02.07.2007
Sankt-Peterburq
BUTA
Şairə Səadət Butaya həsr edirəm
Dağların ömrü tək, əbədiyyətə,
Təbiət qoynundan boylandı Buta.
Günəş tək dünyanı nura bələdi,
Özü al şəfəqə boyandı Buta.
Tanrı bu vergini yerində verdi,
Səadət adında buta göndərdi.
Bir dağlar qızını dağa döndərdi,
Ən uca zirvədə dayandı Buta.
Qayalar gözəli şəlalə oldu,
Bağrına xal düşdü, gah nalə oldu.
Dərdi ürəyində min şələ oldu,
Eşqinin uğrunda hey yandı Buta.
Bəxtinə qarğışçı olmadı yenə,
Acı günlər yazılsa da ömrünə,
Abbas1 dedi, Abbas gəldi dilinə,
Dərviş tək səhralar dolandı Buta.
Əşrəf, ürəyini alsa da kədər,
Yüz yalvar, sözlərin olacaq hədər.
Çünki, gəncliyindən bu günə qədər,
Ömrünə dağ çəkən insandı Buta.
Dostları ilə paylaş: | 
