1 Corinth mite

1 Corinth mite

1Co 1:1 Pathen lungdeiya Christa Jesu solchah dinga kikou Paul le sopi Sosthenes-in,

1Co 1:2 Corinth khoa Pathen Houbung, Christa Jesua kisuthenga, atheng dinga kikou ho le muntin’a um miho, amaho le eiho dinga i-Pakaiyu Jesu Christa min’a kikou chengse henga,
1Co 1:3 i-Pau Pathen le i-Pakaiyu Jesu Christaa konin lungsetna le chamna nahenguva hung lhung hen!
1Co 1:4 Christa Jesu to nakigop jeh-uva nachunguva kipe Pathen lungsetna jeh chun nang ho jal’in phat jousen ka-Pathen kathangvah jing’e,
1Co 1:5 ajeh chu, Amato nakigop’u hin ima jousea, thuseina hihen hetna hijongle nahaosah-u ahitan,
1Co 1:6 nang hoa hi Christa thudol hettohsahna phudet’a aum banga,
1Co 1:7 i-Pakaiyu Jesu Christa hung kiphondoh ding na-nga nauva Lhagao thilpeh chan khel nanei louna diu ahi.
1Co 1:8 Aman nang ho akhon ni, i-Pakaiyu Jesu Christa nikho geiya natuh chah jinguva monabeiya nakoi diu ahi.
1Co 1:9 Achapa Jesu Christa, i-Pakaiyu vanga kiloikhomnaa na-koulut’u Pathen chu kitah tah ahiye.
1Co 1:10 Sopite, nabonchauva nakinopto cheh-uva, nasei jouseu akitha khat’a, lung gel le ngaito kitha khat nahina diuva i-Pakaiyu Jesu Christa min jal’a ka-ngeh nahiuve.
1Co 1:11 Ijeh-inem itile kasopite, nalah-uva kinah baotam alen chu Chloe insung miten kajah a kichentah-in eiseipeh tauve.
1Co 1:12 Kasei chu hiche ahi, nang ho amitakip, “Keivang Paul loi kahi, keima Apollos loi kahin, keima Peter loi kahi, chule keima Christa loi kahi” natiuve.
1Co 1:13 Christa chu kihomtel hitam ? Paul la nang ho din thingpel’a akikhet beh pon, ole Paul min’a baptize chang nahiuvem?
1Co 1:14 Crispus le Gaius tilou nang ho khat beh baptize kachansah loujeh-un kakipah-e,
1Co 1:15 hiche hi koima kei min’a baptize changa nakisei thei louna diu ahiye.
1Co 1:16 Stephanas insung mite vang baptize kachansah nan, hiche kalval vang midang koima baptize kachansah kahepoi.
1Co 1:17 Christan baptize chansah dinga eisol ahipon, Kipana Thupha seiphong dingjoh a eisol ahibouve, Christa thingpel thu chu ahomkeo ahilouna dinga chihna thujong kasei lou ahi.
1Co 1:18 Thingpel thu hi amangthah ho dia ngol kai tah ahin, huhhinga um eiho din vang Pathen thahatna ahi.
1Co 1:19 Ijeh-inem itile Pathen lekhabua kisun chun, “Keiman miching ho chihna kasuh manga, Het themna neiho hetna moh kahisah ding ahi,” ati.
1Co 1:20 Miching hoiya uma, lekhathem hoilam ham? Tukhanga minel them hoiyaba um ham? Pathenin hiche vannoi chihna hi ngolna ahisah lou ham?
1Co 1:21 Ijeh-inem itile Pathen chihnaa hin hiche chihna vannoiyin mangcha Pathen ahetdoh thei lou phat’in, ngol kai thua kigel hiche thu kiseiphong tahsan ho joh huhhing ding hi pha asai.
1Co 1:22 Judaten melchihna a-ngeh-uvin, Greek mihon chihna ahol’ui.
1Co 1:23 Keihon vang thingpel’a kikhenbeh Christa chu kaseiphongu ahi; hiche hi Judate din kipalna ahin, chidang namdang ho dia ngolna ahi;
1Co 1:24 ahinla Juda mi hihen Greek mi hijongle akikoute dinga Christa chu Pathen thahat le Pathen chihna ahiye.
1Co 1:25 Ajeh chu Pathen dia ngol kai chu mihem chihna sangin achingjon, Pathen dia hatmona chu mihem hatna sangin ahatjo nalaiye.
1Co 1:26 Sopite nakikou dol’u chu vetem’un, tahsaphe dol’a ching tah jong nahipouvin, thahat tahbeh jong nahipouve; phunglun laiya mi jong nahideh pouvin ahi;
1Co 1:27 amavang Pathenin vannoiya mimol ho hi miching ho jumso dia alhendoh a, vannoiya mihatmo ho hi mihat ho jumso dinga Pathenin alhendoh ahiuve.
1Co 1:28 Pathenin vannoiya mi lhasamho le nahsahmoa kikoi ho alhen’a, aumsa thil ho imacha lou sosahna dinga aum louhel thil ho geiya aumsah ahi.
1Co 1:29 Hitia hi Pathen angsunga mihing khat cha kiletsah thei louhel ding ahiuve.
1Co 1:30 Pathen vanga nang ho hi Christa to hingkhom nahiuvin Christa chu Pathena kon eiho chihna, them channa, kisuh thengna le lhatdamna ahin,
1Co 1:31 Pathen lekhabua, “Akisonga chu Pakai vangin kisong hen,” tia kisun banga um ahi.
1Co 2:1 Sopite, nahenguva Pathen thuguh phongjal dia kahung chun kamthem le chihna manga hung kahipoi.
1Co 2:2 Ijjeh-inem itile nang ho lah a thingpel’a akhetbeh Pau Jesu Christa tilou ima dang helou hel dinga kihan lho kahitai.
1Co 2:3 Keima nahenguva lhasam tah le kichatah chule kihot hot’a hung kahin,
1Co 2:4 ka-thusei le kathuseiphong chu chihna thugil tah a kisei ahipon, lhagao le athahat phondohna joh ahibouve;
1Co 2:5 hiche hin natahsan’u chu mihem chihna vang hilouva Pathen thahat vanga ahijoh photchetna ahiye.
1Co 2:6 Apilhingsa ho henga vang chihna thun jong kaseiji nauvin, amavang hiche leiset chihna le amangthah ding leiset vaipote chihna jong ahipoi;
1Co 2:7 amavang leiset um masanga Pathenin iloupina diuva gotsa akoi, kiselguh, Pathen chihna thuguh joh chu kaseijiu ahibouve.
1Co 2:8 Hichu hiche leiset vaipote khat chan jong ahepouve, ajeh chu heule loupina Pakai chu thingpel’a akhetbeh louhel diu ahi.
1Co 2:9 Ahinla Pathen lekhabua kisun: “Mit mukhah lou, naa jah khah lou, Mihem lungthima jong lut kha loulai, Pathenin ama ngailuho dinga agonsa chu,” tia kisei bang chun,
1Co 2:10 lhagao amangchan Pathenin eiho henga aphongdoh tai; ajeh chu Lhagaovin thil ijakai akholchil jin, Pathen selguh ho geiyin aholdohjie.
1Co 2:11 Ama sunga cheng mihem, lhagao tilou mihem umdol thil ho chu koipen ham ahea? Hitobang chun Pathen umdol thil ho chu Pathen Lhagao tilou koiman ahepoi.
1Co 2:12 Pathena kona manbei thilpeh eipeh ho’u ihet theina diuva vannoi leiset lhagao ikisanu ahipon, Pathen Lhagao joh ahibouve.
1Co 2:13 Hiti ho chu hilson chihna thu hoa seilouva, lhagaova kihilna dungjuiya Lhagao neiho henga Lhagao thudih kahilchet’uva kaseijoh-u ahi.
1Co 2:14 Tahsa lam mihemin vang Pathen Lhagao thil ho chu akisanjipoi; ajeh chu ama din hichu ngolna ahin, Lhagao dol’a phot chet ding ahijeh-in hejong ahetheipoi.
1Co 2:15 Lhagaova hing mi vangin ijakai aphochen theiyin, midangin vang ama chung thudol atan theipoi.
1Co 2:16 “Ajeh chu koiham Pakai lungthim hea, Ama hil thei ding mi chu?” akiti. Eihon vang Christa lungthim ineiyui.
1Co 3:1 Sopite, Lhagao chenna miho henga bangin keiman nang ho henga thu kasei theipon, tahsaphe mihem, Christa sunga cheng naosen henga sei banga kasei ahibouve.
1Co 3:2 Keiman noitwiya kavah-uva an-ham kapeh loulai nahiuve, ajeh chu nahe thei hih laiyuve. Tujengin iong nahe thei hih laiyui,
1Co 3:3 ijeh-inem itile tahsaphe mihem nahi nalaiyuve. Nalah-uva kithangsetto le, khat le khat kinah kiphun aum laisea chu tahsa mihem hiya mihem chon chon’a chon nahiu hilou ham?
1Co 3:4 Khat’in, “Keima Paul loi kahi,” atia; adang khatman, “Keima Apollos loi kahi,” ati laisea chu namihem chon’u hilou ham?
1Co 3:5 Ahimonga Apollos chu ipi hiya, Paul chu ipi ham? Amani hi lhacha natong, amani jal’a natahsan’u ahin, koijoh ahilhona Pakai thilpeh neicheh ahilhon’e.
1Co 3:6 Keiman kaphu ahin, ahin Apollos-in twi achap’a, Pathenin akhansah ahi.
