Xəbər bülleteni №10

Nazirlik vergi hesabatı yayıb

08.10.2015

2015-ci ilin 9 ayının vergi daxilolmaları haqqında məlumat açıqlanıb. Vergilər Nazirliyinin analitik-informasiya şöbəsinin məlumatına görə, yanvar-sentyabr ayları ərzində dövlət büdcəsinə 5 milyard 94 milyon 201,4 min manat vəsait daxil olub, proqnoz tapşırığına 100,5 faiz əməl edilib.

Hesabat dövründə vergi orqanlarında 58 473 vergi ödəyicisi qeydiyyata alınıb.

Avropa Şurası Azərbaycandakı İnsan Hüquqları üzrə Birgə Qrupda iştirakını dayandırıb

08.10.2015

Avropa Şurası Azərbaycanda ötən il yaradılmış İnsan Hüquqları üzrə Birgə Qrupda iştirakını dayandırıb. “Turan” agentliyinin məlumatına görə, bunu Avropa Şurasının baş katibi Torbyorn Yaqland oktyabrın 7-də qurumun Nazirlər Komitəsinə rəsmən bəyan edib. O deyib ki, 2014-cü il oktyabrından Avropa Şurasının təmsilçisi Bakıda Birgə Qrupun iclaslarına qatılırdı: “Məqsəd vətəndaş cəmiyyəti ilə Azərbaycan hakimiyyəti arasında dialoqu canlandırmaq idi. Bu təşəbbüsə baxmayaraq ölkədə insan haqları sahəsində vəziyyət ümumilikdə pisləşib. Son vaxtlar daha çox insan haqları fəalı həbs olunub. Avropa Şurası qəbuledilməz saxlanma şəraiti barədə narahatlıq doğuran məlumatlar alıb”.

2005-2008-ci illərdə problemli məhbusların işi üzrə işçi qrup fəaliyyət göstərib. Qrupda hökumət, parlament nümayəndələri və hüquq müdafiəçiləri təmsil olunub.

Ötən il oktyabrın 22-də problemli məhbusların işi üzrə işçi qrup 6 illik fasilədən sonra bərpa olunub. Bu, Azərbaycan prezidenti İlham Əliyevlə Avropa Şurasının baş katibi Turbyorn Yaqland arasındakı razılaşma əsasında reallaşıb. İnsan Hüquqları üzrə Birgə Qrup adlandırılan quruma bu şəxslər daxildir: Prezident Administrasiyasının hüquq mühafizə orqanları ilə iş şöbəsinin müdiri Fuad Ələsgərov, Prezident Administrasiyasının sektor müdiri və Azərbaycanın Avropa İnsan Hüquqları Məhkəməsində səlahiyyətli nümayəndəsi Çingiz Əsgərov, Azərbaycanın Konstitusiya Məhkəməsinin hakimi Rafael Qvaladze, Prezident yanında Əfv Məsələləri Komissiyanın katibi Kəmalə İsmayıllı, Baş Prokurorluğun nümayəndəsi İlqar Cəfərov, Ədliyyə Nazirliyinin nümayəndəsi Faiq Qurbanov, Azərbaycanın Avropa Şurası Parlament Assambleyasında nümayəndə heyətinin rəhbəri, Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov, Milli Məclisin hüquq siyasəti və dövlət quruculuğu komitəsinin sədri Əli Hüseynli, həmin komitənin üzvü deputat Çingiz Qənizadə, QHT-lərə Dövlət Dəstəyi Şurasının sədri, deputat Azay Quliyev, həmin şuranın üzvləri Əliməmməd Nuriyev, Sahib Məmmədov, hüquq müdafiəçiləri Eldar Zeynalov, Novella Cəfəroğlu, Səidə Qocamanlı, Arzu Abdullayeva, Mirvari Qəhrəmanlı, Səadət Bənənyarlı, Zəlihə Tahirova.

Fuad Ələsgərov və Səməd Seyidov qrupun həmsədrləri, Səadət Bənənyarlı, Kəmalə İsmayıllı və Sahib Məmmədov isə qrupun katibləri seçiliblər.

