Norman (vikinq) gəmisi. Orta əsrlər miniatürü Çaylarda daxili nəqliyyat məqsədilə “daxabye” adlandırdıqları yelkənli - avarlı gəmilərdən istifadə edən ərəblər dəniz ticarətində “dhau” adlı yelkənli gəmilərinin müxtəlif modifikasiyalarından istifadə edirdilər. Aralıq dənizdə dolaşan “şəbək” adlı gəmilərsə ilk növbədə hərbi məqsədlərə xidmət edirdi. Bütün bu gəmilərin hər bində yeni texnologiyaların tətbiq edildiyi bilinməkdədir. Bu, ilk növbədə gəmilərin hərəkətliliyini yüksəldən və əvvəlki gəmilərdəkindən daha böyük sahəyə malik üçbucaq formalı yelkənlər və arxa tərəfə yerləşdirən, əlava hərəkətverici vasitə və sükan rolunu oynayan avarlar idi (Шебека, 1907).
Belə fərz edilir ki, ərəblər bu yenilikləri Cənub-Şərqi Asiya xalqlarından əxz etmişdilər. Fəqət sözügedən ehtimalı sübut edən təkzibedilməz dəlil və sübut yoxdur. Hətta bu fikir doğru isə belə, fakt budur ki, həmin yeniliklərin sonradan Avropaya qədər geniş coğrafiyada yayılması və tətbiqi bilavasitə ərəblərin adı ilə bağlı idi. Təsadüfi deyil ki, bir çox dənizçiliklə bağlı termin Avropa dillərinə məhz ərəb dilindən keçmişdir. Bu baxımdan ərəbcədə “dənizlərin əmiri” anlamına gələn “əmir əl-bəhr” kəlməsindən qaynaqlanan “admiral” (Фасмер М., 1986, s. 62) və “istiqamət” anlamında işlədilən “əs-səmt” kəlməsindən törəmə olan “azimut” (Баранов Х. К.,1944 , s. 372) və s. kimi terminləri misal çəkmək olar.
