misal, əgər bir nəfər evin damından yıxılıb əl-ayağı sınsa və ya ölsə, bu evin damının pis olmasına səbəb deyildir. Çünki hündür yerin təbii qaydası belədir.

Ehtiyatsızlıq edib, sürətlə maşın sürən adamın avtomobil qəzasına uğramaq ehtimalı daha çoxdur. Bu anda maşının şər olması haqqında heç bir şey demək olmaz. Deməli heyvan və zəhərin şər olması onların yaradılışında deyildir.

Əgər bir yeri od tutub, yandırsa, bu odun şər olmasına sübut deyildir.

Biz başa düşsək də düşməsək də, aləmdə olan bütün varlıqlar xalis xeyirdir. Buna misal olaraq xeyiri həmişə qalıb olan məlaikəni və ya bütün maddi varlıqların adını çəkmək olar. Bununla da, «sənəviyyə» və ya «ikiallahlı» dəstənin xeyir və şər haqqında dediyi əsas şübhə bətil olur. Özünə məxsus məbdəyi olan mütləq şər yoxdur.

Bir varlığın xeyiri qalıb olmayınca heç vaxt yaradılmır. Demək olar ki, bütün varlıqların xeyirləri daha çoxdur. Hər hansı bir surətdə hasil olan şər də Allahın izni ilədir. Zəhərli heyvanın sancıb öldürməsi Allahın təqdiri əsasında olan bir məsləhətdir. Buna görə də müqayisəli şəkildə baş düşülən şərlərin batinində məsləhətlər gizlənmişdir ki, onların həqiqəti də xeyir olub Allahın təqdiri ilə baş verir.

Bunun əsasında xeyir və şəri Allaha nisbət verib, «ey xeyir və şərin Xaliqi» deyirlər. Şər kimi başa düşülən şeylər də məsləhət əsasında baş verir və onlar içtimaiyyəti və şəxsləri sınamaqdan ötrüdür.


ALLAHIN VƏHDANİYYƏTİNƏ ELM SAHİBLƏRİNİN ŞƏHADƏT VERMƏSİ
Təfəkkür və əqli dəlillər çox yaxşı və lazımlı bir şeydir. Amma əgər bir kəs bu dəlillər vasitəsi ilə iman gətirib, batini elm əldə etsə, öz şübhələrinə cavab tapmış olacaq. Allahın vəhdaniyyəti barəsində xatircəmlik əldə etməkdən ötrü mərifət dərsində dediyimiz şeyləri əldə etmək lazımdır. Bəsirət gözü ilə Allahın təkliyini görməkdən ötrü çalışıb nəfsin qarşısında olan hicabları aradan aparmaq lazımdır.

Allah Quranda buyurur: «Allah özündən başqa heç bir tanrı olmadığına şahiddir. Mələklər və elm sahibləri də haqqa-ədalətə boyun qoyaraq, O qüvvət və hikmət sahibindən başqa ibadətə layiq heç bir varlıq olmadığına şəhadət verdilər».1

Elm sahiblərinin elmi əqli dəlillərlə əldə olunan elm deyildir. Bəlkə o elm insanın qəlbində olan bir nurdur. Əgər əqli dəlillər qəlbdə olan elmi əldə etməkdən ötrü bir müqəddimə olsa çox yaxşı olar. Əks halda onların özləri də faydasız olacaq və bu işlər üçün ancaq nəfsin paklanmasına ehtiyac vardır.

Allah-Təala bu barədə buyurur: «Allah möminlərə lütf və mərhəmət göstərdi. Çünki onların öz içərisindən özlərinə Allahın ayələrini oxuyan, onları pis əməllərdən pak edib, təmizləyən, onlara kitabı, Quranı və hikməti öyrədən bir peyğəmbər göndərdi».2 Bu ayədə Quranın təlimindən əvvəl paklanıb, təmizlənmə zikr olunmuşdur. Bir kəsin əqli dəlilləri yaxşı bilməsinə baxmayaq, nəfsi pak olmasa heç vaxt həqiqi elm məqamına çata bilməyəcəkdir. Bəsirət gözü hicablı olan şəxs, həqiqəti nə vaxt görəcəkdir?

«Şəhadət verirəm» kəlməsi «şahidlik» mənasındadır. İnsan bu şəhadətlə Allahın vəhdaniyyətinə və Onunla bir yerdə olmasına şahid olmalıdır.

Dərs oxuyan adamın hamısına elm sahibi demək olmaz. Çünki o qədər dərs oxuyan adam vardır ki «elm sahibi» deyildir. Amma əksinə bəzi bisavadlar «elm sahibi»dirlər. Qəlbdə haqqın zühur etməsindən ötrü, insanın qəlbini nurlandıran elm, günəşdən də işıqlıdır. Bu elmə sahib olan kəs, özünün daim Allahla bir yerdə olduğunu dərk edir. «Siz harada olsanız O, da sizinlədir».


Yüklə 1,06 Mb.

Dostları ilə paylaş:
1   2   3   4   5   6   7   8   9   ...   13




Verilənlər bazası müəlliflik hüququ ilə müdafiə olunur ©muhaz.org 2024
rəhbərliyinə müraciət

gir | qeydiyyatdan keç
    Ana səhifə


yükləyin