2.8 Ənənəvi Banklar da İslam Maliyyəsi Xidmətləri göstərirlər Müasir zamanda həmçinin ənənəvi banklar da diversifikasiya məqsədləri üçün müəyyən səviyyələrdə və mərhələlərdə İslam Maliyyəsi strukturları təsis edirlər. Bu strukturlardan ən geniş yayılmış forma İslam Pəncərəsidir. Ənənəvi bankların İslam Pəncərəsi yaratması onlardan İslami və ənənəvi vəsaitlərin qarışmaması üçün xüsusi mexanizm tələb edir. İslam pəncərəsinin fəaliyyətinin genişlənməsi isə daha sonralar ənənəvi bankların ayrıca İslam filialları yaratması mümkünlüyü ilə nəticələnir. Bundan əvvəl bank İslam strukturunun mənfəətliliyini və effektivliyini ciddi şəkildə araşdırır. İlkin etapda İslam pəncərələrinin və ya ayrıca İslam filiallarının yaradılması xərcləri ana Bank (ənənəvi bank) tərəfindən ödənilir. Lakin sonralar isə İslam strukturlarına aid bütün xərclər (istər pəncərə olsun istərsə də ayrıca filial) bu strukturların özləri tərəfindən maliyyələşdirilməlidir.
The Banker jurnalının verdiyi məlumata görə ənənəvi banklar öz İslam strukturlarının mənfəətliliyini və çəkisini demək olar ki, açıqlamırlar. HSBC Amanah bu konteksdə istisna təşkil edən nadir qurumlardan biridir.
