IV Mühəmməd Gəray Xanın Aleksey Mixailoviçə göndərdiyi on beşinci yarlıq (?)
IV Mühəmməd Gəray Xanın Moskva çarına göndərdiyi dəqiq tarixi məlum olmayan on beşinci yarlıq Hüseyn Fеуzxanovun arxivində “№ 324” şifrəsi altında qorunmaqdadır. Bu sənəd sözügedən xana məxsus 29 yarlıqdan iyirmi altıncısıdır.
Yarlığın qısa məzmunu:
Çarın özünə “Qərbin və Şərqin padşahı” titulunu götürməsindən xanın narazılığı. Moskoviyada müsəlmanların incidilməsi, Quran, məscid və mədrəsələrin yandırılması. Xanın çardan öz adamlarını cilovlamasını tələb etməsi. Çarın Don kazaklarını cilovlaya bilməməsi barədə yalanı. Tatar elçilərinin öldürülməsi. Çarın əmri ilə Polşaya səfər təşkil edilməsi. Dnepr kazaklarının xana qulluq etmələri və Polşa ilə xoş münasibətləri. Xanın Polşa və kazak torpaqlarına girməmək barədə çoxsaylı yarlıqları. Moskva qoşunlarının Kiyev qalasına daxil olması. Kazakların xandan kömək istəməsi. Xanın Moskva üzərinə səfərə çıxması. Çara Moskvalı dilmancla məktub göndərilməsi.