1Co 3:7 Hichejeh chun aphutpa jong ima ahipon, atwichappa jong ima ahidehpoi; akhansah Pathen bou thupi ahi.
1Co 3:8 Aphutpa le atwichappa akibang lhonin, atohgim dungjui cheh a tohman asancheh lhon ding ahinai.
1Co 3:9 Keini Pathento tongkhom kahi lhonin, nang ho Pathen loulai, Pathen insah nahiuve.
1Co 3:10 Eikipe Pathen lungsetna dungjuiya, insa themtah banga abul kaphu ahitan, midangin achunga asahjom ahi. Asachanin iti asah kivet them hen.
1Co 3:11 Abul kiphutsa Jesu Christa tilou koiman abul dang phutdoh theiponte.
1Co 3:12 Koi ahin hiche abul kiphut chunga chun sa nan sahen, dangkan sahen, song mantamin, sahen lang, thingin sahen, hampa ham changpol hamin sajong le,
1Co 3:13 min atoh cheh chu hung ki-phongdoh ding ahi, ajeh chu nikho khat hin ahinphonjal ding, meiya kiphongdoh cheh a, min atoh cheh chu meiya kipatep ding ahiye.
1Co 3:14 Mi khat natoh a-insah chu adin jou nah leh tohman asan ding;
1Co 3:15 mi khattou anatoh meiyin akahvam vangle tohman asan lou ding, amatah vang huhhing chang ding, meipi pal galkaipa tobang hiding ahi.
1Co 3:16 Pathen Houin nahiuva nasunguva Pathen Lhagao achen chu nahet louvu ham?
1Co 3:17 Khattouvin hiche Pathen Houin chu asuhmang le Pathenin ama asuhmang ding ahi; ijeh-inem itile Pathen Houin chu atheng ahin, nang ho a-Houin chu nahiuve.
1Co 3:18 Koima ama kilhem lha hih hen; nalah-uva khattou tulai khanga dia chinga kigel aumle, achihna din ngoljo hen.
1Co 3:19 Ijeh-inem itile hiche vannoi chihna hi Pathen koma ngolna ahibouve; ajeh chu Pathen lekhabua akisunin : “Aman miching ho chu Ajonchih nauva amudohji,” akitin;
1Co 3:20 Chule avel’in : “Pakaiyin miching ho lung gel jouse Aboncha pannabei ahi ahenai,” akiti.
1Co 3:21 Hijeh chun koima mihemin kisonda hen; ajeh chu ijakai aboncha nang hoa jeng ahin,
1Co 3:22 Paul hihen Apollos hile, Cephas ahin, vannoi ahin, hinna hihen thina hijongle, tupet le khonung geiya aboncha nang hoa ahibouve.
1Co 3:23 Nang ho Christa mi nahiuvin, Christa chu Pathen’a ahi.
1Co 4:1 Keiho hi Christa lhacha, Pathen thuguh chingin min eingaitou hen.
1Co 4:2 Hichea neiching ding kihol’a chu tahsan um hiding ahi.
1Co 4:3 Keidin vang nang hon kachung thu nakhol diu hihen lang mihem thutan nikhoa kikhol ding hijongle, thu neochan bou kagel’e; keiman bon kachung thu kakikholsampoi.
1Co 4:4 Keiman kiphat lamna ding kahepon, hijongle themmona beihel kahi tina ahidehpoi, hichea kachung thu khol chil’a pang Pakai ahi.
1Co 4:5 Hiti ahijeh a chu aphat tep phat, Pakai hung kahsen nang hon koima thu tandauvin, aman muthima kisel thil jouse khovah a aphondoh a, mihem lungthim ngaito chengse jong aphondoh ding ahinai. Chutah le amitakip’in Pathena kona achan ding lom pachatna akisan cheh ding ahi.
1Co 4:6 Sopite, hichengse hi nang ho khohsah jal’a kei le Apollos pan’a nang ho kheldoh goa, Pathen lekhabua “Akisun kalval’in akichon ngaipoi,” ti hi keinia kona nakihil’uva, chule mikhat sonnaa mi khat chun midang khat anahsahmo louna dinga kasei ahi.
1Co 4:7 Ajeh chu koiham nang nachom khen a? Mia nalah lou ipi naneiyem? Nalah ahile ibol’a alalou banga hoithoa kiletsah nahim?
1Co 4:8 Tun nalung nau achimset’in, nabulhingsoh tauve; keiho beiya leng chang gam nahitauvin, keiho to leng ichan khom theina diuvin leng chang tahbah hileu chun kati tave!
1Co 4:9 Ipijeh-inem itile vannoi le Vantilte chule mihemte vetchah bep dia amangthah dia umsa mihem ho banga Pathenin keiho Solchah ho hi anukhah pen’a eikoidan’uvin kagel’e.
1Co 4:10 Christa khohsah jeh a keiho a-ngol kahiuvin, Christa sunga cheng nang ho vang nachingui; keiho kadoiyun, nang ho nahat’uve; nang ho gin le jabol nahiuvin, keiho mi not thap’in ka-um’ui!
1Co 4:11 Tugeiyin jong gilkel dangchah kathoh-un, nihchen ponsil bei, mi khut thah lhauna, chenna intum neilou kahiuve;
1Co 4:12 kakhut nin chol le nangin na katong gim’un, eihousete phatthei kaboh-un, min eibol genthei tengu kathoh ham ham’un,
1Co 4:13 min kallah a eihou tengule lungdamsel’in kahouvun vannoi kithenhonna bangin ka-umdoh tauvin, tugeiyin mitin kilepnan ka-umdoh tauve.
1Co 4:14 Nang ho jumsona ding hilouva kasah tah kachate banga nang ho hilchahna joh a hicheng hi kahinsut ahibouve.
1Co 4:15 Christa dinga nahil’uva sangsom neijeng jong leu chun pa tampi naneipouve; ajeh chu Kipana Thupha jeh a Christa Jesu dinga kahinsa nahitauve.
1Co 4:16 Hichejeh a chu ka-ngeh nahiuve, keima umchan jom hiuvin.
1Co 4:17 Hiche dinga hi Timothy nahenguva kahinsol ahi, ama hi Pakaiya tahsan um kasahtah kachapa ahin, aman muntin le Houbung jousea kahilleji, Christa Jesu hinkhoa kachon namlhah aboncha nageldohsah diu ahi.
1Co 4:18 Nahenguva kei hi hung lou dia gel’a nalah-uva kiletsah hoitho mi na-um’uvin,
1Co 4:19 Pakai lungdei ahile keila nahenguva hungvah jel ding kahi; chutengle hiche mi kiletsah ho thusei mai hilouva atha neina geiyuva kahetdoh ding ahi,
1Co 4:20 ajeh chu Pathen lenggam chu, thuhomkeo ahipon, tha neina ahi.
1Co 4:21 I-ham nadeiyu? Mol choiya, nahenguva kahung ding ha, ngailut neiya lhagaova lungnemtah a ka-hungjoh ding ham?
1Co 5:1 Nalah-uva jon thanhoi um kichentah-in akijan, hitobang jon thanhoi hi chidang namdangte lah jenga jong umji lou ahi; hichea hin mi khat’in apa ji jin aneiye.
1Co 5:2 Hitobang thilbol natongpa chu nalah-uva kona paidoh ahitheina dinga lunggimpijo talouva ibol’a kiletsah hoithojo nahiuvem?
1Co 5:3 Tahsaa ka-um lou vangin lhagaovin nalah-uva kalhan, nalah-uva lha mong bangin hitobang thilbolpa chung thu chu katan chaiyin,
1Co 5:4 i-Pakaiyu Jesu minin nang ho to kalungthimin ikihou khom’un, i-Pakaiyu Jesu thahat’in
1Co 5:5 Pakai nikho ni le alhagao huhhinga aum theina din hitobang mi hi atahsa suhmangna dia Satan henga napehdoh diu ahi.
1Co 5:6 Nakiletsah-u hi aphapoi. Chol themchan changlhah lhon pumpi achansohji nahet louvu ham?
1Co 5:7 Cholsolou nahijeh-un, changlhah lhon thah nahitheina diuvin chollui chu then ngimsel’uvin. Ijeh-inem itile i-kalchuh kut’uva din Christa kelngoi tha’n akithattai.
1Co 5:8 Hichejeh chun chollui le gitlouna le thilse bolna chol mang louvin, cholsolou, thenna le thutah changlhah joh-in kut bol’u hite.
1Co 5:9 Kalekha thotnaa chun jon thanhoi bol ho to nakivop khom louna diuvin kahinsuntai;
1Co 5:10 hiche vannoiya jonthanhoi bol ho le neipap kilose ho chule misumang ho le doihouho kati ahipoi, achutilou le vannoiya kona napotdoh diu ngai ding ahi.
1Co 5:11 Tua nakivoppi lou diuva kasut ho chu sopia kisimsa khattouvin jonthanhoi, neipap kiloset abol’a, doi ahouva, Pathen ataitoma, ju akham’a chule mi anambol le, hitobang mi chu kiloikhompi lou ding kati ahi.
1Co 5:12 Polam miho thutan ding ka-ilouna ham? Asunga umho thubou natan jiu hilou ham?
1Co 5:13 Polam mite thu Pathenin tan nante. Pathen lekhabua kisei bangin, thilse bolpa vang nalah-uva konin paidoh jengun!
1Co 6:1 Nang ho koi nahiuva khat’in achom khat chunga thu aneitengle mitheng ho angsunga kiheh ding go louva mithenglou chidang namdang ho henga heh ding nangap chat jeng jiu ham?
