Jurnalistika standartları

VƏTƏNPƏRVƏRLİK

Bəzi jurnalistlər “Azadlıq/Azad Avropa Radiosu”yla əməkdaşlığa başlarkən, öz ölkəsinə güclü vətənpərvərlik duyğusuyla bağlılığı və demokratik dəyərlərə, söz azadlığına, insan hüquqlarına inamı əldə rəhbər tutur. Bu dəyərlərə bağlı jurnalistlər avtoritar hökumətlərə və /və ya avtoritar siyasi partiyalara müxalifətdə ola və özlərini vətənlərindəki siyasi qarşıdurmanın birbaşa iştirakçısı saya bilərlər.

Bu durum təbii sual doğurur: jurnalistin şəxsi siyasi əqidəsi və vətənpərvərlik duyğusuyla “Azadlıq/Azad Avropa Radiosu”nun obyektiv, qərəzsiz, etibarlı, dolğun və dəqiq məlumat hazırlamaq vəzifəsi necə uzlaşır?

Cavabımız çox sadə qaydaya əsaslanır: bizim borcumuz auditoriyanı dolğun məlumatlandırmaqdır. Bu məlumatdan publikanın özü nəticə çıxaracaq. Biz öz siyasi görüşlərimizi heç kimə sırımır və hansı nəticəyə gəlməyi də diktə etmirik.

Şəxsi əqidələr – vətənpərvərlik, etnik və dini kimlik böhran dönəmlərində mütləq ağrılı nöqtələrə çevrilir. Özəlliklə ölkələr savaşanda, yaxud ölkə içində silahlı toqquşma baş verəndə. Belə hallarda münaqişəyə birbaşa cəlb edilən ölkələrin milli xidmətləri güclü özünüsenzura “azarına” yoluxa bilər: məsələn, onlar publikanı bəzi olaylar barədə (tutalım, kütləvi qətllər, zorlamalar, işgəncələr haqqında) bilgiləndirməklə, intiqam hissindən doğan yeni zorakılıq əməllərinin körüklənməsindən qorxa bilərlər.

Ancaq jurnalistin peşə borcu olay barədə materialı senzuradan keçirmək deyil. O, problemin miqyasını anlaması və çözüm aramağa başlaması üçün publikaya məlumatı bütün dolğunluğuyla çatdırmalıdır. Olayları baş verdikcə işıqlandırmaq və bu zaman qərəzsizliklə bağlı peşə standartlarımıza dönmədən əməl etmək lazımdır (Bax: QƏRƏZSİZLİK VƏ YALANÇI QƏRƏZSİZLİK). Milli xidmətlərə zorakılığa çağırışların yer aldığı hər hansı qaynaqdan sitatları translyasiya, ya da dərc etmək yasaqlanır.

Jurnalistin vətənpərvərlik duyğuları onun doğma ölkəsinin digər ölkə və xalqlara münasibətini vicdanla işıqlandırmasına mane olmamalıdır.

“Azadlıq/Azad Avropa Radiosu”nun jurnalistləri, sadəcə, həmvətənləri arasında geniş yayıldığına görə, əslində yalan olan tarixi əsatir və ya milli dəyərlərə inanmamalıdırlar. Obyektivlik və dəqiqlik naminə biz vətənpərvərlik əsatirlərinə və onların qaynaqlarına şübhəylə yanaşıb, həqiqəti publikaya olduğu kimi çatdırmalıyıq. Hər hansı olay və ya mövzuyla bağlı şübhələriniz varsa, regional direktorla məsləhətləşin.