Samarqand iqtisodiyot va servis instituti marketing kafedrasi

6-mavzu: B2B bozorida marketing strategiyasini shakllantirish
Reja:
6.1. B2B bozorida mahsulot portfelini shakllantirish.
6.2. “Mahsulot-bozor”, “O’sish-ulush” matrisalari asosida marketing strategiyalarini ishlab chiqish.
6.3. Marketing kompleksi elementlari doirasida tovar, narx, sotish va kommunikasiya strategiyalarini shakllantirish


6.1. B2B bozorida mahsulot portfelini shakllantirish.

«Mahsulot-bozor» strategiyasi alternativ strategiyalar guruhiga kirib, korxonaning yangi bozorlarga chiqishi va yangi mahsulotlarni o‘zlashtirishiga qaratilgan. Bu strategiya korxonaning imkoniyatlari, mahsulotlari, bozorlar, raqobat holati, iste’molchilar va faoliyat yo‘nalishiga bog‘liq holda shakllanadi. Asosiysi korxona o‘zining resurslari va rivojlanuvchi tarmoqlari bo‘yicha marketing strategiyalarini ishlab chiqadi.

6.1-jadval
«Mahsulot-bozor» yoki Ansoff matritsasi

Mahsulot/bozor	Mavjud	Yangi
Mavjud	Bozorga kirish strategiyasi	Bozor rivojlanish strategiyasi
Yangi	Mahsulot rivojlanish strategiyasi	Diversifikatsiya strategiyasi

Bozorga kirish strategiyasi, qoida bo‘yicha, an’anaviy haridorlar bilan tovarlarni rag‘batlantirish, bozor ulushini ko‘paytirish, raqobatchilardan haridorlarni yoki yangi iste’molchilarni jalb qilish.
Bozor rivojlanish strategiyasi — bu asosan yangi iste’molchi segmentlarga, yangi hududiy bozorlarga va yangi sotish tarmoqlariga chiqish.
Mahsulot rivojlanish strategiyasi yaxshilangan yoki yangi tovarlarni tayyorlash (innovatsiya, yangi marka, assortiment modifikatsiyasi, mahsulot parametrlarini yaxshilash, instrumental va emotsional tavsiflarni rivojlantirish) hisobiga sotuv o‘sishiga yo‘naltirilgan.
Diversifikatsiya strategiyasi yangi bozorlar uchun mo‘ljallangan yangi mahsulotlar bilan bog‘liq. Albatta, bu strategiya qiyin va hatarli, chunki u korxonani yangi sohalarga olib chiqadi. Ularning muvaffaqiyati uchun yirik kadr va moliya resurslarini jalb qilish talab etiladi.