1Co 6:2 Mithengten vannoi thu geiya atan diu jong helou lai nahiuvem? Chutia vannoi thubon natan diu ahile thu neocha tan dia kilommo nahiuvem?
1Co 6:3 Leiset hinkho thu titah louva Vantilte thu geiya itan diu nahet louvu ham?
1Co 6:4 Chutia leiset hinkho thudol’a thu tanding nei nahiule Houbung sunga pamse miho chu thutan dia natousah jengu leh iti am?
1Co 6:5 Najachatna diuva hiche hi kaseikhum nahiuve. Nalah-uva sopicha kah a thu chai thei miching khatbeh umlou hitam?
1Co 6:6 Chutia chu sopi khat chun sopi khat aheh a atahsanlou ho ang’a kiheh jeng lhon ham?
1Co 6:7 Hitia khat le khat nakihehtosau sauvu hin apumthon nahiu aphongtai; dih hih jongle nathoh gimjoh-u phalou ham? Kitoh lou hijongle nakido jenguva phalou ham?
1Co 6:8 Hichea hi nang ho adih louva kibolgim’a kitoh louva kichom gam, sopite geiya chutibol nahiuve.
1Co 6:9 Midih louvin Pathen lenggam alo lou diu ahi nahet lou laiyu ham? Lhep chatvaiyin um hih-un; jonthanhoi bol ho, doi houho, mito jong ho, pasal le pasal, numei le numei jongho,
1Co 6:10 gucha ho, neipap kilose ho, jukham ho, mihanse ho, michomhat ho khat chan jong Pathen lenggam alo louhel diu ahi. Nang ho abang bang hitobang chu nahiuvin, hijongle Pakai Jesu Christa min le i-Pathen’u lhagaova
1Co 6:11 kisop ngim’a kithensoa them kichansah nahitauve.
1Co 6:12 Keidin thil ijakai bolngai ahin, ahinla abonchan thilpha asohdoh deh poi. Keidia thil ijakai bolngai ahivangin imacha noiya lut pong’e.
1Co 6:13 Khattouvin an hi oisunga lut, oisung hi ankholna ahi tinte; ahinla Pathenin agoma asuh bei ding ahi. Mihem tahsa hi jonthanhoi bolna ding ahipon, Pakai dingjoh ahi, chule Pakaiyin jong tahsaa ding agelnai.
1Co 6:14 Thinaa kona Pakai kaithou Pathen chun eiho jong athahat pan’a eikaithou diu ahi.
1Co 6:15 Natahsau chu Christa tibah khat ahi naheuve. Hichea hi Christa tibah chu kalah manga noti tibah a kasemdoh ding ham? Hithei naisai ponte!
1Co 6:16 Notinu toh kijopmatpa chu amanu to tikhat ahilhon helou lai nahiuvem? Ajeh chu Pathen lekhabun kichentah-in, “Amani chu tikhat hilhon ding ahi,” tin aseiye.
1Co 6:17 Hichea hin Pakai to kijopmatpa jong chu Ama to Lhagao khat ahilhontai.
1Co 6:18 Jonthanhoiya konin jam’un; mihemin chonsetna abol adang jouse chu atahsa polam ahin, jonthanhoi bolpa vang chu ama tahsa chunga chonse ahi.
1Co 6:19 Natahsau hi Pathena kona naneiyu nasunguva cheng Lhagao Theng Houin ahi, chule nang ho hi nang hoa nahilou lam helou nahiuvem?
1Co 6:20 Nang ho man kipea chohsa nahitauvin, hijeh chun natahsauvin Pathen choian’uvin.
1Co 7:1 Lekha nahinsut thudol’uva hin, pasal’in numei amai louhel ding thilpha ahi;
1Co 7:2 jonthanhoi atamtai, pasal’in numei, numeiyin jong pasal ji kinei cheh hen.
1Co 7:3 Pasal’in numei chu achan ding lom pehen lang, hitobangma chun numeiyin jong ajipa pehen lung nachim lhon hen.
1Co 7:4 Numeiyin ama tahsa chunga tha aneipon, pasal’in aneijoi; chutobangma chun pasal’in jong ama tahsa chunga tha aneipon, numeiyin bou aneiye.
1Co 7:5 Phat chom khat taonaa nakipeh theina diuva nakidondauva nahung kivop khom kit loi diu nakinopto gel’u tilouvin khat le khat don louvin kikoi hih-un, chutile kitimlel jeh a Satanin nalhep lhah lo diu ahi.
1Co 7:6 Hiche hi phatsah thua kasei ahin, thupeh dungjui ahipoi.
1Co 7:7 Mihem jouse keima tobang hicheh le kadeiyin, ahinla min Pathen Lhagao thilpeh ama chan anei cheh-ui, khat’in itobang, achom khatman khutobang aneiye.
1Co 7:8 Jinei louho le meithaiho kasei ahi, amaho chu kei bangin umleu aphai;
1Co 7:9 amavang akitimjou lou diu le ji aneijoh diu ahi, moh huh sangin jinei aphajoi.
1Co 7:10 Jineisa ho chu thu kapeh nahiuve, (Keima hijo louva Pakai ahi) numeiyin ajipa ajamsan louhel ding ahi,
1Co 7:11 ajamsan tah bah jongle jinei louva um ding, ahiloule ajipa to kihoucham kit lhon hen, chule pasal’in numei ada louhel ding ahi.
1Co 7:12 Adang ho henga, Pakai hilouva, keisei ahi, sopi khattouvin a tahsan lou numei jia aneiya, numei chu amatoh chen khom jing ding anop le, ajipan da hih hen;
1Co 7:13 chule numei khattouvin jong atahsan lou pasal jia aneiya, pasal chu amato chen khom jing ding anop le, aman pasal chu da hih hen.
1Co 7:14 Atahsan lou pasal chu numeinu to ahinkhom jeh a akithenso ahitan, atahsan lou numei jong chu sopipa to ahinkhom jeh a kithenso ma ahitai, chutilou hile nachateu chu boh diu ahin, tua vang akithenso ahitai.
1Co 7:15 Ijemtia atahsan loupan adalhah vangle dalha jeng hen, hitobang thua hin sopipa hihen sopinu hijongle akikan lou ahitai, ahinla Pathenin kichamdel dia eikouvu ahi.
1Co 7:16 Hijeh a chu ipi nahet em numei, pasal nahoidohsah ding hinam? Chule Pasal’in ipi nahet em, numei nahoidohsah ding hinam?
1Co 7:17 Mitakip Pakaiyin chan ahoppeh dungjui le mitakip Pathenin akoudoh dungjui banga achonlou khoh ahi, hiti dinga chu Houbung jousea chondan kasem ahitai.
1Co 7:18 Cheptansa kikou koiham? Selmang dahen. Cheptan louva kikou koiham? Cheptan din gotda hen.
1Co 7:19 Cheptan jong ima ahipon, cheptan lou jong imachom ahidehpoi, Pathen thupeh nit bou thu ahi.
1Co 7:20 Mitakip akikou pet’a bang cheh-in um cheh hen.
1Co 7:21 Nakikouva chu soh nahim? Ima gel khoh dan, amavang nachamlhatdoh thei le hichu mangcha jon.
1Co 7:22 Ijeh-inem itile soh ahipet’a Pakai dia kikou chu Pakaiya chamlhat ahin, hitobangma chun chamlhat ahipet’a kikou chu Christa soh ahi.
1Co 7:23 Man pea kichosa nahitauve, mihem soh-in pang kit hih-uvin.
1Co 7:24 Sopite, amitakip akikoupet tobang cheh-in hiti chun Pathen angsunga um cheh hen.
1Co 7:25 Nu-ngah ho thudol vang Pakaiya konin thupeh kaneipoi, hijongle Pakai hepina jal’a tahsan tah a keiman kagel khat kasei ahi.
1Co 7:26 Pha kasah chu ahile tulai hesoh gentheina jal hin mihem ama aum bang banga aum jeng ding pha kasai.
1Co 7:27 Numeito kisomlhopsa nahim? Onthol ding gotdan; numeiya kona ongdoh nahim, numei holdan.
1Co 7:28 Jinei jongle chun achonsea vang nahipoi, nu-ngah jeng jong ajineiya chu chonsea ahipoi. Amavang jinei hon tahsa genthei hesoh athoh diu ahin, hichu kapeldohsah nom nahiuve.
1Co 7:29 Ahinla hiche hi kaseipeh nahiuve sopite, phat anaitai, tukal’in jineisa chengse jong jinei lou bangin,
1Co 7:30 akapte chu kap lou bangin, akipahte kipah lou bangin, thil kichohten jong imacha nei lou bangin,
1Co 7:31 vannoiya natong thilbol’an jong imacha bol louhel bangin um hen; ijeh-inem itile hiche vannoi hi alim-agong akitolmang jing’e.
1Co 7:32 Lungkham louva naum diu kadeiye. Jinei loupan Pakai jeng agel’in Pakai lung lhai ding bou agel’e.
1Co 7:33 Jineisan vang vannoi thil ho agel’in, ajinu lung lhai ding agel’in;
1Co 7:34 hijeh chun akikhenna aum’e. Numei jineilou nungah chun Pakai kinbol ding jeng agel jin, tahsa le Lhagaova kithenso ding adeiye; ahin jineisa numeiyin vang vannoi thil ho jeng angaiton ajipa alung lhaina ding angaitoi.
1Co 7:35 Hicheng hi nang ho khichahna ding hilouva naphat chomna diu le khen beihel’a Pakaiya kitup keicha naum jing theina diuva kaseipeh nahiuve.
