1. İqtisadiyyatın dövlət tənzimlənməsinin zəruriliyi

2. Iqtisadiyyatın dövlət tənzimlənməsinin predmeti

İqtisadiyyatın dövlət tənzimlənməsinin obyektiv mümkünlüyü, iqtisadi inkişafın, istehsalın təmərküzləşməsinin və kapitalın müəyyən səviyyəsində meydana çıxır. Bu mümkünlüyün həqiqətə çevrilməsi iqtisadiyyatın dövlət tənzimlənməsinin qarşıya çıxardığı problemləri həll etmək imkanı ilə bağlanmalıdır.

Müasir dövrdə iqtisadiyyatın dövlət tənzimlənməsinin zəruriliyi bütün dünya ölkələrində birmənalı qəbul edilib. Dünya təcrübəsi göstərir ki, dövlət və iqtisadiyyat bir-birini tamamlayaraq inkişaf edir.

Bazar münasibətləri şəraitində iqtisadiyyatın tənzimlənməsi onda dövlətin mütləq iştirakı konsepsiyasına əsaslanır. Lakin, iqtisadi proseslərdə dövlətin rolu təkcə bazar mexanizminin tənzimlənməsi və «oyun qaydaları»-nın qoyulması ilə bitmir, o həm də mülkiyyətçi və bazarın subyekti kimi də çıxış edir.

Dövlət iqtisadiyyatın inkişafını dəstəkləməklə yanaşı, onun fəaliyyətinə nəzarəti də həyata keçirməlidir. Bu məqsədlə normativ-hüquqi aktlardan, iqtisadi-hüquqi tənzimləmə mexanizmindən istifadə olunur.

Müasir şəraitdə iqtisadiyyatın dövlət tənzimlənməsi təkrar istehsal prosesinin tərkib hissəsidir. O, müxtəlif vəzifələri yerinə yetirir.

a) iqtisadi artımı stimullaşdırmaq;

b) məşğulluğu tənzimləmək;

c) ixracı dəstəkləmək;

d) prioritet sahələri müəyyənləşdirmək.

İqtisadiyyatın dövlət tənzimlənməsinin konkret istiqaməti hər hansı bir ölkədə müəyyən dövrdə iqtisadi və sosial prioritetlərin mürəkkəbliyi və xarakteri ilə müəyyən olunur.