Mənbə: DSK, cədvəl 176 Cədvəl məlumatlarında ilk diqqəti cəlb edən məqam bu iqtisadi zonada əhalinin gəlirlərində qadınların payının (51.6%) kişilərin payından (48.4%) 3.1% çox olmasıdır. Cədvəl mlumatlarından belə görünür ki, pensiya, öz təsərrüfatında işlərdən və kənd təsərrüfatında muzdlu işlərdən gəlirlərdə qadınlar daha üstün paya malikdirlər. Özəl sektora muzdlu işlər, sahibkarlıq-kommersiya fəaliyyəti, sərbəst peşə fəaliyyəti kimi sahələrdə isə kişilərin gəlirləri çoxdur.
Ümimiyyətlə, bu iqtisadi zonada 2018-ci ildə əhalinin ümumi gəlirlərinin 47%-i muzdlu işlərdən, 26%-i müxtəlif növ transferlərdən (o cümlədən 13.5%-i pensiya, 9.4%-i himayə yardımları, 2.8%-i təqaüdlər və s.), qalan 27%-i isə digər gəlirlərdən (o cümlədən 10.8%-i sahibkarlıq gəlirləri, 11.2%-i öz təsərrüfatından gəlirlər və s.) formalaşıb.
Bu iqtisadi zonada əhalinin illik gəlirlərində ən böyük paya malik gəlirlər dövlət sektorunda muzdlu işlərdən gəlirlərdir – 28%. Bu gəlirlərdə qadınlarla kişilərin payı təqribən bərabərdir. 2018-ci ildə əhali ümumi gəlirlərinin 17%-ni özəl sektorda muzdlu işdən əldə edib: bu gəlirlərdə kişilər qadınlarla müqayisədə 4.4 faiz bəndi üstünlüyə malikdir. Bunun əsasında deyə bilərik ki, bu zonada özəl sektorda olan muzdlu işlərdə çalışan kişilərin sayı qadınlardan çoxdur.
Daha bir diqqət çəkən məqam, bu iqtisadi zonada sahibkarlıq (kommersiya) fəaliyyətindən gəlirlərdə kişilərlə qadınlar payları arasında (6.8/4.0 nisbəti) elə də böyük fərqin olmamasına rəğmən, öz təsərrüfatında işlərdən qadınların gəlirlərinin kişilərin gəlirlərindən 3.5 dəfə çox olmasıdır.
Nəhayət, bu cədvəldə diqqəti yetiriləsi daha bir mühüm məqam, əhalinin gəlirlərində dövlətin aşağı gəlirli ailələrə göstərdiyi ünvanlı sosial yardım və sosial müavinət kimi sosial müdafiə xarakterli yardımların rolunun ümumiyyətlə görünməməsidir.