1Co 7:36 Koiham khat’in kitimatpi lou dia akiloipi agolnu akivoppidol kitoh lou asah a, akitimlel behseh a, ikhat aso tei ding le, kicheng lhon hen, alungdeiyin bol jeng hen, chonsea ahipoi.
1Co 7:37 Amavang koi hile alung sunga dettah a dinga, kitimlelna neilou, alunggulse thu nun theiya, alunggil’a pangdet’a agolnu kitimatpi louva koijou chu thilpha bol ahi;
1Co 7:38 hiti hin agolnu kichenpipa jong thilpha bol ahinan, ahivangin akichenpi loupan thilpha cheh abol ahiye.
1Co 7:39 Ajipa ahin laisea numei chu akihen ahin, ajipa thi teng vangle a-ongthol ahitan, Pakai lungdei adei dei to kicheng thei ahitai.
1Co 7:40 Ahinla keima ngaiton vang achuti moh um jeng thei le nomsa jonte, ajeh chu keijong Pathen Lhagao changa kigel kahi.
1Co 8:1 Doihouna kinei neh le chah thudol’a vang, ijakai hetna inei bukimsoh-un ihesoh keiyui. Hetna vang hin mi kiletsah hoithona apensah jin, ngailut nan vang mi akhantousah ji’e.
1Co 8:2 Mi khattou i-them khat hea akigel le ama chun ahet ding dol jeng jong akihet lou lai ahibouve.
1Co 8:3 Amavang koi tobang khat’in Pathen angailut le ama chu Pathen hetmi ahitai.
1Co 8:4 Doi houna kinei neh le chah thudol’a vang vannoiya limsemthu doi hi ima ahipon, chule Pathen khatseh tilou adang aumlou jong i-hesoh keiyui.
1Co 8:5 Ijeh-inem itile vanlaijol le leiset chunga pathen kisah ho um’u hen lang, hiti chun pathen tampi le pakai tamtah hijong leu,
1Co 8:6 eiho din vang thil jouse konna le eiho geiya Amaa ihiu Pa Pathen khatseh le thil jouse amavanga um eiho jong Amavanga hing, Pakai khatseh Jesu Christa bou ahi.
1Co 8:7 Ahinla mi jousen hiche hetna hi aneipon, abang khat’in doihou lai umchan tugeiya achinjeh-un aneh achah-u chu doihouna kinei mongin agel’un, alung gelnau tha alhomjeh-in hichea hin akisuhboh lo jitauve.
1Co 8:8 Ahin anneh chun Pathen kom einaisah chom diu jong ahipon, ne hih jongleu hen kemchom lou nejongleu hen phatchompi deh lou ihiuve.
1Co 8:9 Hijongle hiche natha neinau hi alhasamte dia kipal lhuhna ahilouna din ching theiyun.
1Co 8:10 Ijeh-inem itile hetna neisa nangin doihouna ankong naum chu lhahsamna nei min namudoh le, lhasam tah ahivanga alung gel’a doihouna an neh ding kitilkhou lou ding ham?
1Co 8:11 Hijeh a chu hiche sopi hetnaa lhasam, ajal’a Christa thipeh mi chu nang hetnan asuhmang ahitai.
1Co 8:12 Hitobang hin sopite dounan chonseuvin lang alung gel’u hat lou chu suhnat peh leu chun Christa douna chonse nahiuve.
1Co 8:13 Hijeh chun kasopi kipallhuh louna din, neh le chah a kasopi akipal lhuh ding le a-itih chan geiyin sa asan neh dange.
1Co 9:1 Chamlhat kahilou ham? Solchah kahilou ham? I-Pakaiyu Jesu mu lou kahim? Nang ho hi Pakai dia katohga nahilouvu ham?
1Co 9:2 Midang din solchah hi hih jong leng nang ho din kahi; ajeh chu solchah kahina mohor chu Pakai hinkhoa nang ho hinna hi ahi.
1Co 9:3 Hiche hi einelkal ho henga kakihonna ahi.
1Co 9:4 Nehna ding le donna dia thunei mo kahiuvem?
1Co 9:5 Solchah dang ho le Pakai sopite chule Cephas banga atahsan numei jia kipuile dia thanei lou kahiuvem?
1Co 9:6 Ahiloule kei le Barnabas hin natong louva kivahna thei tha kanei Ihon lou ham?
1Co 9:7 Ama sum kisan’a sepai natong koiham? Lengpilei bol’a aga nelou koiham? Ahiloule kelngoi hon ching’a panga kelngoi noitwi nelou koiham?
1Co 9:8 Hicheng hi mihem ngaidol’a kasei hilou ham? Ahiloule hicheng hi Danthun jong asei hilou ham?
1Co 9:9 Ijeh-inem itile Mose Danthua chun, “Bongchal chang chilpet muh na-kan lou ding ahi,” tin akisun’e. Pathenin bongchal ho akhohsah mong ham?
1Co 9:10 Hichengpi keiho khohsahna asei hilou ham? Ajeh chu keho jal’a kisun ahi; ajeh pen tah chu loukaiyan kinepna neiya akaitei ding, chang chil’an jong chan akisan ding kinem’a achil ding ahi.
1Co 9:11 Keinin nang ho dia Lhagao muchi kitupeh a, nang hoa kon’a leiset thil kakisan lhon ding chu keini dia thupi tah ham?
1Co 9:12 Midang hon nachunguva thu anei theile keihon kahanei cheh joh lou diu ham? Ahivangin keihon hiche thuneina chu kamangpouve; Christa thudol Kipana Thupha imachaa kasuhmo louna diuvin ijakaiya kathoh ham ham jo’uve.
1Co 9:13 Houin lhacha kinbol hon Houin’a kona neh le chah akijon’uva, chule maicham phunga lhachasen jong maicham’a kitoh thil hoa chan aneijiu khu helou nahiuvem?
1Co 9:14 Hitobanga chu Kipana Thupha lhangsam hon jong Kipana Thuphaa kona kivah hingna anei diuva Pakaiyin thu alhuhsah ahi.
1Co 9:15 Ahinla ken hiche ho hi khatcha jong kamangchapoi. Hichengse chu hitia chu kachan theina dia jong kahinsut ahipoi; ajeh chu kaki-sonna hi khattouvin ahomkeo asosah sangin thileng keidin aphajoi.
1Co 9:16 Kipana Thupha seiphongle jong leng keidia kisonna ahidehpoi, kabollou khoh eikisekhum ahibouve; ajeh chu Kipana Thupha sei-phong louva um hileng keidia iti khoh a khoh ding hitam!
1Co 9:17 ijeh-inem itile keima lungchama bol’a kahile tohman kasan ding hintin, ahinla kachama tong kahiloujeh-in katoh ding lom kin eikisekhumjo ahi.
1Co 9:18 Ahile katohman chu ipiba ham? Kipana Thupha chu manbeiya seiphonga aum theina ding le hiche Kipana Thuphaa keiman katha neina kachan lom chu lhingset’a kangeh louna ding ahi.
1Co 9:19 Keima mi jousea kona chamlhat kahitah vangin mi tamcheh kalah lut theina din kei le kei mitin soh a kisemdoh kahin,
1Co 9:20 Judate tah lut theina din Judate lah a Juda mi umin ka-umin, Danthu noiya um miho kalah thei nan, Danthu noiya ka-um lou vangin Danthu noiya umte bangin ka-umjie;
1Co 9:21 Dan neiloute kaloilut theina din Dan neiloute henga Dan neilou bangin ka-umjin, amavang Christa Danthua um kahin, Pathen Dan mang lou kahipoi;
1Co 9:22 mi lhasamte kalah lut theina din alhasamte henga alhasam bangin ka-umjin ahi; hitia hi mi phabep kahuhhing theina dia mitin henga ijakai kahiji ahi.
1Co 9:23 Aboncha hi Kipana Thupha khohsah jal’a kabol’a, hichea chu chan kaneidoh theina ding ahi.
1Co 9:24 Lhaitet golseh mun’a khu mi jouse alhai cheh vanga mi khat’in bou hatman asanji nahet louvu ham? Hitia chu nasan theina diuvin lhaiyun.
1Co 9:25 Golseh bol jousen ijakaiya atibah chengseu atimhat jiuvin, hiche ho hin kem mangthei lallukhuh san na dia abol’u ahin, eihoa vang kem thei lou ahi.
1Co 9:26 Hitia chu lhaiya kahin, abidoi kicheh neilou kahipon, onghom lai khuttum’a sua jonji kahipoi.
1Co 9:27 Midang henga thu kiseiphonglea ajo le keima lah louva ka-um louna dia katahsa hi kachup chup’a thua kanunsah ahi.
1Co 10:1 Sopite ima hetoh louva naum diu kadeipoi, ajeh chu ipu ipateu chu abonchauva meilhang noiya kijot’a, Twikhanglen pal galkai ahiuvin,
1Co 10:2 chule abonchauvin Mose nungjui ahiu hetnan meilhang lah le Twikhanglena baptize achangui;
1Co 10:3 abonchan Lhagao an thakhat anekhom’un,
1Co 10:4 abonchauvin Lhagao twi thakhat adonkhom’ui; ajeh chu anung jui jing Lhagao songpia konin twi adon’un, hiche Songpi hi Christa chu anahi.
1Co 10:5 Ahinla alah-uva mi kon khat chunga Pathen alung lhai loujeh-in gamthip laiya alhukamtauve.
