Davamlı inkişaf və insan potensialından səmərəli istifadə, hazırda bəşəriyyətin qarşılaşdığı və həll etməyə çalışdığı mühüm sosial-iqtisadi problemlərdən biridir. Iqtisadi inkişafın davamlı yaxud dayanıqlı inkişafı dedikdə, onun bütün istehsal və sosial dairələrinin kompleks halında ahəngdar, habelə tarazlı yüksəlişi nəzərdə tutulur. Bu iqtisadi inkişaf konsepsiyasının seçimində yanaşmaların fərqli cəhətlərinə baxmayaraq, həmin konsepsiya özündə - iqtisadi, sosial, ekologiya kimi 3 mühüm istiqaməti birləşdirir.
«Davamlı inkişaf» anlayışı ilk dəfə 1987-ci ildə «Ətraf mühit və inkişafa dair Beynəlxalq Komissiya»-nın hesabatında işlədilmişdir. Bu hesabatda aydın və birmənalı şəkildə qeyd olunmuşdu ki, «davamlı inkişaf yalnız uğurlu və rəqabət qabiliyyətli iqtisadiyyatda mümkündür». Müasir dünyanın tanınmış iqtisadçı alim və mütəxəssisləri isə iqtisadiyyatın davamlı inkişafını, cəmiyyətdə əhalinin yoxsulluğunun, sosial ədalətsizliyin, işsizliyin aradan qaldırılmasında görürlər.
Lakin, təəssüflə qeyd etmək lazımdır ki, bəşəriyyətin tarixi inkişaf yolunun müxtəlif mərhələlərində əhalinin maddi-mədəni vəziyyətinin yaxşılaşdırılması, sosial ədalətsizlik meyllərinin aradan qaldırılması, işsizliyin azaldılması və məşğulluğun səviyyəsinin yüksəldilməsi yolunda rəsmi, habelə qeyri-rəsmi qurumların fəaliyyətinə baxmayaraq, bu problemlər hələlik öz tam həllini tapmamışdır.
Davamlı inkişaf konsepsiyasının əsas prinsiplərindən biri, hakimiyyət və onun idarəetmə orqanlarının sosial siyasət məsələlərini irəli sürüb əsaslandırması, habelə onların ardıcıllıqla həyata keçirilməsi xətti ilə bağlıdır. Eyni zamanda davamlı iqtisadi inkişaf konsepsiyası insanların normal tələbatlarının, xüsusilə cəmiyyətin yoxsul təbəqələrinin yaşayışının təmin olunması ilə yanaşı, mövcud texnika və texnologiyanın ətraf mühitlə ahəngdar tarazlıq şəraitində yüksəlişini nəzərdə tutur. Başqa sözlə, «davamlı inkişaf indiki nəslin ehtiyaclarını ödəməklə» yanaşı, gələcək nəsillərin də öz tələbatlarını ödəmək qabiliyyətini təhlükə altında qoymamalıdır. Bu müddəa insan cəmiyyəti ilə onun həmişə təmasda olduğu iqtisadi, sosial və ətraf mühit arasında düzgün münasibətlərin formalaşması, bütövlükdə bəşəriyyətin müasir mərhələdə qarşılaşdığı qlobal iqtisadi-sosial problemlərin həllində mühüm rol oynamalıdır.
Təsadüfi deyildir ki, son illərdə dünyanın bütün ölkələri öz iqtisadi siyasət xətlərini məhz bu istiqamətdə qurub, həyata keçirməyə çalışırlar. Həmin siyasətdə isə insan kapitalı və onun potensial imkanlarına çox böyük diqqət yetirilir. Müasir dünyanın iqtisadi inkişaf və sosial-mədəni yüksəlişinin əsasında insan amili, onun fiziki - intellektual imkanlarının nə dərəcədə səfərbərliyə alınması, həmin potensial qüvvələrin özünü real şəkildə göstərməsinə necə şərait yaradılması, nəhayət hərtərəfli qayğı göstərilməsi bacarığı həll edir. İnsan amilinin yetişməsinə, təhsilinə, ixtisasının təkmilləşdirilməsinə, mədəni-əxlaqi tərbiyəsinə yönəldilmiş xərclər, gələcəkdə özünün sosial-iqtisadi səmərəliliyi baxımından, başqa sahələrə nisbətən dəfələrlə səmərəli olduğunu, dünya ölkələrinin keçdiyi enişli-yoxuşlu ümumi inkişaf yolu, habelə ayrı-ayrı milli iqtisadiyyatların tarixi yüksəliş təcrübəsi təsdiq edir.