Ar mi lú íre lendes mir coa turcova i Farisaron matien masta, tirneltes harive. 2 Ar yé! enge tasse nér epe se ye náne púlienwa, arwa acca olya neno hroaryasse. 3 Etta Yésus carampe i şanyengolmonnar, quétala: “Ma ná lávina i *sendaresse nesta, hya lá?” 4 Mal anelte quilde. Tá nampes i nér, nestane se ar mentane se oa. 5 Ar quentes téna: “Man mici le, qui yondorya hya mundorya lanta mir tampo, ua tucuva se ama i *sendaresse?” 6 Ar ualte pole hanquete nati sine.
7 Tá nyarnes sestie i nerin i náner tultaine, íre túnes manen cillelte i amminde nómi inten, quétala téna: 8 “Íre nalde tultaine lo quén veryanwenna, áva caita undu i amminda nómesse. Cé quén minda lá elye anaie tultaina lo se, 9 ar i quén ye lye-tultane tuluva ar quetuva lyenna: 'Lava nér sinan same i nóme!' Ar tá mauya lyen mene nucumna i amnalda nómenna.