1Co 10:6 Amahon alung gul banguva thilse ilung gul louna diuva thilsoh hichengse hi eiho hilchahna soh ahitai.
1Co 10:7 Pathen lekhabua, “Mipi chu anne ding le twidon din atouvun ahinla lam din akipatdoh kittauve,” tia kisun bang chun alah-uva kon- khat bangin limsemthu doi houdauvin.
1Co 10:8 Alah-uva mi phabep’in jonthan hoi apat jeh-uva nikhat sungseh a mihem sang som ni le sang thumin athi lo jeh-in jonthanhoi bol poute.
1Co 10:9 Alah-uva mi konkhat’in Pakai apatep jeh-uva gulsen achuh lihgam jeh-in eihon patep pou hite.
1Co 10:10 Alah-uva abang bang akiphin jeh-uva misumang Vantil’in asuh mangjeh-in kiphin hih-uvin.
1Co 10:11 Achunguva thilsoh hichengse hi vetkah dinga soh ahin, chule khang nu nunga mi eiho pho tangna dinga kisundoh ahiye.
1Co 10:12 Hichejeh chun koi hile adinga kigel’an alhuh louna din ching thei hen.
1Co 10:13 Mihem doulel lhepna nachunguva achukhapoi, Pathen tahsan umtah ahin, nathan adoujou kalval’in lhepna nachunguva chuhsah ponte, chule lhepna chuto ki lhon’a nathoh jouvuva nahoidohna diu lampi nasempeh diu ahi.
1Co 10:14 Hichejeh chun ka-ngai tahte, doihou jamsan’un.
1Co 10:15 Lung khomto mi nahijeh-uva kasei ahi, nang hon kigel toh-uvin.
1Co 10:16 Phatthei channa khon’a phattheiboh i-ngeh tengu, hiche hi Christa thisan donkhomna hilou ham? Chule changlhah ihebaljiu khu Christa tahsa changkhomji ihilouvu ham?
1Co 10:17 Hichea hin changlhah pheng khatseh ahin, eiho tampi jong hi tahsa khatseh ihiuve; ijeh-inem itile ibonchauva changlhah pheng khat changkhom ihiuve.
1Co 10:18 Tahsa dol’a Israel khu veuvin; maicham thilto neho khu maicham thil changkhom cheh hilou ham?
1Co 10:19 Ipi kaseiyem? Doi houna kinei neh le chah chu ikhat ahi katia; ahiloule limsemthu doi khu ikhat ahi katim?
1Co 10:20 Katipoi, chidang namdangten kithoina aneiyu chu thilhaho apeh-u ahin, Pathen apeh-u ahipoi, hijeh a chu thilhaho to chan naneikhom diu kadeilou ahiye.
1Co 10:21 Nang hon Pakai khon le thilhaho khon’a nadonkop thei lou diu, Pakai dokhang le thilhaho dokhanga ankong na-umkhom thei lou diu ahi.
1Co 10:22 Ahiloule Pakai chu thangset sahna dia iphin lung hang diu ham? Ama sangin la ihatjo pouvin!
1Co 10:23 “Ijakai bolngai ahi,” akitin, ahinla aboncha khantouna ahideh-poi.
1Co 10:24 Koiman ama changseh phatna ding hol louvin midang phatna ding holjo hen.
1Co 10:25 Kailhang sajohna mun’a thil kijoh ipi hile hetchetna dia dongtoh le louvin nejengun.
1Co 10:26 “Ijeh-inem itile leiset le asunga um jouse hi Pakaiya ahi,” tin akiseiye.
1Co 10:27 Pathen tahsanlou min an nea nakouva nache nom’u le na-angsunguva aluichan chu hetchetna dongtoh le louvin nejenguvin.
1Co 10:28 Amavang, “Hiche hi doiphunga kithoina sa ahi,” atile, naseipeh pau jeh le lung gel’a hetchetna aumtah jeh-in neh dauvin,
1Co 10:29 nang lung gel’a hetchetna mai kasei ahipon, khatpa joh a chu kasei ahi. “Iti keima chamlhatna chu midang lung gel maiyin atuh oh thei ding ham?
1Co 10:30 Keiman lung lhaisel’a kisanga, thangvah puma kasan chu kon eitaitompeh ding ham?” tin nate.
1Co 10:31 Hichea hin neuvin don jong leu chun nabol jouseu Pathen loupina din bol’uvin.
1Co 10:32 Judate hihen Greek miho hile chule Pathen Houbung mite dia kipal lhuh nan um dauvin lang,
1Co 10:33 keiman kachangseh a phatchomna ding hol louva, ijakaiya mitin lung lhaina kahol’a huhhinga aum theina diu kabol bangin bol’uvin.
1Co 11:1 Keiman Christa umchan ka-jop bang hin keima umchan jom-uvin.
1Co 11:2 Keima neigeldoh jinguva nang ho kapeh kihilna chengse natuh chah jing jeh-uvin nang ho kaseiphai.
1Co 11:3 Hichea hin Christa mitin luchang ahiya, pasal numei luchang chule Christa luchang Pathen ahidol hi nahet diu kadeiye.
1Co 11:4 Pasal koi hile lukhuh khuh puma taova ha, ahiloule gaothuseiya ham chun aluchang Christa i-asah lou ahin;
1Co 11:5 numei koi hile lukhuh louva taova ha, ahiloule gaothuseiya ham jong chun aluchang ajipa i-asah lou ahi, amanu chu alu kiveltol nu tobangma ahibouve.
1Co 11:6 Numeiyin lukhuh akhuh lou ngal ding le asam kivotol hen, sam kivotol chu numei dinga jachatna ahile lukhuh akhuh a phajeng ahi.
1Co 11:7 Pasal vangin Pathen lim le loupina aput jeh a lukhuh akhuh lou ding ahi; numeiyin pasal thupina aphondoh ahi.
1Co 11:8 Ijeh-inem itile pasal hi numeiya kondoh ahipon, numeijoh pasal’a kondoh ahibouve.
1Co 11:9 Chule numei khohsahnaa pasal kisem ahipon, pasal khohsahna joh a numei kisem ahi.
1Co 11:10 Hijeh a chu Vantilte jal’a numeiyin ajipa noiya ahi chu aluchanga achin ding ahi.
1Co 11:11 Ahinla Pakaiya hinkhoa hin pasal beiya numei ima ahipon, numei beiyin jong pasal ima ahipoi.
1Co 11:12 Ajeh chu pasal’a numei akondoh banga pasal jong numeiya peng ahi, ahinla thil ijakai Pathena kon cheh ahiye.
1Co 11:13 Nang hon geltoh-uvin, numei lukhuh khuh louva Pathen henga ataoji chu kilom nam?
1Co 11:14 Pasal dia sam hoisao hi ama dinga nahsahmona ahi, thil umdol mongin jong nahil louvu hiya,
1Co 11:15 numei dia samsao hi thupina ahi umchanin nahil louvu ham? Ipijeh-inem itile samsao chu akhujol dinga kipe ahi.
1Co 11:16 Ahinla koitobang anel’a aumle, hiche thudol’a hin eihon chonna lhongpi mong ineipouvin, Pathen Houbungten jong aneipoi.
1Co 11:17 Hiche hilchahna kapeh diuva hin kaseipha pouve, ajeh chu phat jep jepna dia kikhom hilouvin setna cheh joh dia kikhom nahiuve.
1Co 11:18 Amasa penin nang ho Houbunga nahung kikhopji tengule loitum tuma nakikhenjiu thu kajan, tahjong katahsan thim thim’e.
1Co 11:19 Nalah-uva lah thei tah miho ahung kiphondoh a hetdoh a aum theina diuva nasunguva lung gel ngaito chom jong um ding mong ahinai.
1Co 11:20 Ahinla mun khat’a nahung kikhop khom tengule Pakai jan anjon nehna ding dol ahipoi,
1Co 11:21 ajeh chu amitakip’in ama jan an cheh akineh masah jin, abang khat’in kel athoh jin, adang khatma akham avan aum’e.
1Co 11:22 Nehna ding donna ding in neilou nahiuvem? O-le Pathen Houbung chu nahsahmoa bol’a aneiloute jachatsah nahiuvem? Ipi kaseipeh diu ham? Kaseiphat diu ham? Hiche thua vang pahcha pouving’e.
1Co 11:23 Pakaiya kona kalah nang ho kapehson’u thuhil chu hiche ahi, Pakai Jesu apehdoh jan chun, aman changlhah alan,
1Co 11:24 phatthei aboh jouvin aheh bal bal’in, “Hiche hi nang ho khel’a pang katahsa chu ahi, neihet jingna diuvin bol’un,” ati.
1Co 11:25 Hitobangma chun jan anneh jouvin khon chu alan, “Hiche khon hi kathisan’a kitepna thah ahi, nadon chan’uva keima neigeldoh jingna diuvin bol’un,” ati.
1Co 11:26 Ijeh-inem itile hiche changlhah naneh-uva hiche khon’a nadon laiseuva ahung kit kahsea Pakai thina chu naphondoh jingu ahi.
1Co 11:27 Hijeh chun koi hile alam louva changlhah chu nea ha, ahiloule Pakai khon’a kona don ham chu Pakai tahsa le thisan douna chonsea kisim ding ahi.
1Co 11:28 Mihem ama cheh kikhol chil hen lang akikhol dungjuiyin changlhah chu nehen, khon’a konin jong don hen.
1Co 11:29 Ijeh- inem itile Pakai tahsa chu ipi kiseina ahi helouva nea don’a chun, aneh a adon’a kona achung thu akitan ahi.
