Tədqiqatın metodu. Gürcüstan ərazisində mövcud olan türk mənşəli etnotoponimlərin araşdırılması prosesində linqvistik tədqiqatların başlıca metodlarından, təsviri metoddan, həmçinin araşdırmanın xarakteri ilə bağlı tipoloji metodlardan, digər elmi-tədqiqat üsullarından – sistemləşdirmə, qarşılaşdırma və statistik üsullardan istifadə olunmuşdur.
Dissertasiyanın elmi yeniliyi. Gürcüstan ərazisindəki etnooykonimlər, etnooronimlər, etnohidronimlər ilk dəfə olaraq monoqrafik şəkildə tarixi-linqvistik aspektdən tədqiq olunmuşdur. Həmin etnotoponimlərin formalaşmasında müxtəlif türk tayfa adlarının rolu, ekstralinqvistik faktorların müəyyənləşdirilməsi, areal xüsusiyyətlərinin üzə çıxarılması, gürcüləşdirmə siyasətinin səbəblərinin aydınlaşdırılması, etnotoponimlərin leksik-semantik, morfoloji, sintaktik xüsusiyyətlərinin dəqiqləşdirilməsi, həmçinin bəzi etnotoponimlərin etimologiyasının ilk dəfə olaraq araşdırılması dissertasiyanın elmi yeniliklərindən hesab edilməlidir.
