Kəndin cənub-şərq tərəfində uzaq keçmişdə ətrafı cəngəlliklərlə əhatə olunmuş bir göl olub. Adına Çandıq deyiblər. Gölün üzərini çox vaxt çən, duman örtərdi. Bəlkə də, gölün adının Çandıq olmasında elə çənin rolu olmuşdu. Belə ki, əvvəllər yerli camaat tərəfindən “çənni yer”, “çənnik” kimi deyilə-deyilə, nəhayət, Çandıq kimi bizim dövrümüzə gəlib çıxaraq belə adlandırılmışdır.
Yaşlı kişilər belə danışırdılar ki, keçmiş zamanlarda kəndin ovçuları buraya ova gedərmişlər. Bir dəfə yenə gölün kənarında olan quş və heyvanlardan ovlamaq ücün ora gedən ovçular bir hadisədən heyrətə gəlirlər. Görürlər ki, gölün kənarında bir ana maral yaralı halda uzanıb. Maralın yarasından axan qan suya qarışırmış. Gölün suyu qan rəngində olub. Ən maraqlısı o olub ki, maralın yanında təzəcə doğulmuş bala maral dayanıb heyrətlə o yan-bu yana boylanırmış.
O vaxtdan bu gölün adı “Qanlı göl” qalır.
Cənnət məkan
Belə rəvayət edirlər ki, insanlara torpaq paylanarkən bir qrup xalq bu mərasimə kecikir. Gecikənlər arasında indiki "Talış-Muğan" zonasında yaşayanların babası da olur. El ağsaqqalları məsləhətləşib öz nümayəndələrini Allahın yanına göndərirlər. Nümayəndələrin başçısı olan Muğan çox ağıllı, cəsur, müdrik və mömin bir adam idi. O, Allaha gəlişinin məqsədini bildirib, yalvarış etməyə başlayır. Allah məşvərət etdikdən sonra onun yalvarışlarını eşidirlər. Cənnət üçün apardığı torpaqlardan bir hissəsini kəsib tayfanın başçısı Muğana verməyi qərara alır. Xahişə gələnlərin arasında talışların da nümayəndəsi varmış. O da Muğanla birgə gəlmiş imiş. Ona görə də o torpaqlarda yaşamaq üçün talışlara da yer verməyi Muğana tapşırırlar. Elə o vaxtdan bu torpaqlar "Talış-Muğan zonası" adlanır.
Xırmandalı
Nəql olunur ki, ötənlərdə mehribançılıqda, hörmətçillikdə və nəfsitoxduqda ad çıxarmış iki qardaş bu oymaqda bir əkər, bir biçər, dəni dəyirmanda bir üyüdərmişlər. Bölgüyə gələndə hər kəs qədərincə götürüb bəsimdi,” deyərmiş… Günlərin bir gün qardaşlar xırmandan paylarına düşən məhsulu öz evlərirnə aparırlarmış. Böyük qardaş evliymiş, düşünür ki, mən evli-eşikli adamam, güzaranım da pis deyil. Qoy kiçik qardaşımın payı çox olsun! Bu gün-sabah ailə qurar, ehtiyacı olar… Elə bu fikirlə öz payından bir hissəni ayırıb qatır qardaşının payına…
Subay qardaş da öz-özlüyündə götür-qoy edir ki, böyük qardaşım evli-eşiklidir, bir çətən külfəti var, mənimsə nə yeyənim var, nə dağıdanım, qoy məhsulun çoxunu o aparsın. Və öz payında böyük bir hissəsini qatır qardaşının payına… Bu minvalla paydakı nişan hər gün pozulur. Xırmandan məhsul tükənmək bilmir. El-obaya hay düşür ki, balam bu qardaşların xırmanı hey aşıb-daşır, xırmanı dolu qaldı…
Sonralar bu qardaşları el arasında nişan verəndə deyərmişlər ki, «Xırmanıdolu» filankəslər. Çox-çox əvvəllər yaşayan ağsaqqalların dediyinə görə bizim Xırmandalı kəndinin adı bu əhvalatdan binə tutub.