1Co 11:30 Hichejeh a chu nalah-uva mi tamtah chatmoa na-chea ahin, a-ihmu mil’a jong atam lheh tai.
1Co 11:31 Eiho kikhoi chil masa leu hen thutanna ichuh khah lou diu ahi;
1Co 11:32 hijongle vannoi to ithuu akitan tha louna din Pakaiyin eikholchil’uvin eigah chah tauve.
1Co 11:33 Hijeh chun kasopite, ane dinga nahung kikhop tengule khat le khat ki-ngah khom’uvin.
1Co 11:34 Nahung kikhop tengule thutanna na-chuh louna diuvin, koi hile agilkel’a chun a-in’a hin kineh hen. Thudang dang ho thudol vang kahung tengle sutoh nang’e.
1Co 12:1 Sopite, Lhagao thilpehdol helouva na-um diu kanompoi.
1Co 12:2 Chidang namdang nahi laiyuva chu limsemthu doi paomo ho noiya kun’a, hiche ho chun napui mangjiu naheuve.
1Co 12:3 Hijeh a chu kahetsah nahiuve, Pathen Lhagao puihoi mi koiman, “Jesu gaosap chang hen,” atipon, chule Lhagao Thenga kon louvin koiman, “Pakai Jesu,” atitheipoi.
1Co 12:4 Lhagao thilpeh tampi aum nan, ahinla apea Lhagao khat bou ahi;
1Co 12:5 chule lhacha natoh tampi aum vangin Pakai khatseh bou ahiye;
1Co 12:6 chuma le natoh gotchom chom aumin, ahinla Pathen khatseh bou ahin, aman thil hichengsea chu na atohji ahibouve.
1Co 12:7 Amitakip hi japi phat touna dia Lhagao kiphondohna hetna thilpeh khat cheh kipea ahi.
1Co 12:8 Ijeh-inem itile hiche Lhagaova kona chu mi khat chihna thu kipea, michom khat chu hiche Lhagaoma maa kona chu hettheina thu kipea,
1Co 12:9 achom khat jong hiche Lhagaova kona hi tahsan kipea, hiche Lhagaova kon kit’a hi midang khat damsah theina Lhagao thilpeh kipea,
1Co 12:10 midang khat chu thil kidang bol theina kipea, adang khatma gaothu seitheina kipea, mi khatma chu Lhagao le Lhagao dat khen themna kipea, khat jong paotin tang hetna kipea, khatma paotin tang ledoh jouna kipea ahin,
1Co 12:11 ahinla hichengse bol’a chu hiche Lhagao khatseh chu ahin, aman angaito le adei dungjuiya amichan cheh a ahoppeh ahi.
1Co 12:12 Tahsa pumkhat sunga tibah tampi aumin, tahsa tibah tampi ahivangin tipum khat bou ahi, Christa jong chuti ahiye.
1Co 12:13 Ajeh chu eiho Juda mi hiu hen Greek mi hijongleu hen, soh hiu hen chamlhat hijongleu hen, Lhagao khat’a dia ibonchauva tahsa khat’a baptize changkhom, Lhagao khat’a dia ibonchauva donkhom ihiuve.
1Co 12:14 Ijeh-inem itile tahsa hi tibah khatseh ahipon, tampi ahibouve.
1Co 12:15 Kengphang hin, “Khut kahiloujeh-in keima tipuma kahipoi,” tile hiche vanga chu tipuma hida deh lou ding ahi.
1Co 12:16 Chule bilkol hin, “Mit kahiloujeh-in keima tipuma kahipoi,” tile hiche vanga chu tipuma hida deh lou ding ahi.
1Co 12:17 Tahsa pumpi hi mit hita le hoiya khojahna um ding ham? Apumpin khojahna hita le hoiya gimnam jahna um ding ham?
1Co 12:18 Tua vang Pathenin tibah ho hi khat khat’a tahsa puma adeina lai mun cheh a aphulut ahi.
1Co 12:19 Aboncha hi tibah khatseh hita le tipum hoiya umtan tem?
1Co 12:20 Tua vang tibah atam vangin tipum khat bou ahi.
1Co 12:21 Mit hin khut jah a, “Nangma ka-ngai chatna aumpoi,” ti theilou, chukit le luchang hin kengphang te ni jah a, “Nang ni ka-ngai chapoi,” ti theilou ahi.
1Co 12:22 Chuti titah sanga tahsa pumpia um tibah hatmoa kigel chengse hi akhohjo a pang cheh ahiuve.
1Co 12:23 Eihon jong nahsah louva kigel tibah ho chu ikhohsah jo’uvin, itibah hoimoa um lai jouse jong ijemhoijo jiuvin,
1Co 12:24 hiche kijepna ho chu itibahhoi ho hin angai chapoi. Ahinla Pathenin tahsa pum hi asuton, alhasam tibah ho chu akhohsah cheh joi,
1Co 12:25 hitia chu tahsa pum sunga kikhenna aumdaa, hisanga chu tibah ho khat le khat akigel khoh to chehna diu ahijoi.
1Co 12:26 Hijeh a chu tibah khat’in athohgim le tibah jousen athoh gimpia, tibah khat seiphat achan le tibah dang jouse jong kipah khom ahiuve.
1Co 12:27 Nang ho Christa tipum nahiuvin, khat cheh chu atibah nahiuve.
1Co 12:28 Pathenin Houbung sunga hi amasatah a Solchah ho, aninaa Themgao ho, thum channaa mihil ho, chuban’a bolmo kidang bol ho, abankit’a damtheina Lhagao thilpeh chang ho, thil phachom bol ho, vaipo themho, paochom chom tho thei ho atun ahi.
1Co 12:29 Aboncha Solchah hiuvam? Abonchauva Themgao hiuvam? Abonchauva mihil hiuvam? Abonchauva bolmo kidang bol thei hiuvam?
1Co 12:30 Abonchauva damsah theina Lhagao thilpeh neila hilouva ong? Aboncha paochom thoa la hingal louva ong? Aboncha pao ledoh theila hilouva ong?
1Co 12:31 Amavang Lhagao thilpeh lencheh ho hadel’un. Lampi phachehjo kavetsah diu ahi nalaiye.
1Co 13:1 Keiman mihem pao jouse le Vantilte pao tho thei jong leng, ngailut kanei loule sum-eng dah kivoging le khutbeh kibeng ging bep kahi.
1Co 13:2 Keiman gaothu seidohna kaneiya thil imguh jouse jong seidoh a hetna jouse kanei thei, mol tolmang helna thei tahsan geiya kanei thei ahin, ngailut kanei loule imacha kahipoi.
1Co 13:3 Vaicha gentheite vahna kanei jouse kato thei, katahsa geiya meiya govam jeng dia kaphal ngam thei ahinan, ngailut kanei loule phatchomna kaneideh poi.
1Co 13:4 Ngailut nan athoh hat jingin, hejong ahepin, athangsepon, akithang-at pon, akiletsahpoi;
1Co 13:5 alam louvin achonpon, ama chang phatchomna aholpon, alung hang bai-pon, thil phalou jat amelchihpoi;
1Co 13:6 thil dih louva akipahji pon, thudih akipapijie;
1Co 13:7 imajousea athoh hat’in, ima jousea atahsanin, ima jousea akinemin, ijakaiya athoh tun tun’e.
1Co 13:8 Ngailutnan beitih neiponte. Gaothu seidoh um jongle bei ding, paochom chom tho um jongle hai ding, hetna um jongle bei ding ahi.
1Co 13:9 Ijeh-inem itile ihetnau le gaothu iseidoh nau hi bukim lou ahi;
1Co 13:10 abulhing chamkim ahung tengle akimlou chengse bei ding ahi.
1Co 13:11 Kachapan laiyin chapang thuseiyin kaseiyin, chapang lung gel’in kagel’in, chapang thil ngaiton ka-ngaitoi; pasal lhing kahiphat’in vang chapan lai thil jouse kapaitai.
1Co 13:12 Ajeh chu eihon tugeiya phatvet sunga lim kichen louva imu’u ahin, ajo tah ie kimaitoa imu diu ahi; tu chan geiya kahet kimlou ahin, ajo tah le eihet kimsoh banga kahet kimsoh ding ahi.
1Co 13:13 Tun tahsan, kinep, ngailut hicheng thum hi um jing ahin, hicheng lah a ngailut athupipen’e.
1Co 14:1 Ngailutna del jingun, Lhagao thilpeh ho tup’un lang, ahideh-in Pathen thu seidohna ding hatup’uvin.
1Co 14:2 Paochom thoa thusei chun mihemte koma sei ahipon, Pathen henga asei ahi, ajeh chu koiman ahetpeh poi, aman Lhagaova thuguh asei ahibouve.
1Co 14:3 Pathen thu seidoh vang chun mihemte koma khantouna ding le tilkhouna chule lungmonna asei ahi.
1Co 14:4 Paochom thoa vang ama khantouna ding bou akisei ahin, Pathen thu seidohpa vang chun Houbung akhantousah-e.
1Co 14:5 Paochom thoa thu nasei cheh diu kadeiyin, ahinla Pathen thu naseidoh diu kadei cheh-e, Houbung-in akisan’a khantouna anei theina dia aledoh aum loule paochom thoa thusei sangin Pathen thu seidohpa chu gamchengin aphachomjoi.
1Co 14:6 Tun sopite, nahenguva hung ing paochom thon thu seiying, thu phondoh ham, hetna ham, gaothu seidohna ham ahiloule hilchetna ham mangin seipeh dau leng ipi naphatchompi diu ham?