Tıxac problemini necə həll etmək olar?

08.10.2015

İqtisadçı ekspert Qubad İbadoğlu tıxac probleminin həlli yollarına dair şərh yayıb. Transparency.az-ın məlumatına görə, ekspert deyib ki, San-Marinoda hər min nəfərə 1263 maşın düşür, ABŞ-da bu göstərici 1000-ə yaxındır: “Azərbaycanda isə hər 1000 nəfərə düşən minik avtomobillərinin sayı 2015-ci il yanvarın 1-nə 117 olub. Bu ilin ilk 8 ayında ötən ilin eyni dövrü ilə müqayisədə Azərbaycana avtomobil idxalının yarıya qədər azalmasına baxmayaraq paytaxt Bakının avtomobil yollarında sıxlıq problemi qalır.

Dünyanın böyük şəhərlərinə xas olan bu problemin həlli üçün avtomobillərin bir ərazi vahidindən o birisinə daxil olmasının məhdudlaşdırılması praktikasına nadir hallarda rast gəlinir. Lakin bəzi ölkələrdə avtomobillərdə sərnişinlərin sayına məhdudiyyətlər qoyulması halları mövcuddur. Məsələn, ABŞ-ın paytaxtı Vaşinqtona iş saatlarında girib-çıxan, sərnişinlərinin sayı 2 və ya 3-dən çox olan minik maşınları üçün ayrıca hərəkət zolağı ayrılıb. Adətən bu zolaqda sıxlıq müşahidə olunmur. Bu qayda həm də ekoloji sağlamlığı təşviq edir.

Azərbaycanda da rayondan gələn minik avtomobillərinin Bakı şəhərinə daxil olmasını məhdudlaşdırmaq əvəzinə Vaşinqtondakı qaydanı tətbiq etmək yaxşı olardı. İkincisi, iş günləri ilə istirahət günlərində hərəkət tənzimlənməsi fərqli qaydalarda aparıla bilər.

Nyu-York və Vaşinqton kimi böyük şəhərlərdə istirahət və bayram günləri maşın dayanacaqlarında ödəniş haqqı alınmır. Bu da həmin şəhərlərdə hərəkətin proporsionallığına müsbət təsir göstərir.

Nəhayət, sıxlığın aradan qaldırılması məqsədilə ictimai nəqliyyatın hərəkətinin düzgün tənzimlənməsi çox vacibdir. Bunun üçün onların hərəkət marşrutlarının və dayanacaqlarının ümumi istifadə olan yollardan ayrılması təcrübəsi də tətbiq oluna bilər”.

Kənd Təsərrüfatı Nazirliyinin vəzifəli şəxslərinə cinayət işi qaldırılıb

08.10.2015

Baş Prokurorluğun mətbuat xidməti oktyabrın 8-də bəyan edib ki, Maliyyə Nazirliyindən Kənd Təsərrüfatı Nazirliyinin Dövlət Maşın Sınaq Stansiyasının fəaliyyətində yol verilmiş qanun pozuntuları barədə material daxil olub və Korrupsiyaya Qarşı Mübarizə Baş İdarəsində araşdırılıb.

Məlumata görə, araşdırmalar zamanı Dövlət Maşın Sınaq Stansiyasının direktoru Cavanşir Bağırovun və digər vəzifəli şəxslərin rəsmi sənədlərə bilə-bilə yalan məlumatlar daxil etdiyi, müəssisədə faktiki işləməyən şəxslərin adlarına əmək haqları yazılması, tariflərin düzgün tətbiq edilməməsi və saxta qaimələrin tərtib edilməsi yolu ilə 221 min manat məbləğində pulun mənimsəndiyi, israf etməklə dövlətin qanunla qorunan mənafeyinə mühüm zərər vurulduğu aşkara çıxıb.

Fakt Cinayət Məcəlləsinin 179.3.2 (külli miqdarda mənimsəmə və ya israf etmə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə araşdırılır, istintaq tədbirləri davam etdirilir.