Qızılgül əfsanəsi
Bir gün mənə dedilər qızılgülün mənası nədi? Dedim mən belə billəm, belə eşidmişəm. Mənası odu ki, Leyli Məcnun o vaxtı bir-birini sevillər. Valideynləri də vermirmiş. Vermiyəndə Məcnun da dəli olur, dərdinə əlac olmur. O da deer mən dəli dööləm, mən sevirəm, onun dəlisiyəm. Nə qədər adam qızın atasına göndərib eliyillər ki, bu qızı ver ki, bu oğlan çöllərə düşməsin. Deer yox, vermirəm ki, vermirəm. Leyli də Məcnun da vəfat eliyillər qubardan.
Olar ölənnən sora ikisin də yan-yana basdırıllar. Ancaq oların arasına bi dənə qarı girir, pis qarı. Xəbər aparan. Leylinin qəbri üsdə qızılgül bitir. Allahtala orda qızılgül bitirir, Məcnunun qəbri üsdə isə sırğeyigül bitirir. O qızılgülnən sırğeyigül gəliilər bitişillər bi-birinə yuxarıda. O qarı ortadan qaratikanı bitirir, orda da qoymur oları birrəşməyə.
Söyləyicilər:
Hacı Nüsrət Nəsrullayev, doğum tarixi 1947, təhsili ali, Qızılağac kəndi
Mənsurə Abdullayeva, doğum tarixi 1933, təhsili yoxdur, Qızılağac kəndi
Əlizaman Baxış, Hacıtəpə (Keçmişdə və indi), B., 2010
«Совет кянди» гязети, 26 ийул 1985
Gülcahan Ələkbərova, 75 yaş, təhsili yoxdur, Qızılagac kəndi
Toplayan:
Füzuli Bayat Gözəlov
6. HƏM MƏZƏLİ, HƏM QƏRİBƏ ƏHVALATLAR
Şəkililərdə belə bir şey var. Biri gedir Şəkiyə gəzir Şəkini, Şəki dağlıq yerdi, axı, Şəkini gəzəndən sonra bu azır. Azandan sonra gəlir çıxır bir yeməkxanaya, deyir:
– Salam əleyküm oturmaq olar?
Deyir:
– Həblə oturun.
– Nə var yeməyə?
– Həblə quş südü, can dərmanı. Nə istiyirsən var.
Deyir:
– Mənə bir dənə kabab gətir, bir az da çörək. Başqa bir şey lazım deyil.
– Həblə baş üstə. Gedir gətirir.
Gətirəndən soora bu yeyir, deyir, afisant, gəl pulu apar deyir. Çox sağ ol qonağpərvərliyivə görə. Deyir:
– Nə verəcəm?
Deyir:
– İyirmi manat.
Deyir:
– Başuva dönüm, bir dənə kabab yemişəm, bir tikə də çörək, uzağı eləsin beş manat, iyirmi manat hardandı?
Hay-küy qalxanda şef povur çıxır:
– Həblə nə hay-küydü?
Deyir:
– Görmürsən, yeyibdi pulunu vermir.
Deyir:
– Sən kimsən pulunu vürmirsən?
Deyir:
– Məni prokuror təyin ediblər. Bəs sən kimsən?
Deyir:
– Sənin eşşəyin.
Sizə ətsünnət olmağdansa burda ətsünnət olaram
Bir dənə molla ətsünnət olmuşdu. Baxır dala görür bir dənə qəşəng, gözəl-göyçək arvaddı deyir:
– Bacı?
Deyir:
– Nədi?
Deyir:
– Ətsünnət olmuşam.
Dedi:
– Hə, qardaş.
Dedi:
– Əyalın yoxdu?
Dedi:
– Yoxdu.
Dedi:
– Şəriyyətdə bir var kəbin, bir də var siyğa. Kəbini molla kəsir, deyir bacı sıyğanı oxuyum özümə. Ətivi verəcəm, yağını verəcəm, paltaruvı verəcəm. Deyir, razısan?
Dedi:
– Razıyam.
Dedi:
– Yaxşı, bilirsən, neçənci arvadım olacağsan?
Dedi:
– Yox.
Dedi:
– On üçüncü.
Dedi:
– İstəmirəm.
Dedi:
– Niyə?
Dedi:
– Sizə ətsünnət olmağdansa, burda ətsünnət olaram.
Dostları ilə paylaş: |