ONOR. CHARLES BUHAGIAR: Rapport kif mitlub mill-Onor. Interpellant rigward iċ-Centru Nazzjonali tal-Arti fil-Belt qiegħed jitpoġġa fuq il-Mejda tal-Kamra.
FURJANA - XOGĦOL TA' 'SLUM CLEARANCE'
2516. L-ONOR. JEAN PIERRE FARRUGIA staqsa lill-Ministru tad-Djar: Jista' l-Ministru jgħid meta se jinbeda x-xogħol ta' 'slum clearance' fuq is-siti fi Triq l-Argotti kantuniera ma' Triq l-Iljun u fi Triq il-Kapuċċini l-Furjana? Meta hu maħsub li jitlesta dan ix-xogħol? Kemm għad hemm 'evictees' mingħajr akkomodazzjoni alternattiva? Peress li dawn l-'evictees' kienu qed jinsistu li jingħataw akkomodazzjoni alternattiva permanenti fil-Furjana stess jew inkella jingħataw id-dritt li jerġgħu jirritornaw fl-istess fond wara li jseħħ is-'slum clearance', jistax id-Dipartiment tad-Djar jirriserva postijiet vakanti fil-Furjana għal dawn l-'evictees'? Jaqbel il-Ministru li l-'evictees' jingħatalhom id-dritt li jerġgħu lura fl-istess postijiet wara li jkun tela' l-bini ġdid?