1Co 14:7 Hitobang chun hinna bei thil ging thei, kuli ahim, selangdah ham akimut teng agin akicheh loule ipi kitho ahi kon iti ahetdoh ding ham?
1Co 14:8 Ijeh-inem itile sumkon mutgin akichet loule koi galkon dia kigo thei ding ham?
1Co 14:9 Hitobanga chu paochom thoa thu nasei tengu na-seicheng akicheh loule ipi naseiyu kon iti ahetdoh ding ham? Hui lhoh mang ding bep’a aseiyu ahibouve.
1Co 14:10 Vannoiya hin aging thei ogin atam lheh jengin, khat cha jong ajeh bei aumpoi.
1Co 14:11 Keiman hiche ogin chu ipi kiseina ham he hih leng aseipa dia keima pao helou kahitan, ama chu kei dinga pao helou ahitai.
1Co 14:12 Hitobang hin nang hon jong aban’a Lhagao thilpeh hol nahiuvin, hichea chun lolhin chehna din Houbung khantouna ding ho hahol’uvin.
1Co 14:13 Paochom thoa thusei chun ipi kisei ham aledoh theina din tao hen.
1Co 14:14 Ajeh chu keima paochom thon tao leng kalhagao vang atao nan, kalung gil’a vang aga aumpoi.
1Co 14:15 Ahile iti dingba ham? Lhagaova katao tengle lung gil’a katao tei ding, Lhagaova la kasah teng lung gil’a jong kasah tei ding ahi.
1Co 14:16 Nang-in phattheiboh ngeh nan Lhagaovin tao le chun kikhopna mun’a um milham chun ipi naseila helouva nang thangvahnaa chu, “Amen,” iti ati thei ding ham?
1Co 14:17 Nangin phatah-in thangvahna sei jong le chun khatpa chun akhantoupi lou ahi.
1Co 14:18 Nang ho sei sanga paochom thoa thu kaseitamjoh jeh-in Pathen kathangvah-e.
1Co 14:19 Ahivangin Houbung sunga paochom thoa thu cheng asang sang kasei sangin mihil chahna dia kalunggil’a thu cheng nga seh sei kadeijoi.
1Co 14:20 Sopite, lung gel’in chapang hih-un, nunsetna lama chapangun lang, lung gel’in vang pilhinguvin.
1Co 14:21 Pathen lekhabu Danthua kisun : ” ‘Paochomhel tho ho, Michom beh ho kamsunga Keiman hiche mite henga thu kasei ding, Hijongle amahon kasei ngaipouvinte,’ tin Pakaiyin aseiye,” akiti.
1Co 14:22 Hichejeh a chu paochom tho hi tahsan loulai ho dinga melchihna ahin, atahsansa ho ding ahipoi; Pathen thu seidoh vang hi atahsansa ho ding ahin, atahsan loulai ho ding ahipoi.
1Co 14:23 Houbung pumpi kikhom hen lang amitakip’in paochom thoa thu aseipet’in milhamho ham atahsan loulai ho ham hung lut jengle, a-ngolgam dol’a namudoh lou diu ham?
1Co 14:24 Amavang mi jousen Pathen thu aseidoh pet’in atahsan loulai ham milham khat hung lut kha ta le, ajah chengsen asosal’a aboncha chu a-oimoa pang ding,
1Co 14:25 alungthim selguh jouse kiphongjal’a, chutah le amai tol’a asuh lut jenga Pathen chibai aboh ding, “Tahbeh mongin nalah-uva Pathen aum’e” tia aphonjal ding ahi.
1Co 14:26 Ipi iti dingba ham sopite? Nakikhop khom tengu amitakip, la sah ding nei jong, thuhil ding nei jong, thuphon ding nei jong, paochom tho ding nei jong, ledoh ding neiyan jong, aboncha chun khantousahna jeng hihen.
1Co 14:27 Koiham khat paochom thoa thuseiya na-umu le, mi ni ham, atam penin thum geiyin, khat khat’in kilhau hen chule mi khat’in akisei chu ledoh hen.
1Co 14:28 Pao ledoh ding aum lou vangle Houbung kikhopna ama chu umthim hen, ama changseh le Pathen henga seijo hen.
1Co 14:29 Gaothu seidoh ho jong chu mi ni ham thum ham geiya aseiyuva, adang hon aseiyu ageltoh diu ahi.
1Co 14:30 Amavang mi atou thim khattou henga thu ahung kiphondoh le amasapa chu thip hen.
1Co 14:31 Ijeh-inem itile mi jouse akitilkhouva aboncha alungmon theina diuva nabonchauva khat khat’a gaothu naseidoh theiyu ahi.
1Co 14:32 Themgao ho gaotheina chu Themgao ho thu noiya um ding ahi;
1Co 14:33 ajeh chu Pathen hi lungnoh phahna ding hilouva chamnajo ahibouve. Mithengte Houbung jousea chonna bangin,
1Co 14:34 Houbung kikhopna numeiho umthim beh-u hen, ajeh chu amaho hi thuseina kipelou ahiuve; chusangin Danthun asei bangin thua nungjo diu ahi.
1Co 14:35 I-khat khat hetnom aneiyu jongle a-in’uva ajiteu akidoh diu ahi, ajeh chu numei dia Houbung kikhopna thusei chu jachat um ahi.
1Co 14:36 O-le Pathen thu hi nang hoa kona hungjah doh pan ha, ahiloule nang ho komseh a bou hung lhung ham?
1Co 14:37 Khattou Themgaova kigel’a Lhagao thilpeh changa kibol aumle nahenguva kalekhasut hi Pathen thupeh ahi kihet them hen.
1Co 14:38 Koi tobang khat’in anahsah loule ama nahsah louva kikoi ding ahi.
1Co 14:39 Hijeh chun kasopite, gaothu seidoh ding gut’un lang, chule paochom thoa thusei ding jong kham hih-un;
1Co 14:40 amavang ijakai hoitah le kitup keiyin kibol cheh hen.
1Co 15:1 Sopite, nahenguva kaseiphong Kipana Thupha, nakisan’uva pansatna naneiyu chu kahetsah nom nahiuve;
1Co 15:2 nahenguva kathusei phonga chu napandet jingu le hiche vanga chu huhhinga um ding nahiuve, achutiloule mohseh a natahsan’u ahibouve.
1Co 15:3 Ajeh chu amasapen’a nang ho kapeh, kathulah chu ahile Pathen lekhabua kisei dungjuiyin eiho chonset chengse khel’in Christa athin,
1Co 15:4 ama chu avuiyun, chuin Pathen lekhabua kisei bangin nithum nin kaithouvin aumtai;
1Co 15:5 hichun Cephas henga akilah-in, chujouvin som le ni henga,
1Co 15:6 hiche ban hin sopite mi ja nga valjen henga khatvei lah-in akilah-in, alah-uva atamjo tugeiyin ahing nalaiyun, phabep vang athitauve;
1Co 15:7 abanin Jacob henga akilah-in, chule solchah jouse henga jong akilah-e;
1Co 15:8 Akhon nan aphat louva peng tobang kei henga jong ahung kilah-in ahi.
1Co 15:9 Keima Solchah ho lah a alhumpen kahin, Pathen Houbung kabolset jeh chun Solchah tidin jong kakilompoi;
1Co 15:10 hijongle Pathen lungset jal’a keima hiche hi hikha kahibouve, chule alungsetna hi kei dia ima pang lou ahipoi, amaho chengse sangin kahatoh gim cheh jon, keivang kahipoi, eiumpia Pathen lungsetna joh chu ahibouve.
1Co 15:11 Hijeh chun amaho hiu hen kei hileng hitia hi kaseiphonguva, nang hon chutima chun natahsantauve.
1Co 15:12 Christa thinaa kona kaithouva aumdol kiseiphong lea, itia nalah-uva koi koihamin mithiho thokitna umlouva aseiyu ham?
1Co 15:13 Mithi thokitna aum loule Christa jong kaithouva umlou hinte;
1Co 15:14 chutia Christa kaithouva aum lou mongle kathuseiphongu jong moh ahin, natahsan’u jong pannabei,
1Co 15:15 mithiho kaithouva aum loule Pathenin Christa akaithou lou ahin, akaithouva akiseijeh a Pathen douna hettohsah a pang, Pathen dia jouthua hettohsah a pang mia eikimandoh diu ahi.
1Co 15:16 Ijeh-inem itile mithiho kaithouva aum loule Christa jong kaithouva umlou ahin,
1Co 15:17 chutia Christa kaithouva aum loule natahsan’u jong phachom lou, tugeiya nachonset chengseuva um jing nalai nahiuve.
1Co 15:18 Chule Christa hinkhoa ihmu milsa chengse jong amangthah gam ahitai.
1Co 15:19 Chutia Christa to hingkhom dia ikinepnau hi tu hinkho sung mai maiya ding ahile, mi jouse lah a eiho hi voujang natna theipen ihi diu ahi.
1Co 15:20 Tun vang Christa thina konin kaithouvin aumin, a-ihmu milsa ho thokit tei ding photchetnan apangtai.
1Co 15:21 Mihem khat jeh a thina aumdoh bangin, mihem khatjeh-in thina kona thokitna aumdoh tan,
1Co 15:22 Adam sunga pen jeh-in mi jousen athilon, hitobanga chu Christa sunga um jeh a mi jouse kicho hing ding ahiuve.
