Əlavə 3 azərbaycan respublikasi

Tədqiqatın obyekti və predmeti: İngilis və Azərbaycan dillərində, əsasən, bir və iki hecalı sözlərin prosodik strukturu genişləndirilmişdir. Predmeti isə danışıq aktında sözün prosodik vasitələrinin reallaşmasının ümumi cəhətlərinin sistemləşdirilərək ümumiləşdirilməsindən ibarət olmuşdur.

Tədqiqatın məqsəd və vəzifələri: ingilis və Azərbaycan dillərinin materialından çıxış edərək, çağdaş dilçilikdə sözün prosodik strukturunun xüsusiyyətlərini nəzəri cəhət­dən təhlil etməkdən, problemlə bağlı ümumiləşdirmələr aparmaqdan və sözün forma­laşmasında və tələffüzündə prosodik vasitələrin işlənmə mexanizmini sistemləş­dirməkdən, cümlədəki mövqeyindən asılı olaraq, söz prosodikasında baş verən variasiya xüsusiyyətlərinə aydınlıq gətirməkdən ibarətdir. Dildə sözün formalaş­ma­sında və işlənməsində prosodik vasitələrin nə dərəcədə əhəmiyyətli olması məsələsinə aydınlıq gətirilməsi də tədqiqat işinin məqsədinə daxildir. Sözün prosodikası probleminin tədrisi ilə bağlı tövsiyələrin işlənilib hazırlanması da tədqiqat işində nəzərdə tutulan məqsədin tərkib hissələrindən biridir. Qarşıya qoyulmuş məqsədə çatmaq üçün dissertasiya işində aşağıdakı vəzifələrin yerinə yetirilməsi nəzərdə tutulmuşdur:

– prosodik vahidlərlə bağlı mövcud nəzəri ədəbiyyatı təhlil etmək, onun mahiyyəti və funksiyasına dair irəli sürülmüş fikirləri saf-çürük etmək;

– sözün formalaşmasında prosodik vahidlərin rolu probleminə aydınlıq gətirmək;

– heca və sözün prosodik xüsusiyyətlərinə aydınlıq gətirmək;

– təhlil materialı kimi istifadə olunan dil materialını seçmək, sistemləşdirmək və təhlil etmək;

– işin yerinə yetirilməsində istifadə olunan metodları müəyyənləşdirmək və əsaslandırmaq;

– eksperimentin tətbiqi prinsiplərini müəyyənləşdirmək və eksperiment materialını “PRAAT” proqramı əsasında təhlil etmək;

– eksperiment materialının prosodik göstəricilərini riyazi və statistik hesablamalarla təhlil etmək, əldə edilən faktlar əsasında cədvəl və qrafiklər qurmaq, müqayisələr aparmaq, ingilis və Azərbaycan dillərinin prosodik sistemlərinə dair oxşar və fərqli xüsusiyyətləri müəyyənləşdirmək.