Эярдяни аь гу кими

CÜMHURİYYƏT DÖVRÜ


İKİ MÜCAHİD
Sən, ey atəş vücudlu, oynaq atım!

Ey ildırım baxışlı qol-qanadım!

Biz türklərə saldırıcı babamız

İki ağır miras buraxmış yalnız.

Biri dəmir silah, birisi atdır,

Biz türklərə bunlar iki qanatdır.

Bunlar ilə yüksəklərə uçarız,

Üç dünyanın tilsimlərin açarız.

Qovunca biz yeriyinin üstünə,

Qeysərlərin, kəsrilərin təxtinə

Sahib olan fateh dövri alarız,

Arslandan, qartaldan tük saldırarız.

Kədərli, şən nümayişli günümüzdə

Ayrılmaz arkadaşsınız həp siz də.

Bulunduğumuz qovğalarda nə kadar

Nəqş etdin qəlbimə xoş xatirələr.

Uzaqlardan görüncə həp düşməni

Çeyniyordu cəlavənin kəmini.

Qulağını qırpar, yeri eşərdin,

İldırımlı bulut kibi kişnərdin.

Üzənginə ayağımı basınca

Cilan kibi sıçrardın, göz açınca.

Şahin kibi həm qol-qanad açardın,

Dörd ayaqla hava ilə uçardın.

Bən düşməni qılıncımla, qurşunla,

Sən çeynərdin dırnağınla, dişinlə.

Duyulunca sonra hər yanda zəfər,

Ona qatardın düşməni sərasər.

Şən və müzəffər bir sima alardın,

Cəbhələrdə kişnər, meydan sulardın.

Fəqət şimdi nədən oynaq dik başın

Dalğın durur ildırımlı baxışın?

Şimdi nədən aşağıya dikilmiş?

Qara yallı təmiz boynun bükülmüş?

O narıncı, parlaq atlas tüklərin,

Tikan kibi qabarmış kipriklərin.

Bir top sivri iynə kibi düzülmüş,

İldırımlı, qara gözlər süzülmüş.

Yara almış qartal kibi bakarsın,

Gözlərinlə sönük şimşək çakarsın.

Atlıları anan cilan gözlərin,

Süslü ayaqların, incə dizlərin

Yorğun-arğın, ölgün kibi duruyor,

Bu halların ümidlərmi qırıyor.

Bilməm ki, kaç tarixi xatirələr

Hiddətli son baxışlarında titrər.

İnanmazdım ki, bir çəlik, bir qurşun

O atəşli vücudunu soldursun.

Son nəfəsdə qoy başını dizimə,

Oxşayayım, sürtəyim üz-gözümə.

Bən mərsiyə qoşub sənə ağlamam!

Deyəcəyim son sözümdür, vəssəlam!

Vəzifəni pək namusla bitirdin,

Bir bəxtiyar şəhid kibi can verdin.

Lakin görələr hala hücum topları,

Bizimkilər dırmanır dağ yuxarı.

Vicdan səsi kibi bu səs də titrər,

Bəni də şübhəsiz hücuma səslər.

Halal elə, arkadaşım, bağışla!

Getməliyəm, yoldaşını alqışla!

Vəzifəmdir bu yoldan yoxdur dönüm,

Şanlı zəfər… ya şərəfli bir ölüm!..

1918