2. “Çətin” yeniyetmələrin tiplərinə dair V.Klaynın təsnifatı.
Tədqiqatçı – alim V. Klayn “çətin” yeniyetmələri 6 tipə bölmüşdür.
I tip belə səciyyələndirilir : O, sadəcə özünü gicliyə qoyur. Bu tipə aid olan yeniyetmələr həddən artıq zarafatlar və qeyri – münsib hərəkətlər edirlər. Onlar evə gec gəlir, məktəbdən yayınır, bacı və qardaşları ilə savaşır, onları incidirlər.
II tip “valideynlərin qənimi” adlanır. Belə yeniyetmələrin özünü pis aparmasının səbəbi bir və ya hər iki valideynə qarşı olan intiqam, nifrət hissləridir. Valideynə münasibətdə yaranan düşmənçilik, ədavət hissləri sonralar əsl müharibənin yaranmasına səbəb olur. Yeniyetmə oğulun düşmənçiliyi valideyn üçün gözlənilməz olur. Onlar başa düşmürlər ki, bütün illər ərzində onun daxilində toplanmış mənfi hisslər indi özünü biruzə verir.