1Co 15:23 Hiche hi amichang cheh ama phat phat’a kilhah tho ding ahi; Christa apatna ahin, aban’a Christa hung teng amite hintin,
1Co 15:24 achaina hipaiya, Christan vaihom na jouse le tha neina jouse chule thahat tin cheng asuhmangsoh teng Lenggam chu Pa Pathen apeh ding ahi.
1Co 15:25 Ijeh-inem itile Pathenin agalte jouse ajoa akengto noiya alutsah masangsea Christan lengvai apoh tei ding ahi.
1Co 15:26 Suhmang ding gal nukhah pen chu thina ahi;
1Co 15:27 ajeh chu Pathen lekhabun, “Aman ijakai akengto noiya akoisohtai,” ati. Ijakai athu noiya kikoisoh lah a hi ijakai athu noiya koisohpa tah vang chu kisimtha lou ahi akichen’e.
1Co 15:28 Pathenin ijakai Christa thu noiya alutsah soh teng, Pathen chu abonchakei chunga ahitheina dinga, thil ijakai aboncha anoiya lutsahpa noiya chu Chapa jeng jong lut ding ahi.
1Co 15:29 Mithi ho dia baptize chanpeh ho, ahile ititauvinte? Chutia mithi ho kaithouva aum loule ibol’a amaho dia baptize chang hiuvam?
1Co 15:30 Chule keihon jong ibol’a nidan telchan’a kichat tijat kathoh jingu ham?
1Co 15:31 Sopite, i-Pakaiyu Christa Jesu hinkhoa kanei, nang hoa um kakisonna pan’a niseh a thijing kahi.
1Co 15:32 Mihem hina maiya Ephesus khoa gamsaho to kisat kahile kei dinga ipi phachom ham? Mithi ho kaithouva um lou mong ahile: “Neu hitin dontah tau hene, Jing teng eiho kithita ding’an,” kiti bang chun boltah tau hen.
1Co 15:33 Ima kipui chatvaisah hih-uvin: “Kivoppi phalouvan Mi nunphat asusei,” akiti.
1Co 15:34 Lung dihtah pu’vin chule chonset dauvin, ajeh chu abang bang Pathen hetna neilou na-um’ui; najachatna diuva kasei ahi.
1Co 15:35 Mi abang khat’in, “mithi ho kaithouva iti uma, chule itobang tahsavou pua kikaithou diu ham?” tinte.
1Co 15:36 Lungthimbei! Nangin muchi natu chu athi loule akehdoh ngaipoi.
1Co 15:37 Nangin natu chu khonunga hung khangdoh aphung lhingset chu ahipon, suhlou chang hihen muchi dang hijongle muchi chang mai mai natulut ahibouve;
1Co 15:38 Pathenin adei banga tahsa asempeh a amuchi jat dungjui cheh a tahsa apeh ahibouve.
1Co 15:39 Tahsaphea hing jouse tahsaphe jong akibangpoi; mihem’a achomin, gancha tahsaphe achomin, vachate tahsaphe achomin, nga hoa achom’e.
1Co 15:40 Van tahsa ho aumin, leiset tahsa ho jong aum’e; ahinla van’a ho loupina achomin, leiset’a hoa jong achomin ahi.
1Co 15:41 Nisa loupina achomin, lha loupina achomin, ahsite loupina jong achom’e; ahsi khat loupina jong ahsi dang khat sangin achomin ahi.
1Co 15:42 Athi ho thokit jong hitobang chu hiding ahi. Mon mang theiya kivuilut ahin, mong mang thei louva kikaithou ding ahi;
1Co 15:43 jum le ja thoh a kivuilut ahin, loupina kikaithou ding ahi; longdamsa kivuilut ahin, thahat tah a kikaithou ding ahi;
1Co 15:44 tahsavou pua kivuilut ahin, lhagao tahsavou pua kikaithou ding ahi.
1Co 15:45 Chule Pathen lekhabua hitobang hin, “Mihem masa Adam chu tahsa hing khat ahidoh-in, Adam ninapa vang lhagao chohing ahi,” akiti.
1Co 15:46 Amasa chu lhagao vou ahipon, tahsavou joh ahin, aban’a chu lhagaovou ahi.
1Co 15:47 Mihem masa chu leiset leivuiya kon ahin, Mihem ninapa vang van’a kon ahi.
1Co 15:48 Leivuiya chengse chu leivuiya konpa tobang ahiuvin, van’a chengse jong chu van’a konpa tobang ahiuve;
1Co 15:49 leivuiya konpa lim ilo banguva van’a konpa lim jong ilo cheh diu ahi.
1Co 15:50 Hiche hi kasei ahi sopite, tahsaphe le thisanin Pathen Lenggam alo theipon, mon mang theiyin jong monmang theilou alo theipoi.
1Co 15:51 Ven, thuguh kaseipeh-ui, ibonchauva i-na ihmut milsoh lou diu, ibonchauva
1Co 15:52 sumkon gin nukhah pen’a chu mitphet kah, hai khat sunga ikikheldoh soh diu ahi; ijeh-inem itile sumkon hung ging ding chule mithi ho mon mang thei lou dia kikai thou diu, eiho jong ikikhelsoh kei diu ahi.
1Co 15:53 Ajeh chu mon mang thei hin mon mang lou akivon’a, thi thei hin thi thei lou chu akivon ding ahi.
1Co 15:54 Hitia chu mon mang thei hin mon mang thei lou chu akivon’a, thi thei hin thi thei lou chu akivon teng le Pathen lekhabua kisun thu cheng: “Jo nan thina aval lhumtai,
1Co 15:55 Vo thina, najo na hoiba ham? Vo thina, hoiba ham namidena?” kiti chu guilhung ding ahi.
1Co 15:56 Thina midena chu chonset ahin, chonset thahatna Danthu ahi.
1Co 15:57 I-Pakaiyu Jesu Christa jal’a jo na eipeuva Pathen chu thangvah-in um hen!
1Co 15:58 Hichejeh chun kasopi deitahte, dettah-in suhlong hoi hilouvin pangun, Pakai hinkhoa natoh jouseu chu pannabei ahilou nahetjeh-uvin, phat jousen Pakai kinbol nan thalhing jing jenguvin.
1Co 16:1 Mithengte dia sumto khom thudol vang chu Galatia gama Houbung ho kathu lhah banga nang hon jong nabol diu ahitai.
1Co 16:2 Kahung teng sumdon khom bol louna din Choldo jou nikhat ni le nang ho amichang cheh-in atojou kham dungjuiyin sepkhen hen khol hen.
1Co 16:3 Kahung teng kilom nasah pen pen’u chu lekha sutpeh ing ting nathilto’u chutoh Jerusalema sol nang’e.
1Co 16:4 Keima tah chea aphat jongle keima eikilhonpi nauvinte.
1Co 16:5 Macedonia gam kachotsoh teng nahenguva hung nang’e, ajeh chu Macedonia gam chonle dinga kigo kahi;
1Co 16:6 kache na chan’a neithah le theina diuva ijem itile nahenguva phat chom khat ka-uma, phalbi sungsea bon kachamden thei ahi.
1Co 16:7 ljeh-inem itile tuchunga hi palama jotpa ding kadeipon, Pakai phatsah ahile phat chom khatpi nakom’uva nichon ding kakinem’e.
1Co 16:8 Ephesus khoa Pentecost geiyin nichong ing’e;
1Co 16:9 ajeh chu keima din natoh machalna din kot lentah-in akihongin, eidouva jong atam lheh jeng’e.
1Co 16:10 Timothy nahenguva ahungle nalah-uva kiphalam louhel’a alhah theina din vephauvin; ajeh chu kei banga ama jong Pakai natong ahi;
1Co 16:11 hijeh chun koiman nahsah mon bolda hen. Kaheng ahung lhun theina din lung mongin hinthah leuvin, ajeh chu kei le sopiten ama ka-nga jingu ahiye.
1Co 16:12 Sopi Apollos thudol vang, sopite to lhon’a nahenguva ahungna dia katem jing ahinan, tupettah a ding vang anompoi, akimandom teng hung nante.
1Co 16:13 Kigingphan, tahsan’a pangdet’un, pasal umchan thon, hat’uvin.
1Co 16:14 Nabol jouseu ngailut neiya kibol hihen.
1Co 16:15 Sopite, nang ho kangeh nahiu-ve, Stephanas insung mite hi Achaia gamsunga Pathen tahsan ga masa ahiuva, achamtah-uva mithengte kinbolna akipeh-u naheuvin,
1Co 16:16 nang hon jong hitobang miho le atohgimpi chengseu umchan najop theiyu ahi.
1Co 16:17 Stephanas le Fortunatus chule Achaicus te ho hilama ahungu kakipah lheh-e; ajeh chu amahon nalhin lelna jouseu abulhit’un,
1Co 16:18 ahungu hin kei le nang ho lhagao akidosah lheh jeng’e. Hijeh chun hitobang ho hi hethem’uvin.
1Co 16:19 Asia gama Houbung jousen nasalam’ui. Pakaiya hinkhompi Aquila le Prescilla, chule a-in lhona kikhom Houbung miten hatah-in nasalam’ui.
1Co 16:20 Sopite chengsen nasalam’uve. Kisopi chop thengin khat le khat kisalamto cheh-uvin.
1Co 16:21 Hiche salamna hi keima Paul khut tah a hung kon ahi.
1Co 16:22 Koi hile Pakai ngailu lou chu gaosap chang hen! Maranatha.
1Co 16:23 Pakai Jesu milungset nan umpiuvin.
1Co 16:24 Christa Jesu hinkhoa ka-ngailutnan nabonchauvin umpiuvin.