12. S.Şaumyan adına xəstəxana – indiki Neftçilər xəstəxanası.
13. Qorki küçəsi – indiki Mirzə İbrahimov küçəsi.
14. Şaumyan rayonu – indiki Bakı şəhəri Xətayi rayonu.
15. İqlimə Əliyeva-Heydərova (1896-1980) – pedaqoq. Doğulduğu Dərbənd şəhərində ilk təhsil aldıqdan sonra 1906-cı ildə Bakıya gələrək, H.Z.Tağıyevin qız məktəbində oxumuşdur. 1911-ci ildə məktəbi qurtarıb elə orada 6 ay təcrübə dərsi aparmışdır. Sonra Balaxanı kəndində açılan ilk qız məktəbində pedaqoq işləmiş, 1913-1917-ci illərdə isə yenidən təhsil aldığı məktəbdə çalışmışdır. 1920-1940-cı illərdə Dağıstanda pedaqoji fəaliyyətlə məşğul olmuş, sonra isə uzun müddət Bakıda maarif işində işləmişdir.
16. Musəvi küçəsi – indiki Məmməd Sadiq Əfəndiyev küçəsi.
17. Xavər Qarayeva-Şabanova (1901-1958) – ilk təhsilini Tağıyevin qız məktəbində, sonra isə Saratovda diş həkimliyi məktəbində almışdır. 1920-ci ilə qədər Həştərxanda həkim işləmiş, Aprel işğalından sonra Bakıya gəlmiş, ictimai fəaliyyətlə məşğul olmuşdur.
18. Sona Axundova (1897-1971) – şairə, ictimai xadim. Qız məktəbində oxuyarkən şeirlər yazmağa başlamışdır. 1910-cu ildə “Vətən” adlı ilk şeiri mətbuatda çap olunmuşdur. 1920-ci illərdə Azərbaycanda savadsızlığın ləğv edilməsi işində iştirak etmişdir. S.Axundova görkəmli həkim, professor Əbülfəz Qarayevin həyat yoldaşı, dünya şöhrətli bəstəkar Qara Qarayevin və cərrah, tibb elmləri doktoru Mürsəl Qarayevin anasıdır.
