ONOR. JOHN DALLI: Sur President, nista' nassiguraħ li assolutament m'hemm xejn ideoloġiku. Jien bniedem prammatiku u rrid biss li nkunu ċari.
ONOR. LEO BRINCAT: Fhimtek imma jien immaġinajt li forsi int kont qed taħseb li min-naħa tagħna hemm xi ħaġa ideoloġika jew riġida.
ONOR. JOHN DALLI: Le, m'iniex naħseb ħażin.
ONOR. LEO BRINCAT: Sur President, l-intenzjoni tal-leġislatur hija li jkollna xi ħaġa iktar user-friendly. Fil-fatt din il-klawsola tipprovdi sabiex l-awtorita' kompetenti, b'direttiva dwar l-assigurazzjoni magħmula għall-finijiet ta' din il-klawsola, tidditermina l-lingwa li biha kuntratt ta' assigurazzjoni dwar riskju sitwat f'Malta, jew rabta fejn Malta tkun il-pajjiż tar-rabta ta' klassi jew klassijiet speċifikati li jkunu speċifikati fiha, għandhom ikunu expressi.
B'mod ġenerali din il-klawsola hija mfassla fuq id-dispożizzjonijiet ta' artiklu 38 tat-third non-life insurance directive u ta' artiklu 38 tat-third life insurance directive. Ovvjament din tapplika l-iktar meta jkollok ċerti policies, bħalma huma motor policies u anke ċerti life policies, li jkun importanti li tispjegahom għal min forsi ma jkunx jaf bil-lingwa Ingliża.
