ÖZÜNÜ MALİK VƏ TƏDBİR EDƏN HESAB ETMƏK
Ünvani Bəsri soruşdu: Bəndəçiliyin həqiqəti nədir? İmam (ə) buyurdu: Üç şeydir: Birincisi, özünü əlində olan şeylərə malik hesab etməmək, yəni Allahın onun ixtiyarında qoyduğu şeyləri bəxşişdən başqa bir şey bilməməkdir. O, həqiqətdə dil, əl, ayaq, mal-dövlət, övlad və başqa şeylərin müstəqil maliki deyildir. Özünü müstəqil malik hesab edən kəs yəqin bilsin ki, hələ bəndəçilik mərtəbəsinə çatmamışdır. Əksinə belə insanlar özlərini rəbb mərtəbəsində təsəvvür edirlər.
İkincisi, Allahı bütün işlərdə həqiqi tədbirçi kimi tanımaqdır. Amma əksər insanlar malın çoxalmasından, yüksək vəzifələrdə olmaqdan və gələcək həyatlarını təmin etməkdən ötrü müstəqil tədbirlər görürlər. Həqiqətdə onlar həqiqi tədbirçi olan Allahı yaddan çıxarıb, özlərini müstəqil hesab edirlər. İmam (ə) bu hədisdə yaşayışı təmin etməyi inkar etmir, əksinə insan öz işlərində diqqətli olmalıdır. Lakin o, məğrurluğunu kənara qoyub özünü həyatda müstəqil hesab etməməlidir. Bir işin baş verib-verməməsini Allahdan bilməlidir. Yəni bir işin ardınca gedəndə, «bu işin ardınca gedirəm, amma nəticəsi Allahdandır» deməlidir. Məsələn, xəstəlik zamanı həkimin yanına gedəndə onu bir vasitəçi hesab etməlidir. Həkimin verdiyi dərman xəstəlikdən şəfa tapmağa bir vasitədir. Amma dərmanın təsir etməsi əsil şəfa verici olan Allahın əlindədir.
Dostları ilə paylaş